15/12/2019 17:51
728 x 90

Azərbaycan təhsil sistemində yeni metod - səsli dərsliklər...

Məlahət Mürşüdlü: “...gözdən əlil şagirdlər üçün müvafiq fənlərin əlçatanlığını təmin edir”

img

Dərslik sahəsində həyata keçirilən islahatlar nəticəsində yeni dərslik növləri də yaradılır. Artıq səsli dərsliklərin mobil tətbiqi həyata keçirilərək şagirdlərin istifadəsinə verilib.

Qeyd edək ki, Təhsil Nazirliyi tərəfindən elan olunan təhsildə inkişaf və innovasiyalar üzrə 3-cü qrant müsabiqəsi çərçivəsində orta məktəb şagirdləri üçün ölkəmizdə ilk dəfə olaraq dərsliklərin mobil tətbiqi hazırlanıb.

Məlumatlara görə, 5, 6 və 7-ci sinif  ədəbiyyat dərsliklərini əhatələyən layihə Gəncə şəhərində təhsil ictimaiyyətinə təqdim olunub. Kəlbəcər rayonu 19 saylı tam orta məktəbin ədəbiyyat müəllimi Nofəl Şirinovun müəllifi olduğu bu layihə orta ümumtəhsil məktəblərində təhsil alan şagirdlərlə yanaşı, görmə imkanları məhdud olan uşaqların təhsil imkanlarını genişləndirməyə xidmət edir.

Şagirdlər ədəbiyyat dərsliklərindəki bədii mətnləri səsli formatda www.sesliderslik.az saytıyla yanaşı, bundan sonra mobil tətbiqdən də istifadə edərək rahat bir şəkildə dinləyərək öyrənə biləcəklər.

Android əməliyyat sistemi ilə işləyən mobil qurğularda bu tətbiqi quraşdıraraq uğurla istifadə etmək mümkündür. Gəncə şəhərində yerləşən 11 nömrəli Kəlbəcər tam orta məktəbində keçirilən təqdimat mərasimində iştirak edənlərə layihə haqqında geniş məlumat verilib və bu resurslardan istifadə olunmasının tədris mühitinə qazandırdığı üstünlüklərdən geniş söhbət açılıb. Qeyd edilib ki, sayta daxil olaraq “mobil tətbiqi yüklə” linkindən istifadə edərək, hər bir şagird və müəllim bu resurslardan faydalana bilər.

Layihə rəhbəri bildirib ki, qarşıya qoyulan hədəflərə çatmaq istiqamətində "Səsli dərslik" mobil tətbiqi layihəsi hazırda üç kitabı əhatə edir və gələcəkdə digər dərsliklərin də mobil tətbiqdə yer alması mümkündür.

  • “Dərslik sahəsində mütəmadi olaraq yenilənmələrə ehtiyac var”

Tanınmış təhsil eksperti Məlahət Mürşüdlü bu layihənin tədrisdə innovativ texnologiyaların tətbiqi baxımından yenilik olduğunu dedi. O hesab edir ki, müasir dərsliklərin yeni formatda da təqdim edilməsi günün tələbidir. M.Mürşüdlü hesab edir ki, yalnız gözdən əlillər üçün deyil, həm də lal və karlar üçün də innovasiyalardan istifadə edərək dərsliklər yaradılmalıdır: “Dərslik sahəsində mütəmadi olaraq yenilənmələrə ehtiyac var. səsli dərsliklərin də meydana gəlməsi zəruri idi. Hesab edirəm ki, elektron tədris resurslarının yaradılması və bu resurslara çıxış imkanlarının genişləndirilməsi mühüm haldır. Səsli dərslik resurslarının mobil tətbiqinin genişləndirilməsi tədris sahəsində yenilik olmaqla yanaşı, həm də gözdən əlil şagirdlər üçün müvafiq fənlərin əlçatanlığını təmin edir. Onlar səsli dərsliklərin mobil tətbiqilə çox şey əldə edirlər. Fikrimcə, lal və karlar üçün də dərsliklərin mobil tətbiqinin üsullarını tapmaq və dərslikləri onlar üçün də bu şəkildə əlçatan etmək lazımdır” - deyə M.Mürşüdlü qeyd etdi.

İradə SARIYEVA 

Son xəbərlər