Venesuela ilə münasibətlərin pisləşməsi fonunda ABŞ-ın Karib dənizinə qoşun yeritməsi bu ölkəyə müdaxilə ehtimalını yenidən gündəmə gətirib.
Məlumatlara götə, ABŞ Maduro hökumətinə təzyiqi artırmaqla yanaşı yaxın günlərdə Venesuelaya qarşı əməliyyatların yeni mərhələsinə başlamağa hazırlaşır. Yeni əməliyyatların dəqiq vaxtı və ya əhatə dairəsi, eləcə də prezident Donald Trampın bununla bağlı yekun qərar verib-verməmədiyi hələlik açıqlanmır.
İki ABŞ rəsmisi “Ruters”ə bildirib ki, Maduroya qarşı yeni tədbirlərin birinci mərhələsi gizli əməliyyatlar olacaq. Pentaqon və Mərkəzi Kəşfiyyat İdarəsi isə məsələ ilə bağlı şərh verməkdən imtina edir.
Tramp administrasiyanın yüksək vəzifəli bir rəsmisi isə Venesuela ilə bağlı hər hansı bir ehtimalı istisna etməyib."Prezident Tramp ölkəmizə narkotik axınının qarşısını almaq və məsul şəxsləri məsuliyyətə cəlb etmək üçün Amerikanın gücünün hər bir elementindən istifadə etməyə hazırdır", - deyə rəsmi bildirib.
Tramp administrasiyası Maduronun amerikalıları öldürən qanunsuz narkotiklərin tədarükündə roluna qarşı mübarizə aparmaq üçün Venesuela ilə bağlı variantları nəzərdən keçirir. Maduro isə qanunsuz narkotik ticarəti ilə hər hansı əlaqəsini inkar edir.
ABŞ-ın iki rəsmisi “Reuters” agentliyinə bildirib ki, Maduronu devirmək cəhdi də nəzərdən keçirilən variantlar arasındadır. 2013-cü ildən bəri hakimiyyətdə olan Maduro, Trampın onu devirməyə çalışdığını və Venesuela vətəndaşları və hərbçilərin belə bir cəhdə müqavimət göstərəcəyini iddia edir.
ABŞ aylardır Karib dənizinə hərbi qüvvə yığmaqda davam edir və Tramp Venesuelada gizli MKİ əməliyyatlarına icazə verib. Bu arada, ABŞ Federal Aviasiya Administrasiyası (FAA) cümə günü böyük aviaşirkətlərə Venesuela üzərindən uçuşlar zamanı "potensial təhlükəli vəziyyət" yarana biləcəyi barədə xəbərdarlıq edib və onları ehtiyatlı olmağa çağırıb. FAA-nın xəbərdarlığından sonra üç beynəlxalq aviaşirkət Venesuela üzərindən uçuşları ləğv edib.
Rəsmilər bildiriblər ki, ABŞ bazar ertəsi qanunsuz narkotik idxal etdiyi iddia edilən “Cartel de los Soles”i xarici terror təşkilatı kimi tanımağı planlaşdırır. Tramp administrasiyası Maduronu “Cartel de los Soles”in lideri olmaqda ittiham edir, Maduro isə bunu rədd edir. Tramp, “Cartel de los Soles”in terror təşkilatı kimi tanımasının ABŞ-a Maduronun Venesueladakı aktivlərinə və infrastrukturuna hücum etməyə imkan verəcəyini deyib, lakin o, diplomatik həll ümidi ilə danışıqları davam etdirməyə hazır olduğunu da bildirib. İki ABŞ rəsmisi Karakas və Vaşinqton arasında danışıqların aparıldığını təsdiqləyib. Bu danışıqların ABŞ əməliyyatlarının vaxtına və ya miqyasına təsir edib-etməyəcəyi isə bəlli deyil...
TAHİR
