“Ermənilərin bütün saxtakarlıqları beynəlxalq ictimaiyyətə gün kimi aydındır”
Erməni saxtakarlığı qırxayaq kimi bütün Cənubi Qafqazı ağzına alıb. Azərbaycan da daxil olmaqla, başqa ölkələrə qarşı ərazi iddialarından əl çəkmədikləri bəs etmir, digər xalqlara məxsus dəyərləri mənimsəməyə çalışırlar.
Adı bütün qədim kitabələrdən, eləcə də “Kitabi Dədə Qorqud” dastanından qədim türklərə məxsus olan Göyçə gölünü on illərdir ermənilər özününküləşdirməyə çalışırlar. Qərbi Azərbaycanda yerləşən Göyçə gölünün adını dəyişdirərək Sevan qoyan bədnam qonşularımız indi də başqa bir kələyə əl atırlar. Ermənilər iddia edirlər ki, Göyçə gölünün ekoloji vəziyyəti kəskin pisləşib və göldə yaşıllaşma başlayıb. Yəni Göyçə gölü mamırlarla örtülür. Hətta ermənilər BMT-nin baş katibinə müraciət edərək Sevan gölünün təhlükə ilə üzləşdiyini və bunun üçün də UNESCO-nun təhlükə altında olan dəyərlər siyahısına salınmasına dəstək göstərməsini istəyirlər.
Ermənistanın Göyçə gölündən bir sıra məqsədlər üçün istifadə etdiyi məlumdur. Hətta gölün kənarında böyük bir turizm məkanının yaradıldığı da faktdır. Onlar turistləri bu məkana cəlb etmək üçün yüz oyundan çıxırlar.
Erməni mətbuatı özü yazır ki, Göyçə gölü (Sevan) pis idarəçilik və oliqarxların biznes maraqlarının qurbanına çevrilib.
Hətta Ermənistanın Kimya-fizika İnstitutunun baş elmi əməkdaşı Seyran Minasyan da mətbuata bununla bağlı çox həyəcanlı məlumatlar verib. O qeyd edib ki, gölün ekoloji vəziyyəti pisləşib və o yaşıllaşaraq tədricən bataqlığa çevrilir.
Ermənistanın Göyçə gölünü qəsdən çirkləndirməsinə dair fikirlər də mövcuddur. Gölə tullantıların atılması, onun zibilləndirilməsi və s. haqda danışılır.
Ermənistan Göyçə gölündə yaranan yaşıllaşma ilə bağlı həyəcan təbili çalır. Məqsəd Göyçə gölünə (Sevan) UNESCO tərəfindən status verilməsinə nail olmaqdır.
Mütəxəssislər hesab edirlər ki, ermənilərin Sevana UNESCO-dan status almaq niyyətinin kökündə onların növbəti saxtakarlığı və məkrli planları dayanır. Bu gün ermənilər belə addımlarla beynəlxalq qurumlardan pul qoparmaq məqsədi güdürlər. Onlar bununla belə təəssürat yaratmaq istəyirlər ki, guya mədəni irsin qorunmasına çalışırlar.
Məlum olduğu kimi, ermənilər ilk dəfə deyil ki, Sevan oyunu oynayırlar. Qərbi Azərbaycanda yerləşdikdən sonra buradakı bütün abidələrə, çaylara, göllərə və sairə qarşı məkrli niyyətlər ortaya qoyan ermənilər hələ Sovet dövründə Sevanla bağlı bir sıra saxtakarlıqlar həyata keçiriblər. Tarixdən məlumdur ki, ermənilər o vaxtkı SSRİ rəhbəri olan N.Xruşovu aldadıblar. Onlar Xruşova yalan satıblar ki, Göyçə gölü quruyur və buradakı farellər məhv olur. Göyçə gölündə qızıl balıq olmadığı halda, onlar ordan-burdan farel (ala balıq) alaraq gölə buraxdılar və belə rəy yaratdılar ki, guya burada farel var və həmin balıqlar gölün quruması nəticəsində tələf olurlar. Xruşov da erməni yalanına uyaraq göstəriş vermişdi ki, Arpaçayın bir qolu Sevan gölünə yönəldilsin. Qızıl balığın dadına aldanan Xruşovun verdiyi qərar nəticəsində Azərbaycanın qədim çaylarından olan Arpaçayın bir axarı Sevana axmağa başladı.
