ABŞ əks-kəşfiyyat idarəsi prezidenti Donald Trampın milli təhlükəsizlik məsələləri üzrə müşaviri general Maykl Flinnin Rusiya rəsmiləri ilə əlaqələrini araşdırır. Baki-xeber.com xəbər verir ki, bu barədə «The Wall Street Journal» qəzeti mənbələrə istinadən xəbər yayıb.
“Wall Street Journal” adı açıqlanmayan mənbələrə istinadən, Flinnin Rusiyanın rəsmi şəxsləri ilə təmaslarının araşdırıldığını, ancaq ABŞ kəşfiyyatının istintaqa nə vaxt başladığı, bununla bağlı dəlillər tapıb-tapmadığı və istintaqın hələ də davam edib-etməməsilə bağlı dəqiq bir məlumat olmadığını yazır.
Kəşfiyyat Flinnin Rusiya rəsmilərilə görüşlərinin şərtlərini və bu əməkdaşlığın qanunlara zidd olub-olmadığını ortaya çıxarmağa çalışır. Qəzet müşavirin xüsusilə Rusiyanın Vaşinqtondakı səfiri Sergey Kislyakla və başqa rus səlahiyyətlilərlə təmaslarını araşdırdığını yazır.
Qəzetin yazdığına görə, kəşfiyyat dekabrın 29-da müşavirin səfir Sergey Kislyaka dəfələrlə zəng etdiyini öyrənib. Həmin gün keçmiş prezident Barak Obama Rusiyaya yeni sanksiyalar qoymuş, 35 rus diplomatının ölkədən qovulması haqda qərar çıxarmışdı. Obama administrasiyası bu qərarın Rusiyanın ABŞ-da seçkilərə müdaxiləsinə cavab olduğunu bildirirdi.
Məsələdən xəbəri olanlar ABŞ rəsmilərinin M.Flinnlə S.Kislyakın ünsiyyətinin sonralar da təkrarlanması haqda bilgi əldə etdiklərini deyirlər.
Flinnin Kislyakla görüşdüyü barədə xəbərlər əvvəllər də mətbuatda yer almışdı. Rusiya səfirliyi isə bəzi ABŞ siyasətçilərinin tənqidlə qarşıladığı məsələyə hər hansı şərh verməkdən imtina etmişdi.
ABŞ Prezident Administrasiyasının sözçüsü Sara Sanders isə araşdırmadan xəbərdar olmadıqlarını deyib. O, belə bir tədqiqat aparılsa belə, buna nəyin səbəb olduğunu anlamadığını söyləyib.
«The Wall Street Journal» yazır ki, M.Flinn Ağ Ev daxilində ilk şəxsdir ki, kəşfiyyat idarələrinin araşdırması ilə üzləşir.
Onu da qeyd edək ki, ABŞ-ın Federal Tədqiqatlar Bürosu (FBI), Mərkəzi Kəşfiyyat İdarəsi (CIA) və Milli Təhlükəsizlik Agentliyi Rusiyanın Trampın seçilməsinə yardım edib-etmədiyini müəyyələşdirməkdən ötrü bir neçə şəxslə bağlı birgə tədqiqat aparır.
