Dağlıq Qarabağ münaqişəsinin həllinin bütün türk-islam dünyasına faydası olacaq. Trend-in məlumatına görə, bunu jurnalistlərə Bakıda səfərdə olan Türkiyə Prezidentinin baş müşaviri Yalçın Topçu deyib. Onun sözlərinə görə, Dağlıq Qarabağ probleminin həlli Azərbaycanın sürətli inkişafına səbəb olacaq.
NATO Parlamet Assambeyasının 62-ci sessiyası çərçivəsində keçirilən Müdafiə və təhlükəsizlik komitəsinin iclasında erməni millət vəkilinin sualına layiqli cavab verən Türkiyənin xarici işlər naziri Mövlud Çavuşoğlunu təbrik etdiyini bildirən Y.Topçu qeyd edib ki, erməni deputat yenə yalan danışmaq istəyib: “Amma Mövlud Çavuşoğlu onların necə yalancı və təcavüzkar olduqlarını üzlərinə söylədi. Ermənistan bütün dünyanın gözü qarşısında Azərbaycan torpaqlarının 20 faizini işğal edib. Ermənistan Xocalıda bizim uşaqlarımızı, qadın və qocalarımızı öldürüb. Onlar işğalçıdırlar və soyqırım törədiblər”.
Baş müşavir həmçinin bildirib ki, Ermənistan rəhbərliyinin əli uşaqların qanına batıb və M.Çavuşoğlu bunu onların üzünə söylədi.
“Azərbaycan Prezidenti İlham Əliyevin Ankaraya verdiyi dəstəyi türk-islam dünyası Dağlıq Qarabağ münaqişəsi ilə bağlı göstərsə, bu işğal davam etməz”. Bunu da Türkiyə Prezidentinin baş müşaviri Yalçın Topçu deyib.
O qeyd edib ki, Ankaranın bu məsələyə münasibətini digər ölkələr də göstərməlidir.
Baş müşavirin sözlərinə görə, türk-islam dünyası ölkələri güclənmələri üçün yollar axtarmalı, bir-birinə dəstək verməlidir.
Y.Topçu bildirib ki, bütün qardaş ölkələr Azərbaycan və Türkiyə arasındakı dostluq və həmrəylikdən nümunə götürməlidirlər.
"Rusiya Ermənistana dəstəyini dayandırsa və Dağlıq Qarabağ probleminin nizamlanmasına Azərbaycanın haqlı mövqeyindən yanaşsa, daha çox şey qazanar" deyə Yal.Topçu bildirib. O qeyd edib ki, əgər Rusiya azərbaycanlı məcburi köçkünlərin, o cümlədən uşaqların Qarabağda öz evlərinə qayıtmasına kömək etsə, 1,7 milyardlıq türk-islam dünyasının nəzərində mövqeyi yüksələr: "İnanıram ki, Rusiya da bu düşüncədədir".
Baş müşavirin sözlərinə görə, Türkiyə yaxın zamanlarda azərbaycanlı məcburi köçkünlərin öz ata-baba yurdlarına qayıtmaları üçün lazımi addımların atılacağına, Ermənistanın haqsız işğalına son qoyulacağına inanır.
O bildirib ki, bütün beynəlxalq təşkilatlar Ermənistanın Azərbaycan torpaqlarını işğal etdiyini söyləyir. Ancaq həyasızcasına işğal 20 ildir ki, davam edir. Y. Topçu deyib ki, Xocalı soyqırımı dünyanın gözləri qarşısında törədilib: “Bu münaqişə olmasa, Azərbaycan Asiyanın və bölgəsinin rifahının açarı olacaqdı. Qarabağ münaqişəsi ilə Azərbaycanın qarşısını almağa çalışırlar. Asiyanın rifahı Azərbaycanın ayağa qalxması ilə bağlıdır, Türkiyənin ayağa qaxması Balkanların, Orta Şərqin, Afrikanın ayağa qalxması deməkdir. Türkiyə ayaq üstdə olarkən kimlərsə bölgədə rejimləri dəyişdirə bilməz. 15 iyulda bütün cəhdlər Türkiyəni diz çökdürməyə hesablanmışdı. 15 iyulda istiqlalımıza və istiqbalımıza sahib çıxdıq, mədəniyyət coğrafiyamıza, məzlum millətlərə ümid olduq”.
