Cümə günü ABŞ-ın yeni prezidenti seçilmiş Donald Trampın inauqurasiyasında iştirak etməyəcəklərini bildirən demokratların sayı 26-ya çatıb.
Bir çoxları bunun səbəbi kimi prezident seçilənin bu yaxınlarda insan haqları mücəsəmməsi sayılan konqresmen Con Levisə tənqid hücumunu göstərirlər. Levis onun "legitim prezident olmadığını" deyəndən sonra Tramp konqresmenin üstünə tvit tənqidləri yağdırıb. O deyib ki, Levis "yalnız danışmağı bacarır və heç bir iş görmür".
Levis Amerika insan haqları hərəkatının görkəmli nümayəndəsidir və amerikalıların bir çoxu onu qəhrəman hesab edirlər. O 1965-ci ildə səs hüququ tələb edən bədnam Selma-Montgomery yürüşü zamanı polis tərəfindən döyülənlərin arasında olub. O 1987-ci ildə Nümayəndələr Palatasına seçilib və o vaxtdan bəri Georgia ştatının 5-ci konqres dairəsində deputat kimi çalışır.
Tramp bunu da deyib ki, həmin dairə başdan-başa "cinayətkartlıq içindədir".
Martin Luther Kinq Günü ərəfəsində səslənmiş bu təhqir demokratların bir çoxu üçün səbr kasasını daşdıran son damla olub. Onlar ənənəni pozaraq cümə günü keçiriləcək inaqurasiya mərasiminə qatılmayacaqlar.
"Respublikaçı Levisin təhqiri Amerikanın təhqiri deməkdir" - deyib Nyu-Yorkun beş millət vəkilindən biri Yvette Clarke.
Kaliforniya deputatı Ted Lieu deyib: "Mənim üçün inaqurasiyada iştirak etməmək qərarı şəxsi mənada sadə qəbul olunub: Mən Donald Trampın yanındayam, yoxsa Con Levisin? Mən Levisin yanındayam."
Illinois nümayəndəsi Luis Qutierrez inaqurasiyanı boykot edəcəyini hələ dekabr ayında elan etmişdi. "Mən ora getsəm, gərək sonra arvadımın, qızlarımın, nəvəmin gözlərinə baxa bilməyim. Onda belə çıxar ki, namizədin qadınlar, latinolar, qaralar, müsəlmanlar və başqaları haqqında dediklərini, tivitlədiklərini bizim kollektiv yaddaşımızdan silmək olar" - deyib Qutierrez Konqresdə.
O, deyib ki, o inaqurasiyanın ertəsi günü qadınların alternativ olaraq Vaşinqtonda keçirəcəkləri yürüşə qoşulacaq.
Levis özünün boykot qərarını NBC News kanalına müsahibəsində bildirib. O deyib ki, Tramp qeyri-legitim prezidentdir. Onun bu bəyanatı Trampı özündən çıxarıb.
Trampın andiçmə mərasimi son 30 ildə Levisin qatılmadığı ilk inaqurasiya olacaq. Georgia konqresmeni deyib ki, Trampı legitim hesab etməməsinin səbəblərindən biri də Rusiyanın seçkiyə iddia edilən müdaxiləsidir. "Sən yanlış olduğuna inandığın bir şeylə yaşaya bilməzsən" - deyib konqresmen NBC News kanalına.
Trampın tənqidlərindən sonra cənab Levisin memuarlarının satışı Amazondakı Amerika bestsellerləri siyahisinda birinci yerə qalxıb vıə kitabın bütün nüsxələri satılıb qurtarıb. Levis Orlando şəhərində baş vermiş qətliamın ardınca, ötən iyul ayında silahlara nəzarət haqqında qanunvericilik aktı üzrə səsvermə tələb edirdi. Respublikaçılar oturaq etirazın qarşısını almaq üçün erkən iclas keçirərək bütün televiziya kameralarını söndürmüşdülər, lakin C-Span şəbəkəsi etirazın canlı yayınını bəzi demokratların telefonlarından ala bilmişdi.
Massachusetts ştatından nümayəndə Katherine Klark Levisin etiraz aksiyasına qoşulan birincilərdən idi. Xanım Klark ötən həftə bildirib ki, Trampın inaqurasiyasına getməyəcək.
Onun bəyanatında deyilir ki, "mənim dairəmin insanları Tramp kampaniyasındakı antiqadın, antimiqrant və antimüsəlman vədlərin siyasətə çevrilərək adamların rifahina və təhlükəsizliyinə zərbə vuracağından narahatdırlar".
"Mən düşünmürəm ki, prezident seçilmiş bu şəxsin bölücü ritorikasından sonra vəziyyətin normallaşdırılması məqsədilə inaqurasiyada iştirak edə bilərəm" - deyib xanım Klark.
Tramp onun komandasının çox geniş axtarışlarına baxmayaraq inaqurasiya mərasimi üçün az-çox babat musiqiçilər tapmaqda çətinliklə üzləşib.
İndi bu tədbirdə America's Got Talent verilişinin yarışçılarından 16 yaşlı Jackie Evancho, hərbi orkestr və Radio City Rockettes iştirak edəcəklər. Rockettes truppasının bəzi üzvləri də etiraz əlaməti olaraq tədbirə qatılmayacaqlar.
Bəzi məşhur musiqiçilər də andiçmədə iştirakdan imtina edib.
