ABŞ Dövlət Departamentinin yüzlərlə rəsmisinin Donald Trampın qaçqın qadağasına qarşı etirazı qiyam şəklini alır. Baki-xeber.com BBC-yə istinadən xəbər verir ki, "The Guardian" qəzeti bu barədə məlumat yayıb.
Diplomatların imzaladıqları memorandumda deyilir ki, "biz bu qadağanı ölkəmizə yaraşdırmırıq". Sənəddə vurğulanır ki, miqrantların ABŞ-a gəlişinə qadağan qoyan sərəncam ölkə Konstitusiyasına ziddir və tamamilə əks-reaksiyaya səbəb olacaq.
Memorandum Dövlət Departamentinin "fərqli mövqe kanalı" vasitəsilə dövriyyə edilib. Bu kanaldan vaxtilə Vyetnam müharibəsinə etiraz edən diplomatlar istifadə etmişdilər.
ABŞ xarici işlər təlimatına görə, "fərqli düşünənlərə" qarşı cəzalandırma tədbirləri görülə bilməz. Ağ Evin sözçüsü Sean Spicer memonu imzalayanların istefa verməli olduqlarını bildirib. Sözçü deyib ki, onlar ya "bu proqramla" razılaşmalı, ya da vəzifələrindən getməlidirlər.
Diplomatların imzaladıqları memoda deyilir ki, kiçik sayda qanunsuz miqrantı aşkar etmək üçün 200 milyon qonağın üzünə qapı bağlamaq amerikalıların imicinə kölgə salır.
ABŞ Dövlət Departamentinin rəhbərliyinə ildə beş-altı fərqli düşüncə memosu daxil olur və onlar adətən məxfi saxlanır. ABŞ-ın “Foreign Policy” məcmuəsinin bildirdiyinə görə, etiraz memosunu 200-dək diplomat imzalayıb. Departamentin sözçü əvəzi Mark Toner memonun daxil olduğunu təsdiq edib. Toner deyib ki, diplomatların məktubuna ehtiram nümayiş etdirilməlidir.
Sonuncu dəfə diplomatların belə kütləvi narazılığı Obamanın Suriya siyasəti ilə əlaqədar ifadə olunmuşdu. Ötən iyunda bu sənədi 50 diplomat imzalamışdı. Lakin həmin memo Obama hakimiyyətinin sonlarında yazılmışdısa, Trampa etiraz memosu inaqurasiyadan bir neçə gün sonra verilib.
"Biz təhlükəsizliyimizi qorumaq xatirinə bütöv cəmiyyətləri özümüzdən incik sala bilmərik" - deyilir memoda.
Elə həmin gün ABŞ xarici siyasəti və milli təhlükəsizliyinin 100-dək keçmiş əməkdaşı Dövlət Departamentini vurulmuş ziyanı aradan qaldımağa, Ağ Evi isə fərmanı geri götürməyə çağırıb.
“Human Rights Watch” təşkilatının əsasını qoyanlardan Aryeh Neierin qəzetdə dərc edlən məqaləsində isə qadağa siyahısında Səudiyyə və Misirin adının olmamasına xüsusi diqqət çəkilir. Müəllif belə bir sual verir: Görəsən Trump özünün müsəlman qadağanına Səudiyyə Ərəbistanından və Misirdən olan miqrantları niyə daxil etməyib, halbuki 11 sentyabr terror basqınlarını törədənlərin demək olar hamısı Səudiyyədən idi. "40 il azadlıqlar uğrunda mübarizədə" kitabının müəllifi şübhə edir ki, bəlkə də Tramp zəngin səudlarla biznes sövdələşmələri barədə düşünür.
Məqalədə deyilir ki, vətəndaşlarına qadağan qoyulmayan başqa bir müsəlman ölkəsi də Misirdir.
Müəllif bunun Trampın Misir lideri general Abdel Fəttah əl-Sisi ilə yaxşı münasibətlər qurmaq arzusundan irəli gəlib-gəlmədiyini sual edir: "Biz bunları bilmirik, lakin o özünün vergi ödənişi kağızlarını açmaqdan imtina etməklə belə suallara yol açır".
