Ukraynalı prokurorlar noyabrın 28-də keçmiş Ukrayna prezidenti Viktor Yanukoviçə qarşı rəsmi ittiham irəli sürüblər. O, dövlətə xəyanətdə ittiham olunur.
Xatırladaq ki, Kiyevdə “Avromaydan” iştirakçılarının qətlində ittiham olunan keçmiş “Berkut” polkunun üzvlərinin məhkəməsi başlayıb. Şahid kimi keçmiş Ukrayna prezidenti Viktor Yanukoviç də ifadə verir. O, məhkəməyə Rastov şəhər məhkəməsinin binasından video vasitəsilə qatılıb.
İndiki Ukrayna rəhbərliyi hesab edir ki, "Avromaydan" hərəkatı vaxtı nümayişçilərə atəş əmrini məhz Viktor Yanukoviç verib. Amma Ynukoviç məhkəmə prosesində ittihamları rədd edib.
Onun sözlərinə görə, həmin vaxt ona müxalifətin nəzarətində olan binadan atəş açılması barədə məlumat verilib, hüquq-mühafizə orqanları isə öz rejimində hərəkət ediblər. Keçmiş prezident deyib ki, həmin vaxt məhz hansı silahlardan istifadə edildiyini demək onun üçün çətindir.
Yanukoviç, parlamentin onu prezident vəzifəsindən uzaqlaşdırarkən, Ukrayna torpaqlarında olduğunu bildirib. Yanukoviç keçmiş baş nazir Arseniy Yatsenyuk, prezident Petro Poroşenko və parlament sədri Andrey Porubi ilə üzləşməyə hazır olduğunu deyib.
Qeyd edək ki, ötən həftə Yanukoviçin ifadə verməsi baş tutmayıb. Buna səbəb keçmiş berkutçuların məhkəməyə gələ bilməməsi olub. “Sağ sektor” hərəkatının fəalları həbsxana binasını blokadaya aldıqlarından onları məhkəməyə gətirmək mümkün olmayıb.
Aleksandr Merinçenko, Sergey Tamtura, Oleq Yanişevski, Pavel Abroskin və Sergey Zinçenko 48 aksiyaçının qətlində ittiham olunurlar. Həmçinin “Berkut” polkunun 25 əməkdaşı və rəhbər nümayəndəsi şübhəli bilinirlər.
İndiki Ukrayna hakimiyyəti hesab edir ki, 2014-cü ilin qışında nümayişçilərə atəş açmaq əmrini həmin vaxt prezident olan Viktor Yanukoviç verib.
Yanukoviç hazırda Rusiyadadır.
