ABŞ kəşfiyyat təşkilatlarının rəhbərləri Rusiyanın ABŞ seçkisinə müdaxilə etdiyində israr edir. Baki-xeber.com xəbər verir ki kəşfiyyat şefləri bəyan edib ki, Rusiyanın ABŞ seçkisinə iddia edilən müdaxiləsinin motiv və məqsədləri gələn həftə açıqlayacaqlar.
Milli Kəşfiyyat Agentliyinin baş direktoru James Clapper Konqres qarşısınsda etdiyi çıxışda bildirib ki, Vladimir Putinin motivləri tam şəkildə bəyan ediləcək. "7 oktyabrda verdiyimiz bəyanatın arxasında bu gün də qətiyyətlə dayanırıq" deyə Clapper bildirib.
Yanvarın 5-də ABŞ kəşfiyyatının ən yüksək vəzifəli rəsmiləri Senatın Silahlı Qüvvələr Komitəsinin qarşısında ifadə veriblər. Onların ümumi rəyinə görə Moskva seçkilərə Trampın Klinton üzərində qələbəsini təmin etmək məqsədilə müdaxilə edib.
Konqresmenlərdən birinin “siz müdaxilənin Putinin motivinə bağlılığını açmısınızmı” sualına cənab Clapper müsbət cavab verib.
Senat dinləməsi üçün hazırlanmış ifadədə bildirilir ki, Rusiya ABŞ-ın maraqlarına ən geniş şəkildə təhlükə yarada biləcək təkmil kiberproqrama malikdir. İfadədə qeyd olunur ki, “Rusiya ABŞ-ın hökumət, hərbi, diplomatik, kommersiya və mühüm infrastrukturuna tammiqyaslı təhlükə təşkil edir”.
İfadəni Clapperdən başqa müdafiə nazirinin kəşfiyyat üzrə müavini Marcel Lettre və Milli Təhlükəsizlik Agentliyinin direktoru admiral Mixael Rogers imzalayıb.
"Biz deyə bilmərik ki, onlar seçkinin heç bir nəticəsini dəyişməyiblər və sair…” – deyib Clapper Rusiya kəşfiyyatının əməliyyatı barədə. O əlavə edib ki, bu məsələdə rusların bir çox motivləri ola bilərdi. "Biz bu müdaxilənin elektoratın etdiyi seçimə təsir miqyasını ölçmürük” – deyib Clapper.
Dinləməni açan senator Makkeyn xatırladıb ki, “biz bura prezident seçkisinin nəticəsini şübhə altına almaq üçün toplaşmamışıq”.
Clapper senator Makkeynin Rusiya müdaxiləsini “müharibə aktı” adlandırmasını bir qədər ağır yanaşma kimi qiymətləndirib.
Bu arada, ABŞ prezidenti Barak Obama da, Rusiyanın prezident seçkilərinə müdaxilə etdiyinə dair iddialarla əlaqədar kəşfiyyat təşkilatlarından məlumat alıb. Ağ Ev sözçüsü Coş Earnest, kəşfiyyat təşkilatlarından iddialarla əlaqədar məlumat aldıqlarını və Obamaya da bu mövzuda məruzə edildiyini qeyd edib. ABŞ prezidentinin milli təhlükəsizlik müşavirləri ilə toplantı keçirdiyini ifadə edən Earnest, "Obama, Rusiyanın seçkilərə müdaxilə etdiyinə dair yeni və fərqli bir hesabatla tanış edildi" deyə bildirib.
ABŞ-ın kəşfiyyat agentlikləri bu qənaətdədirlər ki, Demokratik Partiyanın serverlərinə haker müdaxiləsini məhz Kreml əmr edib. ABŞ seçkisinə xarici müdaxiləyə dair hesabat yanvarın 5-də prezident Obamaya təqdim edilib. Moskva bu iddiaları rədd etsə də, Vaşiqnton Rusiyaya qarşı yeni sanskiyalarını elan edib.
Prezident seçilmiş Donald Tramp da hesabatla tanış ediləcək və bundan sonra onun məxfi olmayan versiyası ictimaiyyət üçün açıqlanacaq. Tramp indiyədək Rusiyanın seçkiyə müdaxiləsinə dair bütün iddiaları rədd edib.
