Əli Həsənov Azərbaycan və Türkiyə mediasına birgə fəaliyyətin vahid hədəfləri barədə maraqlı mesajlar verdi

"Biz hamımız bilirik ki, İslam dini dünyaya, bəşəriyyətə hansı dəyərləri gətirib. Təəssüf ki, hazırda həmin dəyərlərin çoxu başqa ad altında dünyada təbliğ olunur. İslam ölkələri terroru dəstəkləyən, öz daxillərində və bir-biri ilə nizam yarada bilməyən dövlətlər kimi təqdim edilir. Bu anlamda jurnalistlərin qarşısında mühüm vəzifələr durur".
"Trend" xəbər verir ki, bunu Prezident Administrasiyasının İctimai-siyasi məsələlər şöbəsinin müdiri Əli Həsənov Bakıda "Türkiyə və Azərbaycan mediası: Tarixi müqayisələr və ənənəvi mediadan internet mediasına keçid" mövzusunda keçirilən beynəlxalq konfransda bildirib.
Ə.Həsənov təəssüflə deyib ki, insanlar müsəlman ölkələrində baş verən hadisələri hələ də CNN, BBC və dünyanın digər bu kimi transmilli media qurumlarından alır: "Amma araşdırıldıqda, həmin ölkələrdə baş verən hadisələrlə onlar haqqında dünyaya yayılan məlumat arasında ciddi uyğunsuzluq olduğu, hadisələrin təfərrüatının kənarda qaldığı, hətta əsas cizgilərinin belə o informasiyalarda öz əksini tapmadığı üzə çıxır. Suriyada, Misirdə, İranda, Dağlıq Qarabağda, Qəzza bölgəsində, Yəməndə, Tunisdə və digər müsəlman ölkələrində baş verən hadisələr məgər yalnız o transmilli media orqanlarının təqdim etdiyi kimidir? Məgər bütün dünya ölkələri o media qurumlarının jurnalistləri kimi düşünür? Əlbəttə ki, yox. Amma bizim media nümayəndələrimiz ayrı-ayrı ölkələrin jurnalistlərindən sağlam fəaliyyət göstərsə də, səslərini bəzən ölkə hüdudlarından kənara çıxara bilmirlər. Bu da ona gətirir ki, dünyada müsəlman dövlətləri, xalqlarına qarşı qərəzli rəy formalaşdırılır. Bu dövlətlər və xalqlar terrorizmin məskəni kimi, vəhşi, sivil normalardan uzaq insanlar kimi təqdim olunur".
PA-nın şöbə müdiri bir neçə gün əvvəl İranda keçirilən İslam Konfransı Təşkilatının mətbuat və informasiya nazirlərinin toplantısında çıxış edərək Azərbaycanda İslam Ölkələri Jurnalistlər Birliyinin yaradılması haqqında məlumat verdiyini və dünyanın 55-dən artıq dövlətinin bu təşəbbüsü ürəkdən dəstəklədiyini qeyd edib.
Ə.Həsənovun sözlərinə görə, İslam dövlətləri Azərbaycanın bu işə ilk təşəbbüskar kimi qoşulmasını, İslam Ölkələri Jurnalistləri Birliyinin təsis qurultayının Bakıda keçirilməsi təklifini yüksək qiymətləndiriblər.

Jurnalistlər bilməlidir ki...

