Yeni ABŞ administrasiyası Astanada keçiriləcək Suriya danışıqlarına dəvət edilə bilər. Baki-xeber.com xəbər verir ki, bu barədə Rusiya xarici işlər naziri Sergey Lavrov açıqlama verib.
Lavrov deyib ki, Tramp rəhbərliyi Astanadaki Suriya sülh danışıqlarına dəvət edilməlidir.
"Rusiya və Tramp rəhbərliyinin Suriyada, Obama rəhbərliyinə nisbətən daha çox əməkdaşlıq etməsini ümid edirəm. Rusiya, Trampın beynəlxalq terrorizmlə mübarizəni prioritet olaraq görməsini xoş qarşılayar. Tramp administrasiyasının Astanadaki sülh danışıqlarına dəvət edilməsinin doğru olacağını düşünürəm. Onların da bu dəvəti qəbul edəcəyini ümid edirəm" – deyə Lavrov bildirib.
"Rusiya, Türkiyə və İran imzalanan atəşkəs razılaşmasının qarant olaraq Astanada keçiriləcək danışıqlara BMT və ABŞ-ın yeni rəhbərliyinin nümayəndələrini dəvət etməyi düşünürük. ABŞ-ın yeni rəhbərliyinin mütəxəssis səviyyəsində danışıqlara qatılmasını gözləyirik, bu da bizim ilk təmasımız olacaq".
Lavrov bəzi Avropa ölkələrinin Astana danışıqlarını pozmağa çalışdıqlarını deyib.
Tramp administrasiyasına yaxın mənbə isə bildirib ki, ABŞ-ın yeni seçilmiş prezidenti Donald Trampın komandası Astanada keçiriləcək Suriyaya dair danışıqlarda iştirak etməklə bağlı rəsmi dəvət alacağı təqdirdə bu dəvəti nəzərdən keçirəcək. Mənbənin məlumatına görə, Tramp administrasiyası rəsmi dəvət alarsa, onu nəzərdən keçirəcək, lakin Suriya böhranı ilə bağlı ABŞ-ın aydın yanaşması formalaşana qədər heç bir danışıqlarda iştirak etməyəcək.
Rəsmi Tehran isə Astanada keçiriləcək Suriya danışıqlarında ABŞ-ın iştirakına qarşı çıxır. Belə bir bəyanatla İranın xarici işlər naziri Cavad Zərif çıxış edib.
"Biz ABŞ-ı bu danışıqlara dəvət etməmişik və bu ölkənin görüşdə iştirakının əleyhinəyik" - C.Zərif deyib.
Müxalif qüvvələrə döyüşlərdə rəhbərlik edən şəxslərin Astanadaki danışıqlara qatılacağını ifadə edən Lavrov isə qeyd edib ki, Suriya sülh danışıqları indiyə qədər həmişə müvəffəqiyyətsiz oldu: “Çünki müxalifət geniş bir şəkildə yalnız siyasi miqrantlar tərəfindən təmsil edilirdi. Onlar döyüşlərdə olan insanlar deyildi. Astana danışıqlarına müxalifətlərə döyüşlərdə liderlik edən şəxslər qatılacaq".
Lavrov Rusiyanın Suriyaya müdaxiləsinə də haqq qazandırıb. Onun sözlərinə görə, Rusiya Suriya münaqişəsinə müdaxilə etməsəydi, paytaxt Dəməşq 2-3 həftə ərzində terrorçular tərəfindən tutulacaqdı: “Suriya hökumətinin qanuni xahişi əsasında bizim Suriya məsələsinə müdaxiləmiz düzgün addım oldu. Bu, BMT qətnamələrinin tələb etdiyi kimi, Suriyanın çoxmillətli və çoxkonfessiyalı qalmasına imkan verdi".
Lavrovun sözlərinə görə, BMT-nin Suriyaya dair qətnamələrinin yerinə yetirilməsini istəməyənlər cinayət törədirlər.
