Oktyabrın 29-da Prezident İlham Əliyev Azərbaycan Respublikası Prezidentinin Administrasiyasının strukturunun təsdiqi edilməsi haqqında Sərəncam imzalayıb. Məlum oldu ki, yeni strukturda bəzi dəyişikliklər edilib və bir sıra şöbələr ləğv olunub.
Ləğv olunan şöbələrdən biri də Aqrar siyasət məsələləri şöbəsidir. Qeyd edək ki, həmin günə qədər şöbəyə rəhbərlik edən, eyni zamanda, Prezident İlham Əliyevin aqrar siyasət məsələləri üzrə köməkçisi olan Azər Əmiraslanov vəzifəsindən azad olunub.
Bildirək ki, aqrar siyasətin inkişaf etdirilməsi dövlət siyasətinin əsas prioritetlərindən biridir. Bu sektorun inkişaf etməsi üçün dövlət tərəfindən bir sıra layihələr həyata keçirilib, işlər görülüb.
Maraqlıdır, aqrar siyasət məsələləri şöbəsi niyə ləğv olundu və onu hansı qurum əvəz edəcək?
“…İqtisadi siyasət şöbəsi vasitəsilə prosesin tənzimlənməsi daha məqsədəuyğundur”
İqtisadçı-ekspert Vüqar Bayramov “Bakı-Xəbər”ə açıqlamasında qeyd etdi ki, Prezident Administrasiyasında iqtisadi məsələlərlə bağlı iki şöbə mövcuddur: “Nəzərə almaq lazımdır ki, aqrar siyasət iqtisadi siyasətin tərkib elementidir. Ehtimal olunur ki, Aqrar məsələlər şöbəsi birbaşa İqtisadi siyasət şöbəsinə bağlı olacaq. Onu da deyim ki, iqtisadi siyasətlə bağlı şöbənin olması imkan verir ki, iqtisadi sektora aid olan bölmələrə bu şöbədə nəzarət olunsun”.
Həmsöhbətimizin sözlərinə görə, Aqrar siyasət məsələləri şöbəsinin ləğv olunması və ya birləşdirilməsi gözlənilən idi: “Məlumat üçün bildirim ki, Aqrar siyasət şöbəsi yaradılan zaman bir sıra suallar yaranmışdı. O zaman qeyri-neft sektorunun digər sahələri üçün ayrıca şöbələrin yaradılması müzakirə olundu. Xüsusilə də turizm üçün ayrıca şöbənin yaradılması. Ancaq nəzərə almaq lazımdır ki, aqrar sahə, istərsə də turizm iqtisadiyyatın tərkib elementləridir. İqtisadi siyasət şöbəsi vasitəsilə prosesin tənzimlənməsi daha məqsədəuyğundur. Son illər aparılan araşdırmalar göstərir ki, maliyyələşmə, sığorta, bazara çıxış imkanları aqrar sektorun inkişafını stimullaşdıran və müəyyənləşdirən faktorlardır. Hesab edirəm ki, aqrar sahənin inkişafına kompleks yanaşılması çox vacibdir. Bu yanaşma iqtisadi siyasət çərçivəsində həyata keçirilə bilər”.
Günel CƏLİLOVA
