Türkiyənin Ali Seçki Komissiyası (YSK) hakim AKP martın 31-də İstanbulda keçirilmiş bələdiyyə seçkilərinin nəticələrinin ləğvi ilə bağlı müraciətinə baxıb.
Baki-xeber.com Türkiyə mediasına istinadən xəbər verir ki, YSK İstanbulda seçkilərin təkrar keçirilməsinə qərar verib. Komissiya 11 üzvündən 7-si lehinə, 4-ü isə əleyhinə səs verib.
Hazırda İstanbul bələdiyyəsinin sədri olan CHP-nin namizədi Əkram İmamoğluna verilmiş mandat da ləğv edilib.
Təkrar seçkilər iyun ayının 23-də keçiriləcək.
Qərara sərt reaksiya verən Əkram İmamoğlu hakim partiya məğlub olduqdan sonra təzyiqlərə başladıqlarını, YSK-nın da buna baş əydiyini deyib. “Eyni qaydalarla prezident seçildi, konstitusiya təsdiqləndi, onda bu iki seçkidə də saxtakarlıq olub...” – İmamoğlu bildirib.
Xalqa müraciət edən İmamoğlu onları ümidlərini itirməməyə çağırıb. Hər şey yaxşı olacaq deyən İmamoğlu mübarizəni davam etdirəcəyini bildirib: “Biz gülər üzlə, ümidlə haqqımızı alacağıq. Mən bu şəhərin 16 milyon əhalisinə güvənirəm” .
YSK-nın qərarından məmnun AKP-nin seçki komissiyasındakı nümayəndəsi Receb Özəl yenidən keçiriləcək seçkidə xalqın seçiminə hörmətlə yanaşacaqlarını deyib. MHP də qərarı məmnuniyyətlə qarşıladıqlarını açıqlayıb.
Müxalif CHP sədrinin köməkçisi Onursal Adıgözəl isə qərarın heç bur hüquqa əsaslanmadığını deyib. Ankara bələdiyyəsinin CHP-li sədri Mənsur Yavaş isə “İstanbulda haqq öz yerini tutacaq” mesajını paylaşıb.
CHP İstanbul millət vəkili Mehmet Bekaroğlu da Twitter-dən YSK qərarını biabırçılıq adlandırıb.
İzmir bələdiyyəsinin sədri Tunç Soyer isə Türkiyədə başlayan dəyişiklikləri heç bir gücün dayandıra bilməyəcəyini bildirib.
Qeyd edək ki, YSK-nın qərarının ardından hakim AKP-də də, CHP-də də fövqəladə iclası çağırılıb.
