Bazar günündən başlanan atışma Ukraynada 10-dan çox adamın ölümünə səbəb oldu, onlarla yaralı var. Münaqişə ölkənin şərqində, Avdeyevka və separatçıların nəzarətində olan Donetsk ətrafında qızışıb. Avdeyevka rəhbərliyi şəhərin humanitar fəlakətlə üzləşdiyini deyib.
Baki-xeber.com "Azadlıq radiosu"na istinadən xəbər verir ki, Donetskdəki qiyamçılar şəhəri "Qrad"lardan atəşə tutub, döyüşlər əraziyə göndərilən humanitar yardımın yolunu kəsib. Münaqişəni hansı tərəfin alovlandırdığı bəlli deyil. Kiyev separatçıların arxalandığı Moskvanı, Moskva isə Kiyevi ittiham edir.
Bu arada "CBSNews" gözlərin ABŞ prezidenti Donald Tramp administrasiyasına dikildiyini, yeni rəhbərliyin necə təpki göstərəcəyinin maraqla izləndiyini yazır. Çünki D.Tramp seçki kampaniyası zamanı ruslarla münasibəti yoluna qoyacağına söz vermiş, Krım məsələsinə yenidən baxacağını söyləmişdi. "ABC News"a müsahibəsində D.Tramp demişdi ki, onun eşitdiyinə görə, krımlılar Ukraynadansa Rusiyanın tərkibində olmağa üstünlük verir, ona görə də məsələyə yenidən baxmalıdır. Sonucda onun qalibiyyəti ölkənin gələcəyindən qorxan Ukrayna siyasətçilərini məyus etmişdi. Amma D.Tramp administrasiyası, deyəsən, Ukraynanı müdafiə etdi. Fevralın 1-də Nyu-Yorkda keçirdiyi mətbuat konfransında Ukraynanın BMT-dəki təmsilçisi Volodimir Yelçenko deyib ki, ABŞ onların ərazi bütövlüyünü tam dəstəkləyir və Rusiyanın Krımı ilhaq etməsilə heç vaxt razılaşmayacaq.
Vaşinqtonun Ukrayna ilə bağlı mövqeyini V.Yelçenkoya ABŞ-ın BMT-dəki səfiri Nikki Haley çatdırıb. Onlar Nyu-Yorkda görüşüblər və V.Yelçenkonun dediyinə görə, ABŞ təmsilçisinin Ukrayna haqda dedikləri onu tam razı salıb. O, ABŞ-ın Rusiya ilə münasibətlərini yoluna qoysa belə, bunu Ukraynanın hesabına etməyəcəyinə əminliyini vurğulayıb.
İki il öncə əldə edilən Minsk razılaşması Ukrayna və Rusiyanın münaqişə bölgəsindəki ağır silahlarını geri çəkməsini, məsələni sülh yolu ilə həll etməsini nəzərdə tutur. Ancaq atəşkəsə heç vaxt tam əməl olunmur, separatçılarla cəbhə xəttində ara-sıra atışmalar baş verirdi.
İndi isə münaqişəni, Moskvanın dediyinə görə, Kiyev, həm də bilərəkdən qızışdırıb. Rusiya prezidenti Vladimir Putinin xarici məsələlər üzrə müşaviri Yuri Uşakov deyir ki, Kiyevin məqsədi Minsk anlaşmasından imtina etməyə bəhanə tapmaqdır. Amma "CBS News" yazır ki, Moskva separatçıların gücünü göstərməklə Vaşinqtona ismarış göndərir, regionda nüfuzunu saxladığını, Ukraynada sülh istəyənlərin Moskvaya güzəştə getməli olduğunu bildirmək istəyir.
Kremlin sözçüsü Dmitri Peskov isə deyib ki, münaqişənin qızışması Rusiya ilə Amerika arasında dialoqun tezliklə bərpası üçün bəhanə ola bilər.
NATO-nun baş katibi Jens Stoltenberg-in sözlərinə görə isə, son bir neçə gündə Ukraynanın şərqində atəşkəs azı 5 min 600 dəfə pozulub. Elektrik enerjisinin kəsilməsi soyuqda 20 min adamı işıqsız qoyub. J.Stoltenberq Rusiyanı separatçılar üzərindəki nüfuzundan istifadə etməyə, atəşi dayandırmağa çağırıb.
"CBS News" bildirir ki, fevralın 1-də atışma dayanıb, tərəflər elektrik enerjisi və su təminatını bərpa etmək barədə razılığa gəliblər.
Bu tərəfdən Ukrayna prezidenti Petro Poroşenko ölkəsinin NATO-ya qoşulması məsələsini səsverməyə çıxarmağa hazırlaşdığını bəyan edib: "4 il öncə Ukraynada əhalinin cəmi 16%-i ölkənin NATO-ya qəbul edilməsini istəyirdi, indi bu göstərici 54%-ə çatıbE Prezident olaraq, mən xalqımın baxışlarına uyğun hərəkət etməliyəm. Buna görə də NATO-ya üzvlük məsələsini referenduma çıxaracağam".
P.Poroşenko xalq səs verərsə, ölkəsinin transatlantik alyansa qoşulmasından ötrü əlindən gələni edəcəyinə söz verib.
Ukrayna NATO ilə 1990-cı illərdən əməkdaşlıq edir. Ancaq üzvlük, politoloqların fikrincə, Rusiya ilə gərginliyi artıra bilər.