"Azərbaycan və Türkiyə mediası hər iki ölkənin maraqlarından çıxış edərək vahid hədəflərə doğru birgə hərəkət etməlidir"- deyən PA-nın şöbə müdiri qeyd edib ki, jurnalistlər unutmamalıdır ki, hansı şəraitdə fəaliyyət göstərmələrindən asılı olmayaraq, hər iki xalqın maraqlarını nəzərə almalıdırlar. Ə.Həsənov bildirib ki, Azərbaycan - Türkiyə münasibətlərinin təməli ulu öndər Mustafa Kamal Atatürk və ümummilli lider Heydər Əliyev tərəfindən sağlam qoyulub: "Mustafa Kamal Atatürk hər iki dövlətin sevincini, kədərini eyniləşdirərək, hər iki millətin taleyi ilə bağlı onların çiyinlərinə bərabər yük düşdüyünü bildirib. Heydər Əliyev isə iki ölkə arasındakı münasibətlərin yeni bir formul - "Bir millət, iki dövlət" formulu əsasında əbədiyyətə qədər sürəcəyini, bu xalqlar yaşadıqca, bu münasibətlərin də davam edəcəyini bəyan edib".
PA rəsmisi qeyd edib: "Əgər dövlətlərimiz bir yerdədirsə, ölkə başçılarımız - Türkiyə Prezidenti Rəcəb Tayyip Ərdoğan və Azərbaycan Prezidenti İlham Əliyev bütün məsələlərdə iki ölkənin maraqlarından çıxış edərək vahid hədəflər uğrunda addımlar atırsa, xarici ölkələrdəki diaspor təşkilatlarımız eyni məqsədə xidmət edirsə, xarici ölkələrdəki diplomatik korpuslarımız, səfirliklərimiz mütəmadi olaraq qarşılıqlı əlaqələr çərçivəsində fəaliyyət göstərirsə, bir-biri ilə daim məsləhətləşmələr aparır, eyni hədəflərə doğru hərəkət edirlərsə, nədən bizim media orqanlarımız da bilrikdə fəaliyyət göstərməsinlər?!"
Ə.Həsənov bildirib ki, bu yaxınlarda Aİ-nin "Şərq Tərəfdaşlığı" proqramı çərçivəsində keçirilmiş tədbirdə for-post hesab edilən ölkənin başçısı, Ermənistan Prezidenti Serj Sarkisyan Türkiyənin əleyhinə danışarkən, Azərbaycan Prezidenti "Türkiyə burada yoxdur, mən varam və sizin cavabınızı da mən verəcəyəm" demişdi. PA rəsmisi bildirib ki, bu ifadənin özü bu gün də dövlət başçılarımız səviyyəsində iki ölkə arasında münasibətlərin göstəricisidir.

Türkiyədə Azərbaycanın 20 milyardı...

"1998-2000-ci ilə qədər Azərbaycanda, neft müqavilələrini çıxmaqla, ən böyük yatırımlar Türkiyə sərmayələri idi. Azərbaycan da sərbəst kapital əldə etdikdən sonra ən böyük yatırımlarını Türkiyəyə yönəldib" - deyən PA rəsmisi bildirib ki, son 5 ildə Azərbaycan Türkiyəyə 20 milyard dollara yaxın sərmayə yönəldib. Bu da qardaş ölkəyə Azərbaycan neftinin gətirdiyi üstünlüklərdəndir: "Ona görə jurnalistlər də iki ölkənin strategiyasına, dövlət başçılarının müəyyən etdiyi xəttə müvafiq olaraq, ulu öndərlər Mustafa Kamal Atatürk və Heydər Əliyevin əsasını qoyduqları təməl prinsiplərdən çıxış edərək ümumi maraqlarımızı bölüşməlidirlər. Müasir texnologiyaların hansı səviyyədə dəyişməsindən asılı olmayaraq, media vahid hədəflərə doğru birgə, əlaqələndirilmiş fəaliyyətlə hərəkət etməlidir. Hazırkı dövrdə media transformasiya olunur, ənənəvi KİV-lər yerlərini müasir informasiya vasitələrinə verirlər. İnsanlar arasında virtual ünsiyyət vasitələri sürətlə inkişaf edir, mövcud media strukturları da öz fəaliyyətlərini yeni reallığa uyğunlaşdırırlar. Ancaq jurnalistlər unutmamalıdır ki, istənilən halda, hər iki xalqın maraqlarını nəzərə almalıdırlar".
Ə.Həsənov qeyd edib ki, media transformasiya olunur, ənənəvi media strukturları öz fəaliyyətlərini yeni reallığa uyğunlaşdırırlar. Bu ondan irəli gəlir ki, bəşəriyyətdə texnologiyalar dəyişir, insanlar arasındakı ənənəvi ünsiyyət vasitələri yerini yeni virtual vasitələrə verir: "Həm Azərbaycan, həm də Türkiyə getdikcə modernləşərək mövcud strukturlarını, o cümlədən media strukturlarını buna uyğunlaşdırır. Amma jurnalistlər bir şeyi unutmamalıdır ki, hansı şəraitdə, hansı yeni vasitələrlə, maddi-mənəvi şəraitdə fəaliyyət göstərmələrindən asılı olmayaraq, hər iki dövlətin, hər iki xalqın maraqlarını nəzərə almalıdırlar, bu maraqların təmin olunmasına öz töhfələrini verməlidirlər".
Onun sözlərinə görə, jurnalistlər hakimiyyətin siyasətini xalqa və idarəçiliklə bağlı xalqın rəyini hakimiyyətə çatdırmaqla onların arasında əlaqə yaradırlar: "1993-cü ildən sonrakı dövrdə söz və məlumat azadlığının inkişaf etdirilməsi istiqamətində atılan məqsədyönlü addımlar nəticəsində Azərbaycan KİV-ləri bölgənin aparıcı media strukturlarına çevriliblər. Azərbaycan jurnalistikasının səsi nəinki postsovet məkanından, Avrasiya məkanından, bütün dünyadan gəlir".

