Britaniyanın xarici işlər naziri Boris Conson ölkəsinin Suriya siyasətinin dramatik şəkildə dəyişdiyinin siqnalını verib. O deyib ki, Suriyada sülh bərqərar edilərsə, hazırkı prezident Bəşər Əsədə təkrar seçkiyə namizəd kimi qatılmaq imkanı yaradılmalıdır. Baki-xeber.com xəbər verir ki, bu barədə "The Guardian" qəzet yazır.
Bundan əvvəl Londonun tələbi Bəşər Əsədin hakimiyyəti dərhal tərk etməsi idi. Britaniya liderləri bildirirdilər ki, Əsəd hakimiyyətdə qaldıqca Suriyada sülhün bərqərar edilməsi mümkün olmayacaq.
Britaniya baş naziri Teresa Meyin ABŞ-da prezident Donald Trampla danışıqları ərəfəsində Lordlar palatasının beynəlxalq əlaqələr komitəsində danışan xarici işlər naziri etiraf edib ki, Trampın prezident seçilməsi bütün tərəflərin öz mövqeləri barədə yenidən düşünmələrini tələb edir.
"Bu bizim mövqeyimizdir ki, Əsəd getməlidir. Bu, uzun müddət bizim mövqeyimiz olub. Lakin biz bu gedişin necə və hansı vaxt kəsimində baş verməsi barədə real düşünməliyik." - deyib B.Conson.
Nazir bildirib ki, Suriyada hərbi-siyasi mənzərənin dəyişdiyi nəzərə alınmalıdır: "Düzünü desəm, köhnə siyasət etimad doğrultmur".
"The Guardian" yazır ki, "dəyişən mənzərə" dedikdə xarici işlər nazirinin müxalifətin Hələbdəki məğlubiyyətini, Trampın Rusiya ilə münasibətləri yenidən qurmaq əzmini və Türkiyənin Moskva ilə yaxınlaşmasını nəzərdə tutduğunu düşünmək olar. O deyib ki, biz uzun müddət "Əsədin getməli olduğunu mantra kimi təkrarlasaq da, bu, baş verməyib".
Conson onu da əlavə edib ki, Tramp administrasiyasının Suriyaya dair Rusiya ilə hər hansı anlaşmasında Əsədin ikinci müttəfiqi İran da yer almalı olacaq. Bununla belə, Johnson onu da bildirib ki, İranın regiondakı hegemonluğunun artmasını istəməzdi.
Conson hələ bir neçə həftə bundan əvvəl ağıla belə gəlməyəni də deyib. O bildirib ki, Britaniya özünü İslam Dövləti adlandıran qrupun məğlub edilməsində Rusiya ilə əməkdaşlıq edə bilər. O deyib ki, belə əməkdaşlıq, sonunda Əsədin vəzifədən getməsini və İranın nüfuzunun daha geniş əraziyə yayılmamasını nəzərdə tutmalıdır: "Rusiya ilə danışmaq lazımdır, biz onları daim özümüzdən kənara itələyə bilmərik".
"Biz mütləq bilməliyik ki, Ağ Evin istədiyi nədir. Biz burada oyunun necə başa çatacağını bilməliyik. Biz bu söhbətin formalaşmasında iştirak etməliyik və xüsusilə də İran kimi narahatlıqlarımızı çatdırmalıyıq" - deyib Britaniya xarici işlər naziri.
Suriyanın paytaxtı Dəməşqdə Bəşər Əsədlə görüşən ABŞ Konqresinin demokrat üzvü Tulsi Qabbard da bəyan edib ki, Vaşinqton problemin həllü üçün Əsədlə bir masa arxasında oturmalıdır. ABŞ və Suriya arasında dialoqun vacibliyini vurğulayan konqresmen, "Əsəd haqqında nə düşünürsüz düşünün, Əsədin Suriyanın dövlət başçısı olduğu bir gerçəklikdir. Sülh razılaşması üçün Əsədlə danışmaq məcburiyyətindəyik" – deyə bildirib.
