Rusiya və Suriya hərbi hava təyyarələri Hələbdə yerləşən xəstəxanalara zərbələr endirib. Bu iddia ilə çıxış edən ABŞ rəsmiləri bunu dayandırması üçün rəsmi Moskvadan Əsəd hakimiyyətinə təsir etməyə çağırır.
BMT-nin Suriya üzrə xüsusi nümayəndəsi, qiyamçılara məxsus olan ərazilərdə müqavimət ocaqlarını tam məhv etmək üçün prezident Bəşər Əsədin irimiqyaslı hərbi əməliyyatlara başlamasının mümkünlüyü haqda xəbərdarlıq edib. Onun sözlərinə görə bu, ABŞ-da yeni prezident yanvarın 20-si posta keçdikdən sonra baş verə bilər.
ABŞ Dövlət Departamentinin rəsmi nümayəndəsi Con Kirbinin dediyinə görə, onlar bombalanma haqqında məlumatları "Sərhədsiz həkimlər", İnsan haqları üzrə Suriya monitorinq mərkəzi kimi humanitar yönlü mərkəzlərdən, həmçinin Amerika hökumətinin əlaqə saxladığı fərdi insanlar və kəşfiyyat vasitələrindən əldə edirlər: "Bizim orda nə baş verməsi haqqında aydın təsəvvürümüz var... Kimsə orda xəstəxananı bombalayıb. Biz bilirik ki, bu nə koalisiyadır, nə də ABŞ. Yerdə iki tərəf qalır- Suriya ya da Rusiya və ya başqaları".
Bunlarla yanaşı Kibri deyib ki, Rusiya Bəşər Əsəd hakimiyyətini dəstəklədiyinə görə istənilən halda məsuliyyət daşıyır. O əminliklə qeyd edib ki, Rusiya Suriya prezidentinə təsir gücündən istifadə edərək qanlı hadisələri dayandırmaq iqtidarındadır: "Biz ötən dəfə gördük ki, ruslar bunu istəyəndə onlar Əsədə güclü təsir edə bilirlər".
Rəsmi Moskva deyilənləri "həyasız yalan" adlandıraraq onlara qarşı irəli sürülən iddiları qətiyyətlə rədd edir və Rusiya hərbisi əmin edir ki, artıq bir aya yaxındır ki, onlar Hələbə zərbə endirmir.
Bu həftənin əvvəlində Suriya hökuməti BMT-nin Hələb şəhərindəki ağır döyüşləri dayandırması təklifini rədd edib. Bu təklif şərq bölgələrdəki üsyançı qüvvələrin çıxarılmasından sonra müxalif qüvvələrin qorunub saxlanamasına xidmət edirdi.
BMT-nin xüsusi nümayəndəsi Stefan de Mistura isə Bəşər Əsədə tabe olan hərbi qüvvələrin Hələbin şərq hissəsinə doğru irimiqyaslı əməliyyata başlaması ehtimalları haqda narahatlıqlarını ifadə edib: "Yanvarın 20-nə qədər baş verənlər məni həddindən çox narahat edir".
Onun sözlərinə görə münaqişənin artması hələ də Hələbdə yaşayan 275 min dinc sakin üçün ən faciəvi nəticəyə gətirib çıxara bilər.