Türkiyə və Azərbaycan dünyaya nə verir, nə istəyir?

"Bu gün Türkiyə dünyanın 20 ən böyük dövlətindən biridir. Dünyanın 20 böyük iqtisadiyyatından biri Türkiyədədir. Türkiyə dünyada hərbi, ideoloji, siyasi, iqtisadi gücü ilə mühüm yer tutur. Azərbaycan da bu gücə güc qatacaq inkişaf səviyyəsinə gəlib çıxıb. Bütün bunların fonunda yaxın gələcəkdə Türkiyə və Azərbaycan vahid mövqedən çıxış etmək imkanlarını daha da genişləndirəcək". Ə.Həsənovun konfransdakı sözlərinə görə, bu birlik heç bir xalqa, dinə, millətə və yaxud digər struktura qarşı yönəlməyib: "Biz öz varlığımızı qoruyuruq və istəyirik ki, dünyada da bizim varlığımıza, dinimizə, dilimizə, mədəniyyətimizə, bizim maddi-mənəvi dəyərlərimizə hörmətlə yanaşsınlar. Biz öz ərazilərimizin bütövlüyü uğrunda mübarizə aparırıq, heç kimin ərazisində gözümüz yoxdur. Eyni zamanda, istəyirik ki, bizim ərazi bütövlüyümüzə hörmətlə yanaşsınlar. Biz dünya birliyinin bərabərhüquqlu üzvü kimi ona verdiyimizdən çox şey istəmirik. Azərbaycan və Türkiyə qarşılıqlı şəkildə dünyada verdiklərinin əvəzini istəyir".
PA-nın şöbə müdiri bildirib ki, bir müddət əvvəl Türkiyədə Qərb ölkələrinin başlatdığı Ermənistanla sərhədlərin açılması kampaniyasına qarşı iki ölkənin mediası yekdillik nümayiş etdirdi: "Baxın, ABŞ kimi dövlət Avropadakı müttəfiqlərini səfərbər edərək, Azərbaycanın işğal olunmuş əraziləri və ondan irəli gələn vəzifələri qulaqardına vuraraq, ikili standartlardan çıxış edərək Türkiyə ilə Ermənistanın sərhədlərinin açılmasını istəyirdi. Bu sərhədlərin hansı səbəbdən bağlandığını hamımız bilirik. Türkiyə qardaş dövlət kimi Azərbaycan torpaqlarını işğal edən bir dövlətə sərhəd açmayacağını, onunla heç bir diplomatik, iqtisadi, siyasi münasibətlər yaratmayacağını, torpaqlar işğaldan azad edilməyənədək onunla heç bir əlaqə qurmayacağını bəyan edib. Bu günədək də sərhədlərin bağlı qalması Türkiyə xalqının, dövlətinin iradəsidir. Xalqın və dövlətin iradəsini zorlamağa çalışan beynəlxalq qüvvələr bilməlidir ki, qarşılarında təkcə hakimiyyət strukturlarını deyil, xalqları, dövlətləri və onların iradəsinin təmsilçiləri olan jurnalistləri də görəcəklər".
Ə.Həsənov qeyd edib ki, Azərbaycan mediası 2015-ci il qondarma "erməni soyqırımı"nın "ildönümü" ərəfəsində çoxlu mühüm iş aparır: "Bəzən adama elə gəlir ki, "soyqırım" iddiaları Türkiyəyə deyil, Azərbaycana qarşı çevrilib. Çünki Azərbaycan dövlətinin, ictimaiyyətinin, qeyri-hökumət təşkilatlarının, medianın bu istiqamətdəki fəaliyyəti də Türkiyədəkindən daha güclü təəssürat bağışlayır. Biz türk xalqına və türk adına tuşlanmış hər bir əsassız iddialara qarşı heç bir dövlətdən, kənar mərkəzdən komanda gözləmədən getməliyik, gedirik və gedəcəyik. Türkiyəlilərin ünvanına yönələn hər bir ittiham o cümlədən azərbaycanlıların ünvanına yönəlib".
PA rəsmisi hazırda Azərbaycan və Türkiyə jurnalistlərinin birliyi istiqamətindəki addımları önəmli hesab etdiyini deyib: "Türkiyə-Azərbaycan mediası, indiyədək olduğu kimi, bundan sonra da bütün səviyyələrdə öz səylərini birləşdirəcək".