Bir neçə gün əvvəl dəniz yolu ilə Almaniyanın Bremerhaven Limanına göndərilən ABŞ-ın 80-dən çox tank və minlərlə əsgəri Rusiya sərhədinə çatıb. Baki-xeber.com xəbər verir ki, Almaniya-Polşa sərhədinə çatan ABŞ hərbi birləşmələrinin ilk qrupu Zagan hərbi bazasına yerləşdiriləcək.
Rusiya təhdidinə qarşı bölgəyə göndərilən ABŞ əsgərləri ilk olaraq Polşada, daha sonra isə digər Baltik ölkələrində yerləşdiriləcək. NATO-nun digər üzvləri İngiltərə, Kanada və Almaniya da Rusiya sərhədinə min əsgər göndərəcək. Sözügedən birliklər, gələn ay Polşa, Baltik ölkələri, Bolqarıstan və Rumıniyaya yerləşdiriləcək.
Qərb ölkələri, Rusiya sərhədində nəhəng təlimlərə hazırlaşır. İlk böyük manevr, ABŞ və Polşa ordusu tərəfindən keçiriləcək.
Trampın prezidentliyinə bir neçə gün qalmış reallaşan dislokasiyaya hələlik 87 Abrams M1A1 tankı, 136 Bradley döyüş maşını və yüzlərlə piyada döyüş maşınının da aralarında olduğu ümumilikdə 2 min 800 hərbi texnika daxildir. ABŞ bölgəyə ümumilikdə 4 min əsgər göndərəcək. Dislokasiya NATO-nun “Atlantik Sülh Əməliyyatı” çərçivəsində aparılır.
Obama administrasiyasının Donald Trampın prezident kreslosuna oturmasına günlər qalmış böyük hərbi qüvvə toplamağa başlaması isə diqqət çəkir. Bu addımla Moskvaya meydan oxuyan Vaşinqtonda 20 yanvardan sonra nələrin olacağı isə dünyanın diqqətlə izlədiyi əsas məsələlərdən birinə çevrilib. Tramp prezident postunu təhvil aldıqdan sonra proseslər Avropanın gözləmədiyi bir istiqamətdə də gedə bilər. Belə ki, ekspertlər Moskva ilə yeni bir səhifə açmağı hədəfləyən yeni ABŞ prezidentinin Şərqi Avropadakı əməliyyatları təxirə sala biləcəyini deyir.
Kreml isə ABŞ-ın Şərqi Avropaya hərbi qüvvə göndərməsinə gözlənildiyi kimi sərt reaksiya verib. Kremlin sözçüsü Dmitri Peskov, ABŞ-ın Polşada hərbi qüvvə cəmləməsinin Rusiyanın maraqları və milli təhlükəsizliyi baxımından təhdid olduğunu deyib: "Üstəlik, Avropa ölkəsi olmayan üçüncü bir tərəfin sərhədərimizin yaxınlığında hərbi gücünü artırmasından söhbət gedir".
Polşada ABŞ əsgərlərinin sayının önəmli olmadığını deyən Peskov, "Min və ya 10 min əsgər, burada əsas hərbi qüvvələrin artırılmasıdır" deyə bildirib.
Qeyd edək ki, keçən ilin ortasında İngiltərənin Rusiya sərhədinə əsgər göndərəcəyini bəyanatı Rusiya ilə NATO arasında gərginliyi daha da artırmışdı. Londonun döyüş təyyarələrinin də aralarında olduğu hərbi qüvvələrini Rumıniya və Estoniyaya yerləşdiriləcəyi açıqlamasına cavab olaraq, Rusiya prezidenti Vladimir Putin NATO-ya cavab verəcəklərini bildirmişdi. Putin, Rusiya ilə quru sərhədi olmayan və Avropanın ortasında yerləşən Kalininqrada S-300 və İskəndər raket sistemlərini yerləşdirib. Rusiya həmçinin Polşa sərhədinə da hərbi qüvvə toplayıb.
