ABŞ Maliyyə Nazirliyi sabiq prezident Barak Obamanın Rusiya Federal Təhlükəszlik Xidmətinə (FSB) tətbiq etdiyi bəzi maliyyə sanksiyalarını yumşaldıb. Baki-xeber.com xəbər verir ki, bu barədə məlumat ABŞ Maliyyə Nazirliyinin saytında yerləşdirilib.
Nazirliyin saytında bildirilir ki, bu ölçü informasiya texnologiyası məhsullarına şamil edilir. Bu sənəd informasiya texnologiyaları şirkətlərinə Rusiyadan müəyyən informasiya texnologiyalarının idxalına, paylaşılmasına və onlardan istifadəyə icazə verir. Lakin qoyulmuş şərtə görə, FSB tərəfindən verilmiş lisenziyaların alınmasına il ərzində 5 min dollardan çox ödənməməlidir. O da bildirilir ki, FSB-yə və ya onun adından mal və texnologiyaların ixracı, təkrar ixracı və ya verilməsinə icazə verilmir.
Belə texnologiyaların Rusiyadan alınmasını ötən derkabrın sonlarında Obama qadağan etmişdi. Obamanın bu addımı onun sərəncamında deyildiyinə görə ABŞ kəşfiyyatının Rusiyanın ABŞ seçkisinə haker müdaxiləsi etdiyi barədə gəldiyi nəticə ilə bağlı idi.
Bu qərar FSB və Rusiyanın başqa təhlükəsizlik xidmətlərinin Donald Trampın qalib gəldiyi seçkiyə müdaxiləsinin araşdırma altında olduğu bir vaxtda verilib. Özünün seçki kampaniyası zamanı Tramp bəyan edirdi ki, Ukrayna və Suriya münaqişələrinə görə, korlanmış ABŞ-Rusiya münasibətlərinin yaxşılaşdırılmasını istəyir.
Nyu Yorkda mənzillənmiş “Horizon Client Access” konsaltinq firmasının sanksiyalar üzrə eksperti Sam Kutler “Azadlıq radiosu”na deyib ki, sanksiyaların ABŞ şirkətlərinə kömək məqsədi ilə yumşaldıldığını düşünmək olar.
Ağ Evin sözçüsü Şon Spayser isə bildirib ki, bu addım ABŞ-ın Rusiyaya qarşı sanksiyalarını yüngülləşdirməsi demək deyil: "Biz sanksiyaları yüngülləşdirmirik. Maliyyə Nazirliyinin bu qərarı adi bir praktikadır. Nazirlik sanksiyaların tətbiqindən sonra spesifik ölçülər üçün idxal və ixrac olunan malları nəzərdən keçirməlidir".
Ağ Evdən verilən açıqlamaya görə, FSB-yə qarşı sanksiyalara dəyişiklikləri dəyərləndirən ABŞ prezidenti Donald Tramp, "Mən heç nəyi yüngülləşdirmədim" deyib.
