29/01/2020 18:01
728 x 90

Arıqladan dərmanların son vaxtlar kütləvi zəhərlənmələr törətdiyi barədə fikirlər dolaşır...

Rafis Bağırov: “Qadınlar arıqlatma dərmanlarını normadan artıq qəbul etdikləri üçün onlarda zəhərlənmə baş verir”

img

Son illər dəbə minən arıqlama tendensiyası xüsusilə qadınlar arasında geniş yayılıb. Bir sıra hallarda qadın və qızların arıqlama üsulu kimi arıqlatma dərmanlarını, arıqlatma çay və kofelərini seçdiyini müşahidə edirik. Paytaxt apteklərindən aldığımız məlumata görə, qadın və qızlar əsasən arıqlatma dərmanları almaq, yaxud sifariş vermək üçün onlara yaxınlaşırlar. Onlayn dərman saytlarında da ən çox tələbat olan məhsulların arıqlatma dərmanları olduğu deyilir.   

İctimaiyyət arasında dolaşan qeyri-rəsmi məlumatlara görə, son dövrlər Azərbaycanda qadınlar arasında sıx-sıx müşahidə edilən zəhərlənmə hallarının bir çoxu qidalardan deyil, arıqlatma dərmanlarının istifadəsi nəticəsində baş verir. Yəni arıqlatma dərmanlarından davamlı istifadə edən qadınların müəyyən bir qismi bu dərmanlardan zəhərlənir.

Hətta bir neçə gün əvvəl Bakı Dövlət Universitetinin zəhərlənən tələbələrinin bu vəziyyətə düşməsinə səbəb kimi arıqlama dərmanlarından istifadə edilməsi göstərilir. Dəqiqləşdirilməmiş məlumatlara görə, o qızların arıqlatma dərmanı içməsi ilə bağlı versiyalar var. Biz onların hansı vasitə ilə zəhərləndiyini bilmirik, heç tibbi ekspertiza da qızların zəhərlənmə səbəbilə bağlı doğru-düzgün nəticə təqdim etməyib.

Qız və qadınların arıqlatma dərmanlarından zəhərlənməsi nə dərəcədə real görünür? Arıqlatma dərmanları can ala bilərmi?

Mütəxəssislər hesab edirlər ki, arıqlatma dərmanlarından istifadə etmək, arıqladıcı çay və kofeləri mütəmadi olaraq qəbul etmək insan orqanizmində böyük fəsadlar yaradır, maddələr mübadiləsini pozur, bəzən insana bioloji, psixi problem yaradır. Mütəxəssislər hesab edirlər ki, arıqlatma, eləcə də hamiləliyi pozan dərmanlardan istifadə qadınlara hərtərəfli zərər vurur, bu hətta onların zəhərlənməsinə, bəzən isə həyatlarını itirməsinə səbəb olur.

  • “İstənilən dərmanın qəbulunda doza həddi aşılarsa, problem yarada bilər”

Tanınmış həkim Rafis Bağırov “Bakı-Xəbər”ə bildirdi ki, ümumiyyətlə, normal şəkildə qəbul edilərsə, arıqlatma dərmanının heç bir zəhərləyici risqi yoxdur. Bu dərmanların insanları arıqlatmasının mümkün olmadığını deyən mütəxəssis qeyd edir ki, sözügedən dərman vasitələrinin tərkibində beyində yerləşən aclıq sistemini blokadaya almaq gücündə olan maddələr var, o maddələr də insanda iştahasızlıq yaradır, bunun da nəticəsində arıqlama baş verir. R.Bağırov qeyd etdi ki, yalnız o dərmanı qəbul etməklə və bol qidalanma ilə arıqlamaq mümkün deyil. Bununla belə, R.Bağırovun sözlərinə görə, arıqlatma dərmanları o zaman zəhərlənməyə səbəb ola bilər ki, o normadan artıq qəbul edilsin: “Arıqlatma dərmanları o zaman zəhərlənməyə səbəb ola bilir ki, istifadəçi onu normadan artıq qəbul etsin. İstənilən dərmanın qəbulunda doza həddi aşılarsa, problem yarada bilər. Ümumiyyətlə, istənilən vitamini də normadan artıq qəbul etsən, zəhərlənmə verə bilər. Yaxud adicə suyu normadan artıq istifadə etsək, su zəhərlənməsi baş verər. O zəhərlənmə başqa zəhərlənmədən ağır olur. Görünür, qadınlar arıqlatma dərmanlarını normadan artıq qəbul etdikləri üçün onlarda zəhərlənmə baş verir, normada qəbul etsələr, heç bir zəhərlənmə baş verməz” - deyə R.Bağırov qeyd etdi.

İradə SARIYEVA

Son xəbərlər