ABŞ-ın gələcək prezidenti Donald Tramp ABŞ kəşfiyyatına yenidən sözlə hücum edib. Buna səbəb isə, onun kəşfiyyatdan Rusiyanın müdaxiləsi ilə bağlı almalı olduğu bilgilərin gecikdirilməsi olub.
Qeyd edək ki, yanvarın 3-də D.Tramp mətbuat qarşısına çıxmalı, rus hakerlərinin seçkiyə müdaxiləsi haqda danışmalı idi. O, hətta hamının bilmədiyi, ancaq ona bəlli bəzi məqamları açıqlayacağına söz vermişdi. Amma bu gün Qərb mətbuatı D.Trampın mətbuat konfransının yenə ertələndiyini yazıb.
«Reuters» agentliyi D.Trampın Twitter səhifəsindəki statuslarına istinad edərək, onun kəşfiyyatdan almalı olduğu bilgilərin gecikdiyini, yeni prezidenti məlumatlandırmanın cümə gününə saxlandığını xəbər verir.
ABŞ-ın kəşfiyyat orqanlarının Trampı rus hakerlərinin mümkün hücumu haqda hələ də bilgiləndirməməsi isə onu bir az da şübhələndirib. Onun sözlərinə görə, müşavirləri də demokratların Rusiyanı qəsdən suçladığını, onun seçkidə qələbəsini şübhə altında qoymağa çalışdığını düşünürlər. D.Tramp Twitter-də yazır: «Kəşfiyyatın rus hakerlərinin hücumu haqda məlumatı cümə gününə saxlanıb. Yəqin nə isə quraşdırmaqdan ötrü əlavə vaxt lazımdır. Çox şübhəlidir!».
Belə görünür ki, o, kəşfiyyat rəsmilərindən ətraflı məlumat almadan bu haqda danışmaq niyyətində deyil.
Sonradan isə məlum olub ki, ABŞ-ın yeni prezidentinin ilk mətbuat konfransı yanvarın 11-də Nyu-Yorkda olacaq. Trampın mətbuatla görüşdə, əsasən, biznes planlarından danışacağı, həm də Rusiyanın səsvermə prosesinə müdaxiləsi haqda ittihamlara toxunacağı gözlənir.
Qeyd edək ki, Mərkəzi Kəşfiyyat İdarəsi (CİA) və Federal Təhqiqat Bürosu (FBI) daxil olmaqla bir neçə ABŞ kəşfiyyat orqanı Trampın prezident seçkisini qazanması üçün Demokrat Partiyası və onun namizədi Hillari Klintona yönəlik kiberhücumların Rusiya tərəfindən idarə edildiyinə inanır. ABŞ kəşfiyyatı rus hakerlərin seçkiyə müdaxiləsilə, Trampın qələbəsinə yardım etdiyinə əmin olduğunu bildirir. Hətta ABŞ prezidenti Barak Obama ittihamların tam təsdiqləndiyini deyərək, Kremli cəzalandıracaqlarını elan edib, hətta bir neçə gün əvvəl ABŞ-dakı rus diplomatlarının ölkədən qovulması haqda qərar verdi.
Ancaq Tramp əvvəl bu iddiaların cəfəngiyyat olduğunu desə də, ötən həftə vəziyyətlə bağlı faktlar barədə məlumatlandırılmaq üçün ABŞ kəşfiyyat rəhbərləri ilə görüşəcəyini deyib.
