29/01/2020 18:32
728 x 90

Şəhidlərimizin müqəddəs statusunu da ikiyə bölürlər - hərbi şəhid, mülki şəhid?

Nəzakət Məmmədova: “Mən uzun illərdir şəhidlər arasında ayrıseçkilik yaratmaq istəyən, bu istiqamətdə xüsusi təbliğat quran insanlara...”

img

Şəhidlik Tanrı mərtəbəsində ən ali məqamdır. Bu məqama, bu mərtəbəyə ucalmaq hər adama nəsib olmur. Azərbaycanın ərazi bütövlüyü uğrunda canını fəda edən də, evində, həyətində oturduğu, təsərrüfatında işlədiyi yerdə erməni gülləsindən həlak olan da şəhiddir. Çünki Ermənistan Silahlı Qüvvələri yalnız Azərbaycan Silahlı Qüvvələrinin mövqelərini atəşə tutmur, həm də hədəf olaraq cəbhəyanı ərazilərimizdə yaşayan dinc sakinlərimiz, vətəndaşlarımızı seçirlər, qəbiristanlıqlarımızı atəşə tuturlar.

Bu gün Azərbaycanda kifayət qədər hərbi şəhid var ki, onlar əllərində silah düşmənə qarşı mübarizədə həlak olublar, onlarla yanaşı, saysız mülki şəhid də var, bu şəxslər erməni gülləsindən dünyalarını dəyşiblər. Mülki şəhidlər arasında uşaqların da sayı az deyil.

Çox təəssüf ki, son illər ictimayyətdə bəzi insanlar, hətta onlar arasında yüksək çinli hərbçilər də var, Azərbaycan şəhidlərinə qarşı bölücülük təbliğatı aparırlar. Bu insanlar deyirlər ki, erməni işğalçılarının atdığı güllədən həlak olan mülki şəxslər, qadınlar, kişilər, uşaqlar şəhid sayılmamalı, şəhidlik statusu yalnız ermənilərlə döyüşərkən həlak olanlara verilməlidir. Bu səhv yanaşmadır və kökündən yanlışdır, birbaşa şəhidlərimizin bölünməsinə hesablanıb. Bu düşüncə sahiblərini heç cür anlamaq olmur.

Bu barədə danışarkən yadımıza illər əvvəl redaksiyamıza gələn, oğlu erməni gülləsindən həlak olan, lakin bəzi məmurların özbaşınalığı nəticəsində övladına şəhidlik statusu ala bilməyən ata ilə söhbətimiz düşdü. O atanın hansı rayondan gəldiyi, oğlunun hansı cəbhə bölgəsində şəhid olduğunu dəqiq yadımızda saxlaya bilməmişik, amma hadisə olduğu kimi yadımızdadır. Ata bildirirdi ki, oğlu əlinə silah alıb düşmənə qarşı vuruşmasa da, cəbhənin qaynar nöqtələrinə gedib, orada yaralı əsgərlərə kömək edib, şəhid edilən hərbçilərimizi səngərdən çıxarmağa köməklik göstərib, belə vəziyyətlərdən birində oğluna da erməni gülləsi dəyib və o həlak olub. Ata oğluna şəhidlik statusu alana qədər döymədiyi qapı qalmayıb, mətbuatın köməyilə o, oğluna şəhid statusu ala bilmişdi. Bu cür hallar təəssüf ki, mövcuddur.

“Dəfələrlə müəyyən iradlarla üzləşmişəm ki, siz cəbhədə həlak olmayanları siyahıya alıb, onların adlarını əbədiləşdirirsiniz”

Respublika “Xatirə Kitabı” redaksiyası Azərbaycanın ərazi bütövlüyü uğrunda şəhid olan, itkin və girov düşən vətəndaşlarımızın xatirəsini əbədiləşdirmək üçün böyük layihələr həyata keçirib.

