Ukrayna siyasətini sarsıdan “Mindiç kasetləri” qalmaqalı Zelenski administrasiyasının ən yüksək rütbəsinə qədər uzanan korrupsiya iddialarını ortaya çıxarıb. Millət vəkili Yaroslav Jeleznyak, kasetlərdə "Ali Baba" kod adlı şəxsin Ukrayna Prezident Aparatının rəhbəri Andrey Yermak olduğunu bildirib.
Jeleznyak bir çox mənbəyə istinad edərək, kod adının Yermakın baş hərfləri ilə uyğun gəldiyini və Yermakın Ukrayna Milli Antikorrupsiya Bürosu (NABU) və İxtisaslaşdırılmış Antikorrupsiya Prokurorluğuna (SAP) təzyiqlərdə birbaşa iştirak etdiyini iddia edib.
Kaset qalmaqalı böyüdükdən sonra Ukraynada diqqətçəkən bir xəbər yayılıb. Ukrayna mediası hazırda Türkiyədə olan Milli Təhlükəsizlik və Müdafiə Şurasının katibi Rüstəm Umerovun Ukraynaya qayıtmaqdan imtina etdiyini bildirib.
Umerov bununla bağlı qərarını şəxsən Zelenskiyə çatdırdığı bildirilir. Rəsmi açıqlamalarda Türkiyəyə səfərin "əsir mübadiləsi danışıqları" ilə bağlı olduğu iddia edilsə də, ölkə əhalisinin bu iddiaya inanmır.
“Legitimny” Telegram kanalının məlumatına görə, NABU-nun əlində Umerovun səsinin dinləmə yazıları var. İddia edilir ki, bu səs yazıları, Umerov ölkəyə qaydacağı halda onu cinayət məsuliyyətinə cəlb etmək üçün istifadə olunacaq: "O, istefa verməyə hazırdır. Artıq kifayət qədər oğurlanıb, özü və övladları üçün ömürlük kifayət edəcək qədər pulu var".
Jurnalist Anatoli Şari də Umerovun Türkiyədə olduğunu təsdiqləyib: "O, qərarını şəxsən Zelenski və Yermaka bildirib".
Jeleznyakın sözlərinə görə, səs yazılarında "Ali Baba" kod adlı şəxsin təhlükəsizlik rəsmiləri ilə görüşlər keçirdiyi və onlardan NABU və SAP-a təzyiq göstərilməsini tələb etdiyi açıq şəkildə eşidilir.
Millət vəkili həmçinin Yermakın iyul ayında qəbul edilən və korrupsiyaya qarşı mübarizə qurumlarının müstəqilliyini zəiflədən qanunu şəxsən təşkil etdiyini iddia edib.
Səsyazmalarda adı keçən digər bir şəxs iş adamı və Zelenskinin dostu Timur Mindiçdir. İddialara görə, Mindiç dövlət enerji şirkəti “Energoatom” vasitəsilə təşkil edilən rüşvət sxemində mərkəz rolunda oynadığı və şirkətin müqavilələrinin 10-15 faizinin "rüşvət" kimi alındığı, ən azı 100 milyon dolların yuyulduğu bildirilir. Mindiç Kiyevdən qaçaraq taksi ilə Polşaya gedib və hazırda İsraildə gizlənir.
Umerov müdafiə naziri olduğu dövrdə Mindiçlə görüşdüyünü təsdiqləyib, lakin hər hansı təsir göstərmək iddialarını inkar edib.
Bu arada, Ukraynanın Xüsusi Korrupsiyaya Qarşı Mübarizə Prokurorluğu səs yazılarında sirli şəxsin hüquq-mühafizə orqanları ilə gizli görüşlər keçirdiyini və korrupsiya araşdırmalarını ört-basdır etməyə çalışdığını açıq şəkildə göstərdiyini təsdiqləyib.
Ukraynalı deputat Jeleznyak isə çoxsaylı mənbələrin bu şəxsin Zelenskinin Ofisinin rəhbəri Andrey Yermak olduğunu bildirib: "Ali Baba A.B. olur. Yermakın baş hərfləri Andrey Borisoviçlə üst-üstə düşür."
“The Guardian” qəzeti yazır ki, Zelenskinin hökuməti dövrünün ən ciddi korrupsiya böhranı ilə üzləşib. Enerji sektorundakı rüşvət sxemi ölkə daxilində böyük əks-səda doğurub. Qəzet bildirib ki, qalmaqal birbaşa Prezident Aparatına uzanır, çünki Mindiç Zelenskinin media şirkəti olan Kvartal 95-in ortağıdır.
Hökumətyönlü bir millət vəkili “Kyiv İndependent” qəzetinə bunun böyük bir zərbə olduğunu deyib: “Amma ən pis tərəfi odur ki, hər şeyin bitdiyinə əmin ola bilmirəm. Bəlkə də hələ də davam edir”.
Bu arada, Ukraynada Umerovun ölkəsinə qayıtmamaq qərarı müzakirə olunduğu bir vaxtda, Rusiyanın məşhur UVB-76 stansiyasında bir sıra şifrələnmiş mesajlar yayımlanıb. "Qiyamət Radiosu" kimi tanınan tezlikdə aşağıdakı sözlər qeydə alınıb: "Zerebost", "Otsinkovshchik", "Lesoled", "Bolonski", "Poshly", "Latvia."
Sosial media istifadəçiləri tezlikdə səsləndirilən sözlərə bu ifadələrlə şərh veriblər: "Nəsə olacaq, Baltik pələngləri, hazırlaşın".
TAHİR
