ABŞ prezidenti seçilmiş Donald Tramp deyib ki, o Rusiyanın nüvə silahlarını azaltmağa razılaşması müqabilində Moskvanın üzərindən bəzi iqtidsadi sanksiyaların qaldırılmasına dair prezident Vladimir Putinlə saziş əldə edə bilər.
Britaniyanın "The Times" və Almaniyanın “Bild” qəzetlərinə müsahibə verən Tramp deyib ki, Birləşmiş Ştatların və Rusiyanın nüvə arsenallarını "əhəmiyyətli dərəcədə" azaltmalarını istəyir.
Tramp bu müsahibədə həmçinin Moskvanın Suriya münaqişəsinə müdaxiləsini tənqid edib və deyib ki, bu "çox pis şeydir" və "dəhşətli humanitar vəziyyətə" səbəb olub.
Prezident seçilmiş Tramp həmçinin NATO-nu "nimdaş" adlandırıb və təşkilatı terrorla mübarizədə çox iş görmədiyinə görə tənqid edib, lakin deyib ki, alyans "mənim üçün çox mühümdür".
Tramp yenə də belə bir tənqidi təkrar edib ki, bir çox NATO üzvləri öz təhlükəsizlikləri üçün kifayət qədər pul ödəmirlər və onların maliyyə yükünü ABŞ çəkir. "Bir çox ölkələr ödəməli olduqları pulları ödəmirlər. Bu isə Birləşmiş Ştatlara münasibətdə ədalətsizlikdir" - deyib Tramp.
O əlavə edib ki, NATO-nun 28 üzvündən yalnız beşi öz öhdəlikləri üzrə üzvlük haqqı ödəyir.
Tramp Britaniyanın Avropa İttifaqından ayrılmaq qərarını tərifləyib və deyib ki, liberal miqrant siyasəti başqa ölkələrin də Aİ-dən çıxmasına səbəb ola bilər.
Almaniya kansleri Angela Merkelə "hörmətinin olduğunu" desə də, Tramp əlavə edib ki, xanım Merkel 2015-ci ildən bəri bu qədər sənədsiz miqrantı ölkəyə buraxmaqla "fəlakətli səhvə" yol verib.
Tramp bunu da bildirib ki, kürəkəni Jared Kuşneri Yaxın Şərq sülh sazişinin əldə olunması üçün vasitəçi təyin edəcək.
O kraliça 2-ci Elizabeti tərifləyib və bildirib ki, ABŞ tezliklə Britaniya ilə ticarət sazişi imzalayacaq və onun özü tezliklə baş nazir Tereza Mayla görüşəcək.
