ABŞ-ın yeni prezidenti Donald Tramp barədə ifşaedici dosyeni tərtib etmiş Britaniyanın Məxfi Kəşfiyyat Xidməti Mİ6-nın keçmiş zabiti onun kimliyi CNN və “Buzzfeed” tərəfindən açıqlandıqdan sonra yaşadığı evdən qaçıb. Baki-xeber.com xəbər verir ki, bu barədə "The Daily Telegraph" yazıb.
Qəzet yazır ki, keçmiş agent həyatının təhlükədə olmasından narahatdır. Qeyd edilir ki, adının tezliklə açıqlanacağını hiss edən 52 yaşlı Kristofer Stil Surreydəki evindən qaçıb. Onun yaxın çevrələrdən mətbuata bildirilib ki, keçmiş casus Moskvanın intiqamından qorxur.
1990-cı illərdə Moskvada Britaniyanın Məxfi Kəşfiyyat Xidməti üçün casusluq etmiş Stil Surreydəki evini tələm-tələsik tərk etməzdən əvvəl pişiyini qonşusuna tapşırıb və bir neçə günə qayıdacağını deyib. Onun arvadının və uşaqlarının da evdə olmadıqları xəbər verilir.
Qəzet yazır ki, keçmiş casus Moskvadakı mənbələrindən Trampın Kremllə əlaqələri barədə yığdığı məlumatları jurnalistlərlə paylaşmaqla təhlükəli oyuna girib.
"The Telegraph" yazır ki, Kremlin ABŞ seçkisində Trampın qalib gəlməsi üçün seçkini təsirləndirdiyini iddia edən 35 səhifəlik sənədi hazırlamış Stil Londonda mənzillənmiş Orbis Business Intelligence Ltd firmasının həmtəsisçilərindən biridir. Qəzet yazır ki, britaniyalının araşdırmalarını əvvəlcə anti-Trump respublikaçılar, sonradan isə demokratlar maliyyələşdiriblər.
Bəzi məlumatlara görə, Stil 20 il müddətində Mİ6 üçün Moskvada casus materialları toplayıb. 2009-cu ildə Mİ6-dakı xidmətini başa çatdırdıqdan sonra Stil özünün biznes partnyoru Kristofer Berrouzla Orbis Business Intelligence Ltd firmasını qurub. Şirkətin internet saytında deyilir ki, firma "Britaniya kəşfiyyatının keçmiş peşəkarları" tərəfindən yaradılıb.
58 yaşlı cənab Berrouz Burrows Orbisin sözügedən dosyeni tərtib edib-etməməsi barədə xəbəri nə təsdiq, nə də təkzib edib.
Bu arada Milli Kəşfiyyat İdarəsinin direktoru Ceyms Klapper kompromat iddialarını mediaya ABŞ kəşfiyyatının sızdırmadığını deyib. Klapper bəyanatda, ABŞ kəşfiyyatının Rusiyanın Trampı şantaj etməklə bağlı informasiyanın dürüst olduğuna dair qərar vermədiyini bildirib və o, Trampa deyib ki, bu məlumatın mediaya kəşfiyyat tərəfindən sızdırıldığına inanmır.
Qeyd edək ki, 35 səhifəlik sənəddə iddia edilir ki, Rusiyanın təhlükəsizlik xidmətləri Trampı şantaj etmək üçün materiala malikdirlər. İddiaları təkzib edən Tramp isə ilk mətbuat konfransında CNN-i "saxtakar", Buzzfeed saytını "zir-zibil qalağı", BBC-ni isə "daha bir gözəlçə" adlandırıb.
