Türkiyə prezidenti Rəcəb Tayyib Ərdoğanın Avropa ilə sərhəd qapılarını qaçqınların üzünə açıla biləcəyi mesajı Avropada şok effekti yaradıb.
Baki-xeber.com xəbər verir ki, Ərdoğanın sözlərinə ilk reaksiya verən Avropa Parlamentinin Türkiyə üzrə məruzəçisi Kati Piri sığınacaq axtaran şəxslərlə bağlı razılaşmanı üzvlük müzakirələri ilə əlaqələndirməyin əvvəlcədən səhv olduğunu deyib.
Avropa Parlamentinin xarici işlər komissiyasının rəhbəri Elmar Brok isə, Türkiyənin Avropa Birliyi (AB) ilə qaçqın razılaşmasını pozacağına inanmadığını söyləyib. Sazişin Ankaranın da mənfəətinə olduğunu deyən Brok, Türkiyənin iqtisadi inkişafının böyük ölçüdə AB ilə yaxşı əlaqələrlə bağlı olduğunu bildirib.
Almaniya hökumətinin sözçüsü Ulrika Demmer isə deyib ki, hədələr işə fayda vermir, qaçqınlarla bağlı razılaşma hər iki tərəf üçün faydalıdır: həm Türkiyə, həm də Avropa Birliyi üçün. Onun sözlərinə görə, mübahisəli məsələlər tərəflər arasında müzakirə yolu ilə həllini tapmalıdır.
Serbiyanın əmək, məşğulluq və sosial işlər üzrə naziri Aleksandr Vulin isə Türkiyə ilə AB arasında miqrantlarla bağlı razılaşma ləğv ediləcəyi halda Avropada sığınacaq axtaran şəxslərin sayının böyük ölçüdə arta biləcəyini bəyan edib. Nazir yeni miqrant axını yaşanacağı halda Balkan dəhlizi üzərinə olan ölkəsinin lazımi tədbirləri görəcəyini deyib: "Bu vəziyyətdə sərhədləri qorumaq üçün təhlükəsizlik tədbirlərini artıracaq, lazımlı qanuni tədbirləri görəcəyik".
Vulin, Serbiyanın dünya siyasətinə təsir edə bilməyəcəyini, ancaq öz sərhədlərini qoruya biləcəyini ifadə edib.
Brüsselin AB-Türkiyə arasında imzalanan qaçqın razılaşması ilə bağlı bütün öhdəliklərini yerinə yetirdiyini deyən Çexiya baş naziri Bohuslav Sobotka isə Ərdoğanın “sərhədləri açma təhdidinin” qanunsuz olduğunu iddia edib: "Avropa razılaşmanın özünə düşən hissəsini yerinə yetirdi və buna görə də Türkiyə tərəfindən gələn mövcud təhdidlər qanunsuzdur".
AB Komissiyasının sözçüsü Marqaritis Sxinas Türkiyə-AB qaçqın razılaşması ilə əlaqədar, "Biz sığınacaq axtaran şəxslər razılaşmasına bağlıyıq və bunu uğurlu olması üçün əlimizdən gələn hər şeyi edəcəyik" deyib. O, həm AB-nin həm də Türkiyənin öhdəliklərini yerinə yetirdiyini söyləyib.
Qeyd edək ki, Türkiyə prezidenti Rəcəb Tayyib Ərdoğan bildirib ki, əgər Avropa Birliyi Ankaraya qarşı mövcud siyasətini davam etdirsə, Türkiyə Avropa Birliyi ilə sərhədlərini miqrantların üzünə aça bilər. Prezident bunu Avropa Parlamentinin Türkiyə ilə üzvlük danışıqlarını dayandırmağa çağıran tövsiyə xarakterli qətnaməsinə münasibət bildirərkən deyib: "Siz heç bir zaman dürüst davranmadınız, insanlara doğru baxmadız, Aylan körpələri, dalğalar Aralıq dənizi sahillərində sahilə vurduğu zaman oradan gəlib siz almadınız, Ümran körpələrə siz gəlib sahib çıxmadınz. 3 - 3.5 milyon qaçqını bu ölkədə bəsləyən bizik, verdiyiniz sözləri yerinə gətirmədiniz. Türkiyə ilə Bolqarıstan arasında sərhəd keçid məntəqəsinə 50 min qaçqın dayandığı zaman fəryad etdiniz, “Görəsən Türkiyə sərhəd qapılarını açsa nə edərik” deməyə başladınız. Əgər daha irəli getsəniz bu sərhəd qapıları da açılar, bunu da bilin".
TAHİR
