Bu ilin dekabr ayının 23-24-də Azərbaycan Respublikasının Qırğızıstan Respublikasındakı Səfirliyinin və Qırğız-Türk "Manas" Universitetinin təşəbbüsü ilə Dünya Azərbaycanlılarının Həmrəyliyi Günü münasibətilə "Azərbaycan Günü" adlı tədbir keçirilib.
Tədbir çərçivəsində "Manas" Universitetinin kinoteatrında Azərbaycan filmləri ("Babək", "Nəsimi", "Arşin mal alan", "O olmasın bu olsun") nümayiş olunub.
Dekabr ayının 24-də keçirilən tədbirdə Qırğızıstan Respublikası Prezidenti Aparatının, Hökumətinin təmsilçiləri, Parlamentin deputatları, bu ölkədə akkreditə olunmuş diplomatik nümayəndəliklərin rəhbərləri, ictimai-siyasi xadimlər, universitetin professor-müəllim heyəti, Azərbaycan diasporunun üzvləri iştirak ediblər.
Tədbirin əvvəlində iştirakçılar universitetin foyesində Azərbaycanın tarixi, mədəniyyəti, turizmi, müxtəlif sahələrdə inkişafından bəhs edən və Ermənistan-Azərbaycan, Dağlıq Qarabağ münaqişəsi ilə bağlı kitab sərgisi ilə tanış olublar.
Sonra Azərbaycanlıların Həmrəyliyi Günündən bəhs edən sənədli film nümayiş olunub.
Tədbirin açılışın edən Qırğız-Türk "Manas" Universitetinin rektoru Səbahattin Balcı qardaş Azərbaycan xalqının bayram gününün keçirilməsinə görə şad olduğunu, Azərbaycan Respublikasının yüksələn inkişaf tempindən fərəhləndiyini bildirib, Heydər Əliyevin öz xalqının və dövlətinin inkişafı naminə gördüyü işlərdən danışıb.
Azərbaycanın Qırğızıstanda fövqəladə və səlahiyyətli səfiri Hidayət Orucov Dünya Azərbaycanlılarının Həmrəyliyi Günü haqqında geniş məlumat verib.
Səfir qeyd edib ki, dünya azərbaycanlılarının birliyi, soydaşlarımızın həmrəyliyi ideyası məhz Ümummilli lider Heydər Əliyevin xalqımız və Vətənimiz qarşısında göstərdiyi tarixi xidmətlərindən biridir.
Səfir bildirib ki, dünyada əlli milyonluq Azərbaycan xalqının taleyi belə gətirib ki, yalnız doqquz milyona yaxını öz milli dövlətinin vətəndaşıdır, qırx milyondan çoxu isə ya başqa dövlətin ərazisinə daxil edilib öz tarixi-etnik torpaqlarında, ya da Qırğızıstandakı kimi diaspor şəklində yaşayırlar.
Xaricdə yaşayan soydaşlarımızın bütün problemləri Azərbaycan Prezidenti İlham Əliyevin diqqət mərkəzindədir. Dövlətimiz bu sahədə perspektivli siyasət aparır və yaxşı nəticələr qazanılır.
Səfir qeyd edib ki, bu gün həm də Azərbaycan Respublikasının Prezidenti cənab İlham Əliyevin ad günüdür. Prezident İlham Əliyev uğurlu və nümunəvi ölkə başçısı nümunəsidir. Ölkəmizin başçısı Azərbaycanı siyasi və iqtisadi sahələrdə inkişaf etdirib və beynəlxalq arenada ölkəmizə böyük nüfuz qazandırıb.
Səfir Azərbaycan Respublikasının Prezidenti cənab İlham Əliyevin ad günü münasibətilə Qırğızıstan Respublikasının Prezidenti cənab Almazbek Atambayevin təbrik məktubu göndərdiyini tədbir iştirakçılarının nəzərinə çatdırıb.
Səfir qeyd edib ki, Azərbaycan ilə Qırğızıstan arasında əməkdaşlıq münasibətləri təkcə siyasi və humanitar sahədə deyil, həm də iqtisadi sahədə inkişaf etməkdədir və bu xətt Azərbaycan Respublikasının Prezidenti cənab İlham Əliyevin və Qırğızıstan Respublikasının Prezidenti cənab Almazbek Atambayevin siyasətinin prioritet istiqamətlərindəndir.
Qırğızıstan Respublikasının xarici işlər nazirinin müavini Erines Otorbayev, Qırğızıstan Respublikası Jokorku Keneşinin (Parlamentinin) deputatı, Qırğızstan-Azərbaycan Parlamentlərərarası dostluq qrupunun sədri Kurmanbek Dıykanbayev, Özbəkistan Respublikasının Qırğızıstan Respublikasında fövqəladə və səlahiyyətli səfiri Komil Rəşidov, "Azəri" İctimai Birliyinin sədri Əziz Əliyev, Qırğız-Türk "Manas" Universitetinin prorektoru Asılbek Kulmırzayev və başqaları çıxış edərək azərbaycanlıları bayram münasibətilə və Azərbaycan Respublikasının Prezidenti cənab İlham Əliyevi ad günü münasibətilə təbrik ediblər.
Sonra azərbaycanlı, qırğız və türk sənətçilərinin iştirakı ilə geniş konsert proqramı təqdim olunub.
Sonda Azərbaycan Respublikasının Qırğızıstan Respublikasında Səfirliyi adından tədbir iştirakçılarına ziyafət verilib.
