Xəbər verildiyi kimi, ötən həftə sonu BMT Təhlükəsizlik Şurası İsraildən Fələstin ərazilərində yaşayış məskənlərinin inşasına son qoymağı tələb edən qətnamə qəbul edib.
Baki-xeber.com xəbər verir ki, əvvəl Misir tərəfindən BMT TŞ-yə təqdim edilən, daha sonra yenə Misirin tələbilə təxirə salınan səsvermə bu dəfə qətnaməyə dəstək verən Yeni Zelandiya, Malayziya, Venesuela və Seneqal tərəfindən yenidən BMT TŞ-nin gündəminə gətirilib.
BMT Təhlükəsizlik Şurasında qəbul edilən qərara əsasən İsrail, Şərqi Qüds də daxil olmaqla, Fələstin torpaqlarında məskunlaşma fəaliyyətlərinə son qoymalı, tərəflər dinc əhaliyə qarşı zorakılıq aktlarının qarşısını almaq üçün addımlar atmalı və Fələstinin yekun statusu ilə bağlı etibarlı danışıqların başlamasına səy göstərməlidir.
Qətnamənin lehinə Təhlükəsizlik Şurasının 14 üzvü səs verib.
Maraqlıdır ki, indiyə qədər BMT TŞ-də İsraili müdafiə edən və 2011-ci ildə İsrailin məskunlaşma fəaliyyətlərini qınayan qərar layihəsini veto edən ABŞ İsrailə qarşı bu səsvermədə ilk dəfə bitərəf mövqe tutub. Baxmayaraq ki, ABŞ-ın yeni prezidenti Donald Tramp BMT TŞ-nın iclasından əvvəl Vaşinqton tərəfindən qətnaməyə veto qoyulmasına çağırıb.
BMT TŞ-nin qərarını İsrail rəhbərliyi sərt etirazla qarşılayıb. Baş nazir Benyamin Netanyahunun mətbuat katibliyi bəyan edib ki, rəsmi Təl-Əviv BMT TŞ-nin qətnaməsinə əməl etməyəcək: "İsrail BMT Təhlükəsizlik Şurasının qərəzlə dolu qətnaməsini rədd edir və ona əməl etmək niyyətində deyil".
Məsələyə münasibət bildirən İsrailin enerji naziri Yuval Steinitz səsvermədə bitərəf qalan ABŞ-ın İsraili tərk etdiyini deyib: "Bu, məskunlaşmalara qarşı bir layihə deyil, bu, İsrail əleyhinə bir layihədir. Yəhudi xalqına və yəhudi dövlətinə qarşı layihədir. ABŞ sadə şəkildə Yaxın Şərqdəki yeganə dostunu tərk etdi" - deyə israilli nazir bildirib.
İsrail Baş naziri Binyamin Netanyahu isə sözügedən qərarın BMT TŞ-də qəbul edilməsinə görə ABŞ prezidenti Barak Obama rəhbərliyini günahlandırıb: "BMT TŞ-nin qərarının arxasında Obama rəhbərliyinin olduğundan şübhəmiz yoxdur".
O, Obama rəhbərliyinin ənənəvi ABŞ siyasətinə zidd və BMT TŞ-də İsrailə qarşı "düşmən" mövqe sərgilədiyini deyib: "Əvvəllər də ABŞ rəhbərliyində İsrailin məskunlaşma fəaliyyətilə bağlı fərqli yanaşmalar olmuşdu. Ancaq bu mövzunun müzakirə ediləcəyi yerin BMT TŞ olmadığına dair razılaşmışdıq".
Bu arada İsrail dövlət radiosu xəbər yayıb ki, Netanyahu İsrail-Fələstin probleminin həlli üçün ABŞ tərəfindən BMT TŞ-yə yeni bir qərar layihəsinin təqdim edilə biləcəyindən narahatdır. Radio rəsmi mənbələrə istinadən xəbər verir ki, Netanyahunun başçılığı ilə keçirilən İsrail Təhlükəsizlik Şurası Obama rəhbərliyinin BMT TŞ-yə "İsrail-Fələstin probleminin həlli üçün müzakirələrin yenidən başlama meyarlarını təyin edəcək" yeni bir qərar layihəsi təqdim edə biləcəyi ehtimalını müzakirə edib. Məlumatda Netanyahunun Obamanın prezidentliyinin son günlərində İsrailə yeni bir "siyasi zərbə" vura biləcəyindən narahat olduğu bildirilir.