"Türkiyə zaman-zaman Avropa İttifaqına daxil olmağa cəhd göstərdi. Lakin Türkiyənin heç vaxt Aİ-yə ehtiyacı olmayıb, əksinə, İttifaqın Türkiyəyə ehtiyacı var". Bunu da Türkiyə Prezidentinin baş müşaviri deyib. O qeyd edib ki, Avropanın Türkiyənin gücünə, yeraltı və yerüstü sərvətlərinə, insan resurslarına ehtiyacı var.
Y.Topçu bildirib ki, Aİ ölkələri üçün Şərq, Qafqaz, ərəb, Orta Asiya və Balkan ölkələri ilə möhkəm ticarət və siyasi əlaqələr qurmağın tək yolu Türkiyədir: "Amma görünən odur ki, Avropa Türkiyə ilə əlaqələrini gücləndirmək fikrində deyil".
Baş müşavir əlavə edib ki, PKK, İŞİD, Fəthullah Gülən hərəkatı kimi terror təşkilatlarının arxasında guya Türkiyə ilə strateji əlaqələri olan ölkələr dayanır: "Türkiyə terror dəstələrinin əllərində olan silahlardan bunu gördü. Almaniyada bizim axtarış siyahımızda olan 4500 terrorçu var".
Y.Topçu deyib ki, Aİ-Türkiyə əlaqələri Avropa tərəfinin bundan sonra atacağı addımlardan asılıdır.
”ABŞ ikitərəfli razılaşmaya əməl etməli, NATO üzvü kimi Fətullahçı Terror Təşkilatının rəhbəri Fətullah Güləni Türkiyəyə ekstradisiya etməlidir”. APA-nın məlumatına görə, bu sözləri də Bakıda jurnalistlərə açıqlamasında Türkiyə prezidentinin baş məsləhətçisi Yalçın Topçu bildirib.
Y. Topçu deyib ki, Fətullahçı Terror Təşkilatı (FETÖ) sülh, rifah istəyən bütün dünya ölkələri üçün təhlükəlidir: “ABŞ bu günə qədər bu sahədə öhdəliklərinin heç birini yerinə yetirməyib. İki ölkənin cinayətkarların ekstradisiyası ilə əlaqədar müqaviləsi var. ABŞ bizdən hər hansı cinayətkarı istəyərkən əsla sorğu-sual etmirik. Çünki qarşıdakı ölkə deyir ki, sənin ölkəndə mənim cinayətkar kimi axtardığım birisi var, onu mənə ver. ABŞ da heç nə soruşmadan FETÖ rəhbərini bizə verməlidir. Amma ABŞ indiyə qədər bunu etməyib”.
Donald Trampın prezident seçilmək şansını seçkidən öncə yüksək dəyərləndirdiyini və proqnozunun doğrulduğunu söyləyən Türkiyə prezidentinin baş məsləhətçisi bildirib ki, D. Trampın dünyada və ABŞ-da nələri dəyişdirəcəyini gözləmək lazımdır: “ABŞ-ın özünəməxsus tarixi, dərin siyasəti var. Əgər Donald Trampı özlərinə bənzədərlərsə, məzlum xalqlar üçün heç nə dəyişməz. ABŞ Türkiyənin, yaxud dünyanın məsələləri ilə əlaqədar proseslərə tarixi mövqeləri prizmasından baxır. Donald Trampın isə iddiaları var və o iddialarını həyata keçirib-keçirməyəcəyi məsələsində şübhəliyəm. Çünki Donald Trampa təzyiq edə, onun mövqeyini dəyişdirə bilərlər. Mənim ABŞ və Donald Tramp hökumətindən istədiyim odur ki, ədalətli olsunlar. Əgər ABŞ ədalətsizliyə davam edərsə, mütləq bir gün yerlə bir olar. ABŞ başqa coğrafiyalarda qan tökməyə son qoymalıdır. Ölkələrdə uşaqları, qadınları öldürməkdən vaz keçməlidirlər. ABŞ hazırda islam dünyasında ən az simpatiya duyulan ölkələrdən biridir. ABŞ-ın islam dünyasında simpatiya qazanmasının yolu var. Bunun yolu islam coğrafiyasından əllərini çəkməsi və qan tökməkdən vaz keçməsidir. Trampdan gözləntimiz budur".
