Suriyanın hökumət yönümlü qüvvələri şərqi Hələbdə evlərə girərək azı 82 dinc sakini öldürüb. Baki-xeber.com xəbər verir ki, BMT-nin insan haqları qurumu Hələbin dörd ərazisində azı 82 dinc sakinin yerindəcə güllələndiyi barədə etibarlı məlumatın olduğunu bəyan edib. BMT-nin sözçüsü deyib ki, Hələbdə insanlıq tamamilə çöküb.
Şərqi Hələbi dörd il idarə edən üsyançı qüvvələr məğlübiyyət eşiyindədir. Deyilənlərə görə hökumət yönümlü qüvvələr irəli getdikcə minlərlə insan hələ də üsyançıların əlində qalan son məhələlərdə ağır bombardman altındadır.
BMT və Beynəlxalq Qızıl Xaç Komitəsi (BQXK) Suriya hökuməti və Rusiyaya bombardmanı dayandıraraq dinc sakinlər üçün təhlükəsiz çıxış yolu açmağa çağırıb. Cenevrədə keçirilən mətbuat konfransında BMT-nin insan haqları sözçüsü Rupert Colville baş verən hadisələr barədə məlumat verib. O qeyd edir ki, 11 qadın və 13 uşaq daxil olmaqla, 82 dinc sakin güllələnərək öldürülüb. Colville deyir ki, ona çoxsaylı dinc sakinin hökumətyönlü qüvvələr tərəfindən tutulmasından əlavə, döyüşçülərin evlərə girib qadın və uşaqlar da daxil olmaqla, içəridə tapdıqları hər kəsi öldürdükləri barədə məlumatlar verilib: "Dünən axşam bizə narahatedici xəbər gəlib ki, küçələr meyitlərlə doludur... Güclü bombardman və yerindəcə güllələnmə təhlükəsinə görə sakinlər meyitləri götürə bilmirlər".
BMT baş katibi Ban Ki-Mun Hələbdə çox sayda mülkilərə qarşı vəhşiliklər barədə məlumatlardan sonra narahatlığını bildirib. Ban bütün tərəfləri, xüsusilə Suriya hökuməti və onun müttəfiqlərini dinc sakinləri qorumağa çağırıb.
Bəyanatda Banın sözçüsü Stephane Dujarric deyib ki, baş katib Hələbdə son saatlarda çoxlu sayda dinc sakinə, o cümlədən, qadın və uşaqlara qarşı vəhşiliyinin törədilməsilə bağlı məlumatlardan təşvişə düşüb: "Vurğulanmışdır ki, Birləşmiş Millətlər Təşkilatı müstəqil şəkildə bu məlumatları yoxlamaq iqtidarında deyil, baş katib müvafiq tərəflər üçün ciddi narahatlıq ifadə edir".
BMT-nin humanitar məsələləri üzrə müşaviri Jan Egeland bundan əvvəl bildirib ki, iqtidaryönlü silahlı dəstələr tərəfindən törədilən vəhşiliklərə görə Suriya və Rusiya məsuliyyət daşıyır.
Birləşmiş Millətlər Təşkilatının Uşaq Fondu (UNICEF) isə Hələbin şərqində valideynləri yanlarında olmayan uşaqların, bombardman altındakı bir binada söxışdırıldığını bildirib. UNICEF uşaqların hücum altındakı binadan təcili olaraq azad edilməsinə çağırıb.
Binada qapalı qalan uşaqların sayının 100-dən çox ola biləcəyini deyən UNICEF-in bölgə direktoru isə bildirb ki, "dünyanın, Hələbdən olan uşaqlar üçün ayağa qalxmasının və yaşadıqları bu kabusa son verməsinin vaxtıdır".
Şəhərdə qalan insanlar üçün təhlükəsiz keçidin təmin edilməsi üzrə səylər barədə məlumatlı olan ABŞ rəsmisi BBC-yə bildirib ki, Hələbdə 50 min nəfər bombardman altındadır və "ruslar insanların ərazini tərk etməsinə və ya xəsarət almış uşaqların evakuasiyasına imkan yaratmaq üçün atəşlə bağlı fasilə barədə düşünmür".
Hələb daxilindəki üsyançılar Suriya ordusunun uğurlarından sonra məğlubiyyət ərəfəsindədir. Əsəd ordusu şəhərin 98 faizinə nəzarəti ələ keçirib.
Rusiyanın BMT-dəki səfiri bildirib ki, Hələbin şərqində olan qiyamçı döyüşçülərlə istehkamlarını tərk etmək barədə razılaşma əldə edilib. Türkiyə XİN-in sözçüsü Hüseyn Müftüoğlu isə qeyd edib ki, Rusiya hərbçiləri və yerli silahlı qruplaşmalar arasında təmaslardan sonra Hələbdə atəşkəsə dair razılaşma əldə olunub: “Biz təsdiqləyə bilərik ki, Rusiya hərbçiləri və müxalifət qüvvələrinin nümayəndələri arasında danışıqlar nəticəsində şərqi Hələbdə atəşin dayandırılmasına dair razılaşma əldə olunub. Söhbət birinci mərhələdə dinc sakinlərin, daha sonra isə silahlı müxalifətçilərin İdlib şəhəri istiqamətində təxliyəsindən gedir”.
O, Hələbdə atəşkəsin əldə olunması və humanitar dəhlizlərin açılmasında Türkiyənin səylərini qeyd edib.
Ilkin mərhələdə mülki şəxslər, sonra isə silahlılar bölgədən çəkiləcək.
Hələb 2011-ci ildə prezident Bəşər Əsədə qarşı üsyan başlamamışdan əvvəl Suriyanın ən böyük şəhəri, kommersiya və sənaye mərkəzi olub.
Təhlilçilərin fikrincə, Hələbin itirilməsi müxalifətə böyük zərbə olacaq, çünki bu hal, Suriyanın dörd ən iri şəhərinə hökumət qüvvələrinin nəzarət etməsi deməkdir.
