Serbiya qonşu Kosovoda öz ərazisi kimi iddia etdiyi torpağın hər qarışını qoruyacağı barədə xəbərdarlıq edib.
Serb bayrağının rəngləri ilə rənglənmiş və üzərində "Kosovo Serbiyadır" cümləsi yazılmış qatar Kosovo sərhədindən buraxılmadıqdan sonra prezident Tomislav Nikoliç Kosovonu müharibə istəməkdə ittiham edib.
Kosovo bu qatarı məqsədyönlü təxribat kimi görür.
Gərginlik artan kimi Nikoliç bildirib ki, o lazım gəlsə, serbləri qorumaq üçün Kosovoya ordu göndərməyə hazırdır. Kosovo tarixən Serbiyanın bir əyaləti olub və 2008-ci ildə müstəqilliyini elan edib. ABŞ və əksər Avropa İttifaqı ölkələri tərəfindən tanınan Kosovonun müstəqilliyi Serbiya və onun müttəfiqi Rusiya tərəfindən qəbul edilmir.
Serbiya tərəfindən mühüm nəqliyyat vasitəsi kimi qəbul edilən qatar 2008-ci ildən Serbiyanın paytaxtı Belqrad və Şimali Kosovodakı Mitroviça arasında ilk birbaşa əlaqə olub.
Kosovoda serblərin əksəriyyəti Mitroviça ətrafında yaşayır.
Serbiya bildirib ki, qatarda Serbiyanın milli rənglərinin istifadə edilməsi daxil olmaqla, qatarın içərisinin serb pravoslav simvolları ilə bəzədilməsi və bir çox dillərdə "Kosovo Serbiyadır" şüarının yazılması öz mədəni irsinin təntənəli qeyd edilməsidir.
Lakin Kosovonun baş naziri İsa Mustafa jurnalistlərə bildirib ki, qatar "ölkənin suverenliyini qorumaq" üçün dayandırılıb və Kosovo "işğal mesajı ilə təxribata səbəb olacaq" nəqliyyat vasitələrinə yol verməyəcək.
Kosovo qatarın sərhədi keçməsinin qarşısını almaq üçün sərhəd boyunca polis qüvvələri düzüb.
Serbiyanın baş naziri Aleksandar Vuçiç iddia edib ki, kosovolu qüvvələr yolları minalayaraq partlatmağı planlaşdırıb və "müharibə oyunları" oynayıb.
Hadisə gərginliyin artmasına, Kosovoda serblərin etiraz nümayişi keçirməsinə və Nikoliçin iki xalqın "münaqişə həddində" olduğunu deməsinə səbəb olub.
Serbiya ilə Kosovo arasında gərginlik onsuz da yüksək idi.
