Artıq 2 aydan çoxdur Bakı şəhərinin məktəbəqədər təhsil müəssisələrində sanitar-epidemioloji vəziyyətin öyrənilməsi ilə bağlı Bakı Şəhər İcra Hakimiyyəti və aidiyyəti qurumların nümayəndələrindən ibarət komissiya tərəfindən yoxlamalar aparılır. Qeyd edilən məsələ ilə bağlı Bakı Şəhər İcra Hakimiyyətində geniş tərkibli seminar-müşavirə keçirilib.
Bakı Şəhər İcra Hakimiyyətinin (BŞİH) yaydığı məlumatda qeyd olunur ki, komissiyanın apardığı yoxlamalar nəticəsində uşaq bağçalarında sanitar-epidemioloji vəziyyətin əvvəlki illərlə müqayisədə daha qənaətbəxş olması müəyyən edilib, lakin bununla yanaşı, bəzi bağçalarda müəyyