Bəşər Əsəd rejimi və müxaliflərin şiddətli toqquşmasına səhnə olan Suriyanın şimalındakı Hələb şəhərində rejimin hava hücumları nəticəsində küçələr cəsədlərlə dolub.
Baki-xeber.com xəbər verir ki, Əsəd rejimi və müttəfiqləri havadan, İran, İraq və Hizbullah silahlıları isə də qurudan Hələbin şərqində müxaliflərin nəzarətindəki bölgələri bombalayır.
Şəhərdəki yerli media aktivistlərindən Əbu Ammar evlərdən çıxmaqın mümkünsüz olduğunu deyir: "Rusiya və rejim bombardmanı nəticəsində küçə və prospektlər insan cəsədləri və yaralılarla doludur. Hücumlar o qədər güclüdür ki, çölə çıxdıqda hər hansı bir hücumda ölə və ya yaralansan küçənin ortasında qalacaqsan. Hələbdə bombalanan küçələrdən qan iy gəlir".
O da bildirilir ki, Əsəd rejimi bombardmanlardan qaçan dinc şəhər sakinlərini də öldürür. Hələbdəki mülki müdafiə səlahiyyətlilərindən Babiris Mişal də rejimin hücumu nəticəsində çoxu qadın və uşaq olan 45 nəfərin öldüyünü, onlarla adamın da yaralandığını deyir: "Şəhər sakinlərinin vurulduğu prospekt cəsədlərlə doludur. Cəsədlərin çoxu tanınmaz hala düşüb”.
Şəhərdə vəziyyətin çox ağır olduğunu deyən Mişal, qarşıdurma və hücum bölgələrindən digər bölgələrə qaçan insanların ac-susuz qaldığını bildirir: “Yemək, su yoxdur. Hücumlara görə, çörək sexləri də işləmir".
Rusiya xarici işlər nazirinin müavini Mixail Boqdanov isə dekabr ayı ərzində Hələbi tam ələ keçirəcəklərini bildirib.
Rejimin son hücumları ilə Hələbin şərqində 15 noyabrdan indiyə kimi ölən dinc sakinlərin sayı 739-a, yaralıların isə 2 500-ə çatdığı bildirilir.
Suriyanın şimalındakı Hələb, paytaxt Dəməşqdən sonra ölkənin ikinci böyük şəhəri sayılır. Şəhər mərkəzinin qərbinə rejim, şərqinə müxaliflər nəzarət edir. Rejim müxaliflərin nəzarətində olan təxminən 300 min dinc sakinin də yaşadığı bölgəni mühasirədə saxlayır. Son iki həftədə şəhərin şərqindəki bütün xəstəxanalar və sağlamlıq mərkəzləri rejim tərəfindən dağıdılıb. Bütün məktəblərin bağlı olduğu bölgədə yalnız 3 çörək sexi var.
TAHİR
