ABŞ-da Seçki Kollegiyasının 30-dək respublikaçı üzvü əvvəl elan etdiklərinin əksinə olaraq Donald Trampın əleyhinə səs vermək istəyir. Baki-xeber.com BBC-yə istinadən xəbər verir ki, bu barədə "The Independent" Harvard Universitetinin professoruna istinadən məlumat yayıb.
Burada məqsəd isə milyarderin Ağ Evə gedən yolunu bağlamaq, onu ABŞ prezidenti olmaq imkanından məhrum etməkdir. 2016-cı ilin prezident seçkisində özü qısa bir müddət demokrat namizəd olmaq istəyən professor Larri Lessig sözügedən kollegiya üzvlərinə hüquqi köməyini təklif edib.
Amerika qanunlarına görə Seçki Kollegiyasının üzvləri onların təmsil etdikləri spesifik ştatlarda hər hansı namizədin ən çox seçici səsi toplamasına baxmayaraq, öz vicdanlarının səsi ilə hərəkət edərək elektoratın onlara verdiyi mandatdan imtina edə bilərlər. Daha sadə deyilərsə, hər hansı bir ştatda elektorat bir namizədə daha çox səs veribsə də, həmin elektoratı təmsil edən kollegiya üzvü kollegiya səsverməsində rəqib namizədə səs verə bilər.
ABŞ-ın əksər ştatlarında qanun Seçki Kollegiyası üzvündən elektoratın iradəsinə uyğun səs verməyi tələb etsə də, professor Lessigin fikrincə, kollegiya üzvü özünü federal rəsmi kimi təqdim edə bilər. Professorun qənaətinə görə, belə federal kollegiya üzvü texniki olaraq ştatın qanunlarından yüksəkdə dayanır.
Buna baxmayaraq "The İndependent" yazır ki, hələlik Trampın əleyhinə səs verəcəyi barədə açıq bəyanatla yalnız bir respublikaçı kollegiya üzvü, Texasdan olan Kris Suprun çıxış edib. O buna səbəb kimi Trampın prezidentlik üçün yararsız şəxs olmasını göstərib.
Lessig deyib ki, ona daha çox kollegiya üzvünün Trampın əleyhinə səs vermək istədiyi məlumdur və əgər onların sayı 37-yə yaxınlaşsa vəziyyət tamamilə fərqli ola bilər.
Seçki qanunlarına görə prezident olmaq üçün minimum 270 seçki kollegiyası üzvünün səsini qazanmaq laımdır. Trampa səs verəcəyini bildirənlərin sayı hazırda 309-dur, lakin bunlardan 37-si fikrini dəyişsə Tramp qalib elan edilməyə bilər.
Professor deyib ki, onun öz araşdırması Trampın əleyhinə səs verməyə hazırlaşanların 20 nəfər olduğunu göstərir: "Bəziləri mənə deyirlər ki, bu rəqəm 30-dur, lakin mən bilirəm ki, azı 20 seçki kollegiyası üzvü Trampın əleyhinə səs vermək istəyir".
"The İndependent" yazır ki, Hillari Klinton ona səs vermiş seçicilərinin sayına görə Trampdan 2,8 milyon seçici irəlidədir, lakin ABŞ seçkisininin taleyini Seçki Kollegiyası həll edir.
Professor Lessig deyib ki, Amerikanın əsasını qoyanlar Seçki Kollegiyasını vaxtilə "seçki prosesində təcili tormoz kimi" düşünüblər. Lessigin fikrincə hər bir kollegiya üzvündən indi "vicdanının səsi ilə" hərəkət etmək tələb olunur, çünki bu seçkinin özü bunu tələb edir.
Qeyd edək ki, Seçki Kollegiyasının iclası dekabrın 19-da keçirilməlidir.
