Keçmiş Özbəkistan prezidenti İslam Kərimovun böyük qızı Gülnara Kərimova korrupsiya ittihamı ilə bağlı İsveçrə prokurorluğuna ifadə verib. Bu barədə Azadlıq radiosunun Özbəkistan xidməti “World Street Journal”a istinadla xəbər yayıb.
Mənbə vəkilə istinadla, sorğu-sualın Daşkəntdə aparıldığını bildirir. Gülnara Kərimova hazırda ev dustağıdır.
İsveçrəli vəkil Greguar Manjeanın məlumatına görə, prokurorlar onunla 2 dəfə - ötən il dekabrın 9 və 10-da görüşüblər və sorğu-sual ümumilikdə 23 saat çəkib.
Vəkil Gülnara Kərimovanın səhətinin yaxşı olduğunu, amma təhlükəsizliyinə təminat olmadığını bildirib. Onun sözlərinə görə, Gülnara ətraf aləmdən təcrid edilib, o cümlədən də uşaqlarından.
İsveçrə prokurorluğunun nümayəndəsi də təşkilatın əməkdaşlarının Özbəkistanda olmasını təsdiqləyib.
Gülnara Kərimova 2014-cü ildən ictimaiyyət arasında görünmür, atasının yasına belə buraxılmayıb.
Qeyd edək ki, İsveçrədə ona qarşı pulyuma əməliyyatı və korrupsiya ilə bağlı rəsmi ittihamlar irəli sürülüb. Onun, rüşvət müqabilində Özbəkistanda iş qurmaqda ittiham olunan bir sıra xarici şirkətlərlə bağlılığı olduğu bildirilir.
İsveçrə hakimiyyəti istintaq çərçivəsində onun 650 milyon dollarlıq bank hesablarını dondurub.
“World Street Journal” bunun Özbəkistanda həbs olunduqdan sonra Kərimova barədə ilk etibarlı məlumat olduğunu yazır.
