15/12/2019 18:12
728 x 90

Magistraturaya qəbulun ikinci turunun ləğv edilməsi ideyasına böyük etirazlar var…

img

Son günlər tələbələr arasında magistraturaya qəbul imtahanlarının II mərhələsinin ləğv olunacağına dair məlumatlar yayılıb. Bəzi tələbələrin sözlərinə görə, müəllimlərin əksəriyyəti onları II mərhələ üzrə hazırlaşdırmaqdan imtina ediblər.

Dövlət İmtahan Mərkəzinin yaydığı məlumatda qeyd olunur ki, magistraturaya qəbul imtahanlarına dəyişikliklərin edilməsilə bağlı yeni qaydalar müzakirə mərhələsindədir. Məlumatda qeyd olunur ki, imtahanda yeniliklərin edilməsi istiqamətində müəyyən təkliflər var. Müzakirələr başa çatdıqdan sonra ictimaiyyətə geniş məlumat veriləcək.

Magistraturaya qəbul imtahanlarının ikinci mərhələsinin ləğv olunması sosial şəbəkələrdə geniş müzakirə olunur. Bakalvr təhsilini davam etdirmək istəyənlər isə bundan narahatlıq keçirirlər.

Ekspertlər təklif edirlər ki, bakalavrların elmə maraq göstərməsi üçün magistraturaya qəbul daha da sadələşdirilməlidir.

  • Kamran Əsədov: “Magistratura imtahanları sadələşdirilsə, daha çox şəxsin magistratura pilləsinə qəbul olunmasına imkan yarana bilər”

Təhsil məsələləri üzrə ekspert Kamran Əsədov bildirdi ki, ikinci mərhələnin ləğv olunması inandırıcı deyil. Onun fikrincə, magistratura imtahanlarının təkmilləşdirilməsinə ehtiyac var: “Birincisi, ona görə ki, 5 il əvvəllə müqayisədə magistratura pilləsinə sənəd təqdim edənlərin sayında kəskin azalma var və müəyyən qədər plan yeri boş qalır. Məhz magistratura imtahanları sadələşdirilsə, daha çox şəxsin magistratura pilləsinə qəbul olunmasına imkan yarana bilər. İkincisi, magistratura imtahanının birinci mərhələsindəki məntiq və informatika fənnindən təqdim edilmiş test tapşırıqları ədalət prinsipinin pozulmasına gətirib çıxarır. Ali məktəblərdə bu fənlər üzrə tədris olunmayan mövzulardan ağırlaşdırılmış test tapşırıqları təqdim olunurdu. Nəzərə alsaq ki, magistratura imtahanının ikinci mərhələsində iştirakçıların ixtisasları üzrə bilik və bacarıqları yoxlanılır, bu zaman ikinci mərhələ ləğv oluna bilməz. sadəcə olaraq, təqdim ediləcək test tapşırlarının sayında, formatında dəyişiklik edilə bilər. Həyata keçiriləcək dəyişiklik növbəti ildə seçim zamanı ballara da təsir göstərəcək. Belə ki, ixtisas seçimi zamanı əvvəlki illərdə formalaşmış balları istiqamət kimi götürəcək bakalavrlar dəyişiklikdən sonra yanıla bilərlər. Bütün hallarda, hesab edirəm ki, magistratura imtahanları ali təhsilin əlçatanlığı və əhatə dairəsinin genişləndirilməsi prinsiplərinin təmin olunması, gənclərin elmə gəlməsi üçün sadələşdirilməli, daha çox imtahan iştirakçılarının dil və ixtisasları üzrə bilik və bacarıqları yoxlanılmalıdır”.

  • Rəşadət Şərifov: “Universitet imtahanları vahid sistemə keçirilərsə…”

Magistratura pilləsi üzrə təlimçi Rəşadət Şərifov isə qeyd etdi ki, bu dəyişikliklərə hələ hazır deyilik: “Belə bir yeniliyin reallaşması üçün bütün universitetlərdə bərabər imtahan mühiti yaratmaq lazımdır. Bəzi ali məktəblərdə imtahanlar testlə, bəzilərində isə yazılı təşkil olunur. İkinci mərhələ əvəzinə universitet ortalaması əsas götürülsə, tələbələr üçün bərabər şarait yaradılmamış olur. Universitet imtahanları vahid sistemə keçirilərsə və qiymətləndirmə tam şaffaf aparılarsa, o zaman ikinci mərhələni ləğv etmək olar”.

  • İlqar Orucov: “Magistraturaya qəbulun ikinci mərhələsinin keçirilməsi vacibdir”

Azərbaycan Gənc Alim, Aspirant və Magistrlər Cəmiyyətinin sədri, fəlsəfə doktoru İlqar Orucov “Bakı-Xəbər”ə açıqlamasında bildirdi ki, magistraturaya qəbulun ikinci mərhələsinin keçirilməsi vacibdir: “Nəzərə almaq lazımdır ki, magistratura həm ali təhsilin davamı, eyni zamanda, elmi tədqiqatlara başlanışın ilk dövrüdür. Bu baxımdan magistraturaya qəbulun ikinci mərhələsinin keçirilməsi əhəmiyyətlidir.

Onu da bildirim ki, imtahan prosesi zamanı imtahan verən şəxs müəyyən səbəblərdən sualların cavabını düzgün qeyd edə bilmir. İstər psixoloji narahatlıq, istərsə də həyəcan və ya səhhətində yaranmış problemə görə imtahan verən şəxs imtahanda qeyd olunan sualları düzgün cavablandıra bilmir. Bu baxımdan magistraturaya qəbulun ikinci mərhələsi ləğv olunmamalıdır”.

Həmsöhbətimiz onu da əlavə etdi ki, magistraturaya qəbulu asanlaşdırmaq lazımdır: “Danılmaz faktdır ki, Azərbaycanda istər bakalavr və ya magistraturaya qəbul olunmaq çox çətindir. Universiteti bitirmək isə çox asandır. Ancaq xarici ölkələrdə isə ali təhsil müəssisəsinə qəbul olunmaq heç də çətin deyil. Müəyyən proqramları mənimsəmiş istənilən şəxs həm bakalavr, həm də magistratura pilləsində təhsil ala bilər. Bu səbəbdən də hesab edirəm ki, universitetlərin qapısı daim gənclərin üzünə açıq olmalıdır”.

Günel CƏLİLOVA

Son xəbərlər