ABŞ-ın 45-ci prezidenti Donald Tramp Rusiya və Türkiyə ilə birlikdə İŞİD terror qruplaşmasına qarşı ortaq hərbi əməliyyat keçirməyə hazırlaşır. Baki-xeber.com xəbər verir ki, bu iddia İsrail mediasında yer alıb.
İsrail kəşfiyyatına yaxınlığı ilə tanınan Debka saytının iddiasına görə, Trampın milli təhlükəsizlik müşaviri Maykl Flinn bu məqsədlə gizli şəkildə Rusiya Təhlükəsizlik Şurasının sədri Nikolay Patruşev, Türkiyə prezidenti Rəcəb Tayyib Ərdoğan və İordaniya kralı Abdulla ilə yaxın təmaslar qurub.
Rusiya, ABŞ, Türkiyə və İordaniya qapaqlı şəkildə Trampın prezident kimi vəzifəyə başlamasının ardından planlaşdırılan böyük ortaq hərbi əməliyyat hazırlığına başlayıblar, "Bu plan Türkiyə, İordaniya, İraq və Körfəz ölkələrindən nizamlı orduların da əməliyyatda iştirak etməsini nəzərdə tutur" – sayt yazır.
ABŞ-ın “The Wall Street Journal” qəzeti isə Trampun böyük oğlunun keçən ay Fransanın paytaxtı Parisdə bir oteldə yüksək səviyyəli diplomatlar və iş adamları ilə danışıqlar apardığını iddia edir. Trampın görüşlərində əsas müzakirə olunan məsələ isə Suriya böhranının həlli üçün Rusiya ilə əməkdaşlığın yolunu tapmaqdır.
Qəzetin məlumatına görə, Trampın oğlu oktyabrın 11-də Fransada bir elmi araşdırma mərkəzinin tədbirinə qatılıb. Həmin mərkəzin təsisçisi Fabien Baussart və onun xanımı Randa Kassis Rusiyaya yaxın adamlardandır. Özü də əslən Suriyadan olan xanım Kassis bu ölkədəki münaqişənin prezident Bəşər Əsədlə əməkdaşlıq yolu ilə həllinə tərəfdar olan qrupun lideridir. «The Guardian» suriyalı ekspertlərdən aldığı bilgilərə əsaslanaraq, xanım Kassisin Rusiyanın xarici işlər naziri Sergey Lavrovla yaxın dost olduğunu yazıb, onların qucaqlaşaraq görüşdüyünü göstərən fotonu yayımlayıb.
İndi, gənc Trampın Paris səfəri yeni prezident və onun ailə üzvlərinin xarici qüvvələrlə əlaqələri barədə təzə suallar yaradıb.
Müsahibələrindən birində Randa Kassis Trampın oğluna təsir etməyə, onu Yaxın Şərqdə Rusiya ilə əməkdaşlığın vacibliyinə inandırmağa çalışdığını boynuna alıb: «Realist olmalıyıq. Hazırda Suriyada olan kimdir? ABŞ deyil, Fransa deyil. Rusiyasız Suriya məsələsini həll edə bilmərik».
Trampın oğluna gəlincə, xanım Kassis onun praqmatik və üzüyola olduğunu söyləyib. R.Kassis bu haqda Facebook səhifəsində də yazıb. Əməkdaşlıq ideyasını Trampa onun oğlu vasitəsilə göndərdiyini, ABŞ-la Rusiyanın Suriya məsələsində bir araya gələcəyinə ümidli olduğunu deyib.
Kassis gənc Trampla görüşü haqda Rusiya rəsmilərini, o cümlədən Rusiya xarici işlər nazirinin müavini Mixail Boqdanovu bilgiləndirdiyini söyləyib. Rusiya Xarici İşlər Nazirliyi məsələyə münasibət bildirməsə də, «Interfax» agentliyi Kassisin noyabrın 8-də M.Boqdanovla görüşdüyünü yazır.
Yeni seçilmiş prezidentin baş müşaviri Kellyanne Konvay oğul Trampın Parisdəki tədbirdə iştirakını təsdiqləyib, amma onun xanım Kassislə hər hansı bağlılığını danıb: «Don Parisdə dəyirmi masada çıxış edib. O xanım da həmin danışıqlara və 30 nəfərlik nahara qatılıb. Tədbirdə dünyanın müxtəlif yerlərindən nə qədər siyasətçi olub».
D.Trump özü noyabrın 23-də «The New York Times»a müsahibəsində Suriya barədə tam fərqli düşündüyünü söyləyib, ancaq detallara varmayıb. Öncəki çıxışlarında o, B.Obama administrasiyasını Əsəd rejimini devirməyə çalışdığına görə qınamış, bunun çıxış yolu olmadığını demişdi. O ki qaldı gənc Trampa, o, Trump Təşkilatının vitse-prezidentidir, atasının seçki kampaniyasında əsas rəsmi şəxs kimi çalışıb.
Keçid hökuməti rəsmilərinin dediyinə görə, Trampın uşaqlarının heç biri yeni administrasiyada formal yer tutmayacaq. Yəni, onların qeyri-formal mövqeyə sahiblənəcəyi çıxdaş edilmir. Trampın qızı İvanka Tramp atası seçiləndən bəri onun bəzi ölkə liderlərilə görüşlərinə, telefon söhbətlərinə qatılır. «The New York Times»a müsahibəsində Tramp kürəkəni Jared Kuşnerin İsrail-Fələstin münaqişəsində ABŞ-ın elçisi ola biləcəyini deyib. «The Guardian» yazır ki, Trampın bu təklifi, digər tərəfdən Parisdəki görüşə oğlunu göndərməsi onun xarici məsələlərdə şəxsi və biznes əlaqələrinə güvənəcəyi, təcrübəsi olmayan ailə üzvlərindən yararlanacağı təəssüratlarını gücləndirib.
