Noyabrın 25-də Kiyev məhkəməsi keçmiş Ukrayna prezidenti Viktor Yanukoviçi Maydan hadisələri ilə bağlı dindirməli idi. Ancaq dindirmə noyabrın 28-nə kimi təxirə salınıb.
Baki-xeber.com xəbər verir ki, buna səbəb isə “Berkut” adlı xüsusi təyinatlı dəstənin keçmiş üzvlərinin məhkəməyə gətirilə bilməməsi olub. Belə ki, bir qrup nümayişçi məhkəmə binasını mühasirəyə alıb və bunun nəticəsində, 2014-cü ilin Maydan hadisələri vaxtı nümayişçilərin öldürülməsində ittiham olunan xüsusi təyinatlıları məhkəmə salonuna gətirmək mümkün olmayıb.
Rusiyanın Rostov şəhərində yaşayan eks-prezident Yanukoviç məhkəmədə şahid qismində ifadə verməli idi. Dindirmə video bağlantı şəklində olmalı idi. Onun ifadəsini dinləmək üçün məhkəmədə 300 jurnalist qeydə alınmışdı.
Jurnalistlərə açıqlama verən Yanukoviç təxirəsalmaya görə millətçiləri günahlandırıb və deyib ki, Maydan hadisələri vaxtı törədilmiş cinayətlərə görə qorxu indi də yaşayır. Yanukoviç jurnalistlərə deyib ki, millətçilər Maydan vaxtı törətdikləri cinayətlərin üstünün açılacağından qorxur. O bildirib ki, radikallar Ukrayna qanunlarından kənar işləyir.
Yanukoviçin sözlərinə görə, o, Maydan hadisələri vaxtı 100-dən etirazçının ölümünün səbəbləri haqda həqiqətin üzə çıxmasını istəyir. O, Ukrayna hakimiyyətini ittiham edib və deyib ki, onda olan ilkin məlumata görə, bu günki məhkəmə dinləməsini pozmaq üçün təxribatı Ukrayna hakimiyyəti törədib. O hesab edir ki, hakimiyyət nəyin bahasına olursa-olsun onun ifadə verməsinin qarşısını almağa çalışır.
Mətbuat konfransında jurnalistlərin suallarını cavablayan Yanukoviç bildirib ki, Krımdakı hadisələr Maydan provokasiyalarının nəticəsidir: “Maydan olmasaydı referendum olmazdı...
Amma bu hadisələr mənim üçün gözlənilməz deyildi. Radikalların, Maydan etirazları zamanı, rusca danışanların maraqlarının müdafiəsi məqsədilə Kiyevə gələn Krım sakinlərinə etdikləri zülmlərə bağlı məlumatlar alırdım. Radikallar Krım sakinlərini daşıyan 8 avtobusa atəş açdı. Sonra avtobusları yandırdı".
Yanukoviç Maydan etirazları əsnasında hərbi vəziyyət elan etməyə cürət edə bilməməsinin ən böyük səhvi olduğunu deyib: "Hərbi vəziyyət, radikalları dayandırmağın tək yeganə idi, amma qan tökmək istəmədim. Bu gün bunu söyləmək mənə nə qədər çətin gəlsə də, bunu imzalaya bilməzdim. Etiraf edirəm ki, bu gün də buna əlim gəlməzdi. Ukrayna bölünərdi, vətəndaş müharibəsinə yol açardı".
Yanukoviç köməkçiləri ilə hazırladığı 3 cilddən ibarət materilaları da nümayiş etdirib və deyib ki, bugünkü məhkəmənin təxirə salınmasına səbəb olanlar bu cinayətlərə görə məsuliyyət daşıyanlardır. O, bildirir ki, məhkəmədən və Baş prokurordan bu materilallarda deyilənləri yoxlamağı xahiş edəcək.
Eks-prezidentin fikrincə, indiki cinayət işi Maydanda hüquq-mühafizə işçilinin ölümünün də araşdırılması olmadan mümkün deyil. Onların ağır yaralanmasının və ölümün səbəbləri barədə suallar cavabsız qalır. O deyir ki, bu, ədalətsizdir və Ukrayna konstitusiyasının pozulmasıdır.
Yanukoviçin vəkili Vitali Serdyuk isə bildirib ki, Yanukoviç Ukrayna vətəndaşı olaraq qalır və Rusiya pasportu almayıb.
Qeyd edək ki, Yanukoviç 2010-2014-cü illərdə Ukrayna prezidenti olub. 2014-cü ildə onun istefasını tələb edən Maydan etirazlarından sonra ölkəni tərk edib, Rusiyada sığınacaq alıb. Korrupsiya ilə ad çıxarmış Yanukoviç barəsində Ukraynada bir neçə cinayət işi açılıb. O, axtarışa verilib, əmlakına həbs qoyulub.
Bu ilin oktyabrında isə Rusiya DİN rəsmi olaraq bildirdi ki, Yanukoviçə müvəqqəti sığınacaq verilib.
Ukrayna Daxili İşlər Nazirliyi xüsusi təyinatlı dəstəsi “Berkut”a aid təhlükəsizlik qüvvələrinin 20 fevral 2014-cü ildə Kiyevdə Maydan hadisələrində kütləyə atəş açaraq 48 etirazçını öldürməsi ilə əlaqədar keçirilən məhkəmədə Yanukoviçin şahid kimi dindirilməsinə qərar verilmişdi.
TAHİR
