Türkiyə mətbuatının yazdığına görə, adıçəkilən ölkədə dönərxanalarla bağlı yeni fırıldaq ortaya çıxıb. Belə ki, ucuz baş gəlsin deyə, dönərə quyruq yağı əvəzinə, sabun istehsalında istifadə olunan yağ vurulur. Bu xəbərin yayılması əhali arasında böyük təlaşa səbəb olub. Artıq Türkiyədə dönər almaq istəyənlər qidanın keyfiyyətli olduğunu bilmək üçün dönərin tərkibini əks etdirən sənəd tətbiq olunmasını tələb edirlər.
Belə bir iddia var ki, analoji hal ölkəmizdə də yaşanır. Dönər satışı ilə məşğul olanlar dönərin ucuz başa gəlməsi üçün ona quyruq yağı deyil, sabun istehsalında istifadə olunan yağ vururlar.
“İstisna olunmur ki, Azərbaycanda da satılan dönərlərin tərkibinə sabun istehsalında istifadə olunan yağdan vurulsun”
Azad İstehlakçılar Birliyinin sədri Eyyub Hüseynov bildirdi ki, Azərbaycanda nəinki beləsi, hətta bundan təhlükəli hallar ola bilər: “Konkret olaraq şikayət olmayıb. Lakin istisna olunmur ki, bu, Azərbaycanda da ola bilər. Bir yerdə ki, nəzarət yoxdur, dönərlər haradan, necə gəldiyi bilinməyən ətlərdən hazırlanırsa və bu dönərxanaların 80 faizi qeydiyyatdan keçməyibsə, nəinki Türkiyədəki hadisə, hətta ondan betəri də baş verə bilər”.
Birlik sədrinin sözlərinə görə, ölkədə dönərləri qanuni hazırlayan iki müəssisə var. Bu şirkətlər əti mənfi 40 dərəcə dondururlar. Səbəb də bütün heyvan xəstəliklərinin ətlərin içərisində ölməsidir: “Şişə taxılmış və dondurulmuş şəkildə dönərxanlara gətirilir. Dönərxanların heç bir faizi də oradan ət almır. Bu şirkətlərdə həm quş dönəri, həm də iribuynuzluların dönərini hazırlamağa icazə var. Dönərxanaların bu şirkətlərdən ət almamasının səbəbi daha ucuz ət axtarışında olmalarıdır. Biz dönərxanalara getsək, orada sertifikat asıldığını görərik. Bu sertifikatın o dönərə aidiyyəti yoxdur. Hansısa firmadan bir az ət alıb, sertifikat tələb edirlər. 3 il öncə dövlət orqanları dönərxanların standartlarını hazırlayıb. Bu sənədlərdə hər şey əks olunub. Ancaq bu tələblərin 90 faizinə əməl olunmur. Yəni nəzarət zəifdir, istehlakçı nəzarəti də zəifdir.
Bu səbəbdən də istehlakçılara tövsiyə edərdim ki, dönərxanalara gedəndə təhlükəsiz dönər almaq istəyirlərsə, sertifikat tələb etsinlər. O müəssisədən gələn dönərlər xüsusi yeşiklərə qablaşdırılır. Buraxılma tarixi və son yararlı olma müddəti göstərilir. Hansısa problemlə üzləşsələr, 1003 telefon xətti ilə AQTA-ya müraciət edə bilərlər”.
Günel CƏLİLOVA
