Avropa Parlamentinə daxil əsas partiyalar ABŞ prezidenti Donald Trampın Avropa İttifaqında xüsusi elçilik vəzifəsinə mümkün namizədinin bloklanması üçün misli görünməmiş cəhd edir.
"The Guardian" yazır ki, bir çox avropalı siyasətçi bu şəxsi aqressiv və qərəzli adam kimi tanıdıqlarını bildirir. Brüsseldəki əsas siyasi partiyaların üzvləri - mühafizəkarlar, sosialistlər və liberallar Avropa Komissiyasına və Avropa Şurasına müraciət edərək Ted Mellokun elçiliyini rədd etməyə çağırıblar.
Biznesmen Mellok Britaniyanın Avropa İttifaqından çıxmasını qızğın dəstəkləyib. BBC müxbirinin Avropa İttifaqında səfirlik vəzifəsinə necə baxdığı barədə sualına cavabında Mellok Sovet İttifaqında səfir işlədiyini vaxtları xatırladıb. O deyib ki, indi daha bir ittifaqın ipini yığmağın vaxtıdır. O deyib ki, Tramp "fövqəlmilli və seçkisiz" Avropa İttifaqını xoşlamır və Jan Klaud Yunker özünün Lüksemburq şəhərindəki mer kürsüsünə qayıtsa yaxşı olar.
Mərkəz sağçı EPP-nin lideri Manfred Veber Melloku Avropa İttifaqının dəyərlərinə "hiddət doğuran qərəz" nümayiş etdirməkdə günahlandırıb. "The Guardian" qəzetinin əldə etdiyi məktubda siyasətçilər cənab Yunkeri və Avropa Şurasının başçısı Donald Tusku Ted Mellokun missiyasını qəbul etməməyə çağırıblar. Siyasətçilər arasında onun, xüsusilə də Sovet İttifaqı ilə Avropa İttifaqını müqayisə etməsi hiddət doğurub.
Sosialist və demokratların qrup rəhbəri Qianni Pittellanın məktubunda isə Avropa İttifaqından bu şəxsin indidən "persona non-qrata" elan edilməsi istənir. Məktubda deyilir ki, Mellok Avropa ilə ABŞ administrasiyası arasındakı münasibətlərə sağalmaz yara vura bilər.
"The Guardian" yazır ki, hər hansı ölkənin Avropa İttifaqına səfiri Avropa Komissiyasının və Avropa Şurasının rəsmi etimadını qazanmalıdır. Mühafizəkarların və liberaların məktubunda isə deyilir ki, "məqsədi Avropa İttifaqını dağıtmaq olanlara akkreditasiya verilməməlidir".
TAHİR
