ABŞ Dövlət katibi Marko Rubio Tramp administrasiyasının Ukrayna ilə bağlı hazırladığı sülh planının Rusiya tərəfinin təklifləri üzərində qurulduğu açıqlayıb.
Rubio X hesabında yayımladığı açıqlamada bildirib ki, planda eyni zamanda Ukraynanın əvvəlki və hazırkı təklifləri də nəzərə alınıb.
"Sülh təklifi ABŞ tərəfindən hazırlanıb. O, davam edən danışıqlar üçün möhkəm təməl kimi təqdim olunur. Təklif Rusiya tərəfinin təklifləri üzərində qurulub. Eyni zamanda Ukraynanın əvvəlki və hazırkı təkliflərinə də əsaslanır"- deyə Rubio yazıb.
“Financial Times” qəzeti isə yazır ki, ABŞ Dövlət katibi senatorlara, 28 maddəlik sülh planının Tramp administrasiyasının siyasətinə uyğun olmadığını deyərək, bu plandan uzaq durduğunu bildirib. Bundan başqa, planın açıqlandığı gün Rubio X hesabında mesaj paylaşıb və planın onun siyasəti ilə uyğunsuzluq təşkil etdiyinə eyham vurub.
Respublikaçı senator Mayk Raunds bildirib ki, Rubio Halifaksda keçirilən təhlükəsizlik konfransında onlara zəng edib və planın ABŞ-ın tövsiyəsi və ya öz planları deyil, sadəcə Amerika nümayəndələrindən birinə çatdırılan təklif olduğunu açıq şəkildə bildirib.
Müstəqil senator Anqus Kinq isə planı "Rusiyanın arzular siyahısı" adlandırıb.
TAHİR
