ABŞ-ın növbəti prezidenti seçilmiş Donald Trampın seçki kampaniyası zamanı verdiyi vədlərdən biri üzərində iş gedir. Bunu onun keçid komandasında yüksək vəzifə tutan iki respublikaçı jurnalistlərə bildirib. Söhbət Vaşinqtondakı "bataqlığı qurutmaq"la bağlı vəddir.
Trampın kommunikasiyalar üzrə direktoru Jason Miller və Respublikaçılar Partiyası Milli Komitəsinin sözçüsü Şon Spayser bildiriblər ki, administrasiyada yüksək vəzifə tutacaq şəxslər, qeydiyyatdan keçmiş lobbiçidirlərsə, öncə lobbiçilik işini dayandırmaları barədə sənəd təqdim edəcəklər.
Bundan əlavə, hökuməti tərk edən rəsmilər 5 il ərzində lobbiçiliklə məşğul ola bilməyəcəklər. Bu, onlarla imzalanan müqaviləyə salınacaq. "Bu ona görə vacibdir ki, cənab Trampın məqsədi insanların hökumətdən və hökumətdəki işləri hesabına varlanmasını əngəlləməkdir”, – deyə Spayser bildirib.
Prezident Barack Obama prezidentliyinin ilk günündə administrasiyadan gedən rəsmilərin lobbiçiliklə məşğul olmasına iki illik qadağa qoymuşdu. Ancaq lobbiçiliyə hər hansı qadağa onun necə yazılmasından və tətbiqindən asılıdır. Vaşinqtonda ümumi praktika budur ki, əsas oyunçular lobbiçi kimi qeydiyyatdan keçmir. Onlar konsultant, yaxud məsləhətçi olurlar. Bu isə onlara təcrübə və əlaqələrini Vaşinqtonda məşhur Key-stritə (bu küçədə çox sayda beyin mərkəzi və lobbi qurumunun ofisi yerləşir) daşıyaraq yüzminlərlə dollar qazanmaq imkanı verir.
Trampın komandası lobbiçiləri öz sıralarından kənarlaşdırmaq üzərində çalışır.
Trampın seçki günündən öncəki komandası Key-stritdən olan lobbiçilər və uzun zamandan bəri Vaşinqtonda çalışan ekspertlərlə dolu idi. Bu, Trampın islahat vədlərinə dair suallar doğururdu. O, özüdə keçid komandasının Vaşinqtondan ekspertlərlə dolu olduğunu etiraf edib: "Orada hamı lobbiçidir".
"Elə sistemin problemi də budur – sistem. Biz sistemi təmizləmək üçün çox iş görəcəyik. Ancaq hökumətdə işləyən hər kəs vəzifədən gedən kimi lobbiçiyə çevrilir. Demək istəyirəm, yerin özü başdan-ayağa lobbiçidir", – deyə Tramp gileylənib.
Tramp deyib ki, lobbiçilərdən yaxa qurtarmağı planlaşdırdığı indiki vaxtda onlara güvənmək heç bir ziddiyyət yaratmır: "Deyirəm ki, indi onlar sistemi yaxşı bilirlər. Ancaq biz bunu bitirəcəyik. Buna son qoyulmalıdır".
