12/12/2019 17:39
728 x 90

Bakıda akademikin evinin altında rəzalət - yüzdən çox müraciəti bloklayan kimlərdir...

img

Bakıda bəzi binaların zirzəmilərində gecə klublarının, barların mövcud olması heç kəs üçün gizlin deyil. Bir çox hallarda bar və gecə klublarında səsləndirilən musiqinin, eləcə də müştərilərin səsindən bina sakinlərinin gecə yuxusuna əməlli-başlı haram qatılır. 

AMEA Fizika İnstitutunun əməkdaşı, Avropa Təbiət Elmləri Akademiyasının akademiki, Rusiyada nəşr olunan “Beynəlxalq Alternativ Energetika və Ekologiya” jurnalının redaksiya kollegiyasının üzvü, fizika-riyaziyyat elmləri doktoru, professor Qüdrət İsaqov öz “Facebook” hesabında yaşadığı binanın zirzəmisində fəaliyyət göstərən gecə klubunun fəaliyyətinin dayandırılması ilə bağlı Prezident İlham Əliyevə, Birinci vitse-prezident Mehriban Əliyevaya, Məhkəmə Hüquq Şurasının sədri Fikrət Məmmədova, Ali Məhkəmənin sədri Ramiz Rzayevə, Bakı Apelyasiya Məhkəməsinin sədri İman Nağıyevə, Daxili İşlər naziri Vilayət Eyvazova, Bakı Şəhər İcra Hakimiyyətinin başçısı Eldar Əzizova, Binəqədi Rayon İcra Hakimiyyətinin başçısı Elxan Allahverdiyevə müraciət edib.

Gecə barının sakinlərə yaşatdığı problemlərlə bağlı ölçü götürülməsi üçün əlaqədar qurumlara 113 müraciət etdiyini qeyd edən Q.İsaqov bunları yazıb: “Sizdən xahiş edirəm, gecə barını bağlamaqla hər gün binamızın zirzəmisində gecə saat 2, 3, 4, 5-ə qədər davam edən səs-küyün qarşısını alasınız!

Mən ailəmlə birlikdə Binəqədi rayonu, Naxçıvani küçəsi, 39A saylı binanın birinci mərtəbəsində yerləşən 3-cü mənzildə yaşayıram! Nəzərinizə çatdırıram ki, binamızın zirzəmisini özəlləşdirən şəxs zirzəmimizin 17 dəmir-beton panelində dağıntılar yoluyla qapı-pəncərələr açıb. Azərbaycan Respublikasının Fövqəladə Hallar Nazirliyi binamızın zirzəmisində törədilən dağıntılar nəticəsində hər an binamızın uça biləcəyi, sakinlərin həyatı üçün qorxulu nəticələr törədəcəyi haqda müxtəlif vaxtlarda 3 akt tərtib edib”. Q.İsaqov, həmçinin, bildirir ki, Binəqədi Rayon Məhkəməsi sözügedən binanın zirzəmisini dağıdan şəxsin maliyyə vəsaiti hesabına zirzəmimizin ilkin layihəsinə qaytarılması haqqında qətnamə qəbul edib. “Bunlarla yanaşı, binamızın zirzəmisində sutka boyunca fəaliyyət göstərən gecə barı da açılıb ki, bu da mənim və ailəmin, digər insanların istirahət etməsinə, yatmasına imkan vermir! Hər gün binamızın zirzəmisində gecə saat 2, 3, 4, 5-ə qədər səs-küydən yata bilmirik! Hər gecə 3-4 dəfə polis çağırırıq. Nəzərinizə çatdırıram ki, mən bu haqda DİN-in 102 “qaynar xətt”inə 100 dəfədən çox zəng etmişəm.

Sizdən xahiş edirəm, asayişin, əminamanlığın qorunması naminə gecə barını bağlatdırasınız! Sizdən xahiş edirəm, gecə barının küçə tərəfindən zirzəminin divarını dağıtmaqla, qanunsuz açılmış qapının üstündə tikilmiş və mənim pəncərəmin bərabərinə qədər yüksəldilmiş çardağı sökdürəsiniz!

Sizdən xahiş edirəm, binamızın 100 kvadratmetrdən çox işğal edilmiş həyətini azad etdirəsiniz!

Mənzilimizdən qaçmağa yer axtarırıq. Xahiş edirəm, bizə mənzil verəsiniz!” - deyə Q.İsaqov yazıb.

  • Binəqədi Rayon İcra Hakimiyyəti: “Şikayətçilər tərəfindən bizim quruma rəsmi şəkildə müraciət olunarsa, mütləq şəkildə, vətəndaşların müraciətinə qanuna müvafiq olaraq rəsmi cavab verilə bilər”

Məsələ ilə bağlı Binəqədi Rayon İcra Hakimiyyətinin mövqeyini öyrənmək üçün bu quruma müraciət etdik. Binəqədi Rayon İcra Hakimiyyətindən “Bakı-Xəbər”ə verilən məlumata görə, Q.İsaqov və sözügedən binanın sakinləri gecə barı ilə bağlı bu quruma heç bir müraciət etməyiblər: “Bu məsələ ilə bağlı sakinlər tərəfindən Rayon İcra Hakimiyyətinə hər hansı bir rəsmi məktub, müraciət daxil olmadığından, İcra Hakimiyyətindən onlara cavab verilməyib. Şikayətçilər tərəfindən bizim quruma rəsmi şəkildə müraciət olunarsa, mütləq şəkildə, vətəndaşların müraciətinə qanuna müvafiq olaraq rəsmi cavab verilə bilər. Yəni İcra Hakimiyyətinə bu barədə heç bir rəsmi məlumat daxil olmayıb. Eyni zamanda, həmin binanın zirzəmisində gecə klubunun, barın yaradılması, fəaliyyəti ilə bağlı hər hansı bir narahatlıq varsa, bunu yaradan özəl sahibkardır. O zaman bina sakinləri ya fərdi, ya da kollektiv şəkildə hüquq-mühafizə orqanlarına müraciət etməlidirlər. Sakinlər, eyni zamanda, İcra Hakimiyyətinə müraciət edib bildirsələr ki, belə bir hal var və biz bundan narahatıq, İcra Hakimiyyəti də bu müraciəti aidiyyəti üzrə hüquq-mühafizə orqanlarına yönəldə bilər. Bu gecə barı hansısa sahibkarın özəl mülküdür və ondan istifadə etmək üçün onun hüququ var. Əgər onun fəaliyyəti sakinləri narahat edirsə, qeyd edildiyi kimi, ya hüquq-mühafizə orqanlarına, ya da İcra Hakimiyyətinə müraciət edilməlidir”.

İradə SARIYEVA 

Son xəbərlər