Ermənilər Xruşova qarşı oynadıqları bu oyunu indi də BMT təsisatı olan UNESCO-ya qarşı oynamaq istəyirlər. Onlar “Sevanda yaşıllaşma başlayıb” deyə car çəkməklə dünya ictimaiyyətinin başına corab hörməyə çalışırlar. Əlbəttə, burada məqsəd Ermənistanın bu qurumdan pul qoparmaq cəhdi olsa da, daha böyük məqsəd də diqqətdən yayınmır. Ekspertlərin bildirdiyinə görə, Ermənistan Sevana status almaqla bu gölün ermənilərə məxsus olduğunu təsdiqlətmək istəyir.
“Xruşov isə ermənilərin o vaxtkı müraciətini araşdırmadan...”
Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, Göyçə gölü XX əsrin sonlarına qədər ətrafında azərbaycanlıların məskunlaşdığı, Cənubi Qafqazda ən iri göllərdən biridir. Q.Hacıyevin sözlərinə görə, Göyçə gölü tarixən bizə məxsus olub və azərbaycanlılar dədə-baba yurdlarından, Qərbi Azərbaycandan ermənilər tərəfindən deportasiya edildikdən sonra isə digər dəyərlərimiz kimi, bu gölə də bədnam qonşularımız yiyələnmək istəyiblər. “Ermənilərin saxtakarlığı, məkrli niyyətləri bütün dünyaya məlumdur. Bu gün Ermənistan UNESCO ilə əməkdaşlıq etmək, bu beynəlxalq təşkilatın ayırdığı vəsaitlərdən yararlanmaq üçün özünü yüz şəklə salır. Göyçə gölü tarixi Azərbaycan torpaqlarında yerləşir və bu göl birbaşa bizə aiddir. Ermənistanın UNESCO-dan bu gölə status verməsini istəməsi, bu barədə sözügedən quruma müraciət etməsi əsassızdır. Mən inanmıram ki, ermənilər Xruşovu aldatdıqları kimi, BMT-ni və onun təsisatlarını da aldatmağa müvəffəq ola bilərlər. Çünki BMT və UNESCO onlara edilən hər bir müraciəti daha dərindən, ətraflı şəkildə araşdırırlar. Xruşov isə ermənilərin o vaxtkı müraciətini araşdırmadan Arpaçayın bir qolunun Sevana birləşdirilməsi barədə kor-koranə qərar qəbul etmişdi. Onlar Xruşovu çox asanlıqla aldada bildilər, çünki onun ətrafındakı erməni şəbəkəsi bütün vasitələrdən istifadə edərək keçmiş SSRİ rəhbərini öz istəklərinə alət etməyi bacardı.
Hesab edirəm ki, Ermənistan Sevan məsələsində BMT-ni aldadıb öz toruna sala bilməyəcək. Ona görə ki, artıq ermənilərin bütün saxtakarlıqları beynəlxalq ictimaiyyətə gün kimi aydındır. Vaxtilə ermənilər Arpa və Araz çaylarına qarşı saysız təxribat törədiblər. Göyçə gölündə yaşıllaşmanın başlanmasına gəlincə, bunlar hamısı Ermənistanın oyunlarıdır. Göyçə gölündə bataqlıq yaranıbsa, gölü mamır tutubsa, bu, Ermənistanın Metsamor Atom Elektrik Stansiyasının, Razdan Elektrik Stansiyasının təhlükə yayması ilə bağlıdır” - deyə Q.Hacıyev qeyd etdi.
İradə SARIYEVA
