İcbari tibbi sığortanın tətbiqinə sayılı günlər qalır. Məlumdur ki, gələn ilin əvvəlindən Azərbaycanda səhiyyə xidmətləri sahəsində mühüm yeniliklər gözlənir. İcbari tibbi sığortanın tətbiqi bu sahədə xidmət görən və göstərən hər iki tərəfin maraqlarına xidmət etməlidir. İcbari tibbi sığortanın tətbiqi xəstələrlə yanaşı, həkimlərin də marağına səbəb olur. Həkimlər daha çox aylıq məvaciblərinin hansı səviyyədə olacaqları ilə maraqlanırlar.
İcbari Tibbi Sığorta üzrə Dövlət Agentliyinin regional mərkəzlərlə iş şöbəsinin müdiri Şükür Eyvazov media nümayəndələrinə açıqlamasında bildirib ki, icbari tibbi sığorta tətbiq ediləcək tibb müəssisələrində maaşlar həkimin tutduğu vəzifə və təcrübəsinə uyğun, Vahid Tarif Cədvəlinə əsasən müəyyən olunacaq: “Həvəsləndirici əlavələr də olacaq. Əgər həkim rayon və kənddə işləyirsə, onun yaşadığı yerdən işlədiyi kənd məntəqəsinə qədər məsafə 15-20 kilometrə qədərdirsə, həvəsləndirici əlavə alacaq. Məsafə 20 kilometrdən yuxarıdırsa, ayrı həvəsləndirici əlavə tətbiq olunacaq. Ən əsası isə həkimin baxdığı xəstə sayına görə də əlavələr olacaq.
Ş.Eyvazov qeyd edib ki, pilot layihədə 7-8 min manat maaş alan həkimlər olub və bu, onların səhiyyənin qanunlarını aşmadan yüksək xidmət göstərməsi ilə bağlıdır. İcbari sığortanın tətbiqindən sonra həkimlərin göstərdiyi xidmət, tibb müəssisələrində aldıqları maaş və iş təcrübəsinə uyğun əməkhaqqı alması həkimlərin narazılığına səbəb olub. Həkimlər bildirirlər ki, əməkhaqqı onların iş təcrübəsinə görə deyil, göstərdiyi xidmətə görə təyin olunmalıdır.
“Bir həkim 7-8 min maaş alıb, digəri kənarda qalacaqsa, bu, icbari tibbi sığorta yox, alver olar”
Professor Adil Qeybulla bildirdi ki, pilot layihənin nəticələrindən həkimlərin əksəriyyəti razı qalmayıb: “Səbəb isə icbari tibbi sığortaya xarakterik olmayan yanaşmalardır. İcbari tibbi sığorta ilə bağlı dünya təcrübəsindən yararlanmaq lazımdır. İcbari tibbi sığortada, ilk növbədə, fiksə olunmuş qiymətlər tətbiq edilməlidir. Məsələn, 1500-2000 ilkin maaş sistemi olmalıdır. İlkin maaş sistemi konkret normativlərə əsaslanmalıdır. Həkim 10 xəstəyə baxa bilər. Xəstələrin sayı 10-u ötərsə, əlavə ödəniş olur. Yəni növbədə 3 həkim var. Onların hərəsi 10 xəstəyə baxır. Əgər artıq xəstə gələrsə, yenə onlar arasında bölünür. Yoxsa, xəstələr bir həkimə yönəldilir və o, 7-8 min maaş alır, digərinə isə 220 manat maaş vermək olmaz. Ümumiyyətlə, yaxşı və pis həkim kimi ayırmalar yalnız bizim Azərbaycana məxsusdur. Bu cür yanaşmadan, təbii ki, həkimlər narazı qalacaqlar. Əgər sığortanın tətbiqindən sonra belə nəticələr ortaya çıxsa, vətəndaşa xidmət etməyəcək. Bir həkim 7-8 min maaş alıb, digəri kənarda qalacaqsa, bu, icbari tibbi sığorta yox, alver olar. Əvvəlki sovet səhiyyəsi kimi olar. İcbari tibbi sığortanın tətbiqində, ilk növbədə, həkimlər arasında peşəkarlığın artırılması, xəstəyə müştəri kimi baxılmaması mühiti yaradılmalıdır”.
Günel CƏLİLOVA