Bu səbəbdən də mövzu ilə əlaqədar Respublika “Xatirə Kitabı” redaksiyasının baş redaktoru, Azərbaycan Yazıçılar Birliyinin üzvü Nəzakət Məmmədova ilə əlaqə saxladıq. N.Məmmədova “Bakı-Xəbər”ə bildirdi ki, bəzən müəyyən adamlar haqsız olaraq şəhidlərimizə qarşı bölücülük edirlər. “Bu mövzunu gündəmə gətirməyiniz çox yerinə düşdü. Çox sevindim ki, siz bu məsələ ilə bağlı birbaşa ünvana müraciət etdiniz. Bu çox ağrılı haldır və məni hər zaman ciddi narahat edir. Bilirsiniz ki, “Xatirə Kitabı” redaksiyası olaraq, müharibədə şəhid olan, əsir, itkin düşən vətəndaşlarımızla bağlı ensiklopedik məlumatlar toplayıb, onları işıqlandırırıq. Bu istiqamətdə “Xatirə Kitabı”nın bir neçə cildi işıq üzü görüb. “Xatirə Kitabı” redaksiyasının rəhbəri kimi dəfələrlə müəyyən iradlarla üzləşmişəm ki, siz cəbhədə həlak olmayanları siyahıya alıb, onların adlarını əbədiləşdirirsiniz, mənə yönələn bu irad nə dərəcədə düzgündür? İstənilən vətəndaşımız, istər çoban olsun, istər əkinçi, istərsə də evdar qadın, fərqi yoxdur, erməni gülləsindən həlak olubsa, o, birmənalı olaraq, şəhiddir. Bu vətəndaşlarımız əllərinə silah alıb erməni ilə vuruşmayıblar, amma evlərində, həyətlərində durduqları yerdə Ermənistan Silahlı Qüvvələri tərəfindən qətlə yetiriliblər. Biz erməni gülləsindən həlak olan ikiyaşlı Zəhraya və onun nənəsinə necə şəhid deməyə bilərik? Ermənistan Silahlı Qüvvələrinin atdığı güllə nəticəsində həlak olan həm mülki sakinlər, dinc insanlar, həm də hərbçilər şəhiddirlər. Mən uzun illərdir şəhidlər arasında ayrıseçkilik yaratmaq istəyən, bu istiqamətdə xüsusi təbliğat quran insanlara qarşı mübarizə aparıram. Mən erməni gülləsindən həlak olan, ermənilərin torpaqlarımıza təcavüzü nəticəsində şəhid olan, itkin düşən, girov götürülən vətəndaşlarımızın hamısının adını əbədiləşdirməyi özümə borc bilirəm, bu işi də həyata keçirirəm”.

N.Məmmədova qeyd etdi ki, hətta bir müddət əvvəl “Xatirə Kitabı”nın xüsusi buraxılışının təqdimatında da yüksək çinli hərbçilərdən biri ona öz iradını bildirib. “Bu tədbirdə yüksək çinli bir hərbçi də mənə sual verdi ki, sizin çobanı da, evdar qadını da, təsərrüfatında işləyərkən həlak olan insanı da xüsusi buraxılışa daxil etməyiniz nə dərəcədə düzgündür? Mən də ona açıq şəkildə bildirdim ki, o insanların hamısı Ermənistan ordusunun açdığı atəş nəticəsində həlak olub. Bu insanlar düşmən gülləsindən həlak olublarsa, şəhiddirlər, bunun başqa adı yoxdur. Hesab edirəm ki, bəzi insanların şəhidlərimizi mülki və hərbi şəhidə bölməsi doğru deyil, bu, erməni gülləsindən həlak olan vətəndaşlarımızın ruhunun incidilməsidir” - deyə N.Məmmədova qeyd etdi.

Ermənistan ordusunun əsas hədəflərindən biri cəbhəyanı rayon və kəndlərin sakinləridir. Ermənilərin atəşkəs dövründə saysız mülki vətəndaşımızın canına qıydığını deyən N.Məmmədovanın fikrincə, biz mülki vətəndaşlarımızın erməni gülləsindən şəhid olduğu faktını daha geniş səviyyədə gündəmə gətirməliyik və Ermənistan ordusunun hədəfinin dinc Azərbaycan vətəndaşı olduğunu mütəmadi olaraq beynəlxalq ictimaiyyətə çatdırmalıyıq.

İradə SARIYEVA

Son xəbərlər