Moskva və Ankara bütün Suriya ərazisində atəşkəs və gələn ay Qazaxıstan paytaxtı Astanada sülh danışıqlarının keçirilməsilə bağlı razılığa gəlib. Baki-xeber.com xəbər verir ki, bu barədə Rusiya Xarici İşlər Nazirliyi açıqlama yayıb.
Açıqlamada qeyd edilir ki, Rusiya xarici işlər naziri Sergey Lavrov və Türkiyə xarici işlər naziri Mevlüt Çavuşoğlu məsələni telefonla müzakirə edərək razılığa gəlib. Daha sonra isə Çavuşoğlunun iranlı həmkarı Cavad Zəriflə telefon danışığı olub.
“İnterfaks” isə xəbər verir ki, Lavrov Astana görüşü ərəfəsində Suriya hökumətinin müxaliflərlə görüşdüyünü bildirib. Ancaq Lavrov, danışıqların harada keçirildiyinə dair məlumat verməyib. “Ria Novosti” agentliyi də diplomatik mənbələrə istinadən, Ankarada silahlı müxalif qruplarla danışıqlar başladığı barədə məlumat yayıb. Başqa bir hərbi mənbə isə, rejimlə müxaliflər arasında keçiriləcək Astana danışıqlarına yalnız hərbi gücü olan qruplar qatılacağını deyib.
O da məlum olub ki, Türkiyə ilə Rusiya Suriya münaqişəsi ilə bağlı hərtərəfli barışıq planı hazırlayıblar. Plan münaqişə tərəflərinə təqdim ediləcək. Plan hazırda hökumət və müxalifət qüvvələri arasında döyüş gedən bütün əraziləri əhatə edir. Dekabrın 29-u saat 00:00-dan başlayaraq tərəflərə atəşi dayandırmaq təklif olunacaq. Əgər davamlı atəşkəs əldə olunsa, Suriyanın hökumət və müxalifət nümayəndələri Türkiyə və Rusiyanın dəstəyi ilə Astanada münaqişənin həlli ilə bağlı siyasi müzakirələrə başlayacaqlar.
Bu arada ABŞ da Astanada keçiriləcək Suriya danışıqlarını dəstəkləyib. Dövlət Departamentinin rəsmi nümayəndəsi Mark Toner bildirib ki, ABŞ Astanada Suriya danışıqlarının keçirilməsi təşəbbüsünü və, ümumiyyətlə, münaqişənin nizamlanmasına yönəlmiş istənilən səyləri dəstəkləyir. Bundan əvvəl Türkiyə hökuməti Rəcəb Tayip Ərdoğan Astanada keçiriləcək Suriya danışıqlarına Rusiya, Türkiyə, İran, Səudiyyə Ərəbistanı, Qətər və Suriyadakı mötədil müxalifətin nümayəndələrinin dəvət oluna biləcəyini istisna etməyib. Jurnalistlərin ABŞ-ın həmin görüşə dəvət almasına dair sualına Tonerin cavabı lakonik olub: “Mən belə düşünmürəm”.
“ABŞ Suriyadakı münaqişələrlə bağlı daha sıx əməkdaşlıq etməyə hazırdır. Söhbət İŞİD terror qruplaşmasının məhvi, vətəndaş müharibəsi və Hələbdəki dəhşətli döyüşlərdən gedir”, - deyə Toner qeyd edib.
“Biz həmişə qeyd etmişik ki, Suriyaya qərara nail olmaq üçün prosesin bütün iştirakçıları bir biri ilə razılığa gəlməlidirlər”, - deyə Toner qeyd edib.
Onun sözlərinə görə, bu məsələ ilə bağlı Vaşinqton Türkiyə və Rusiya ilə daim təmas saxlayır.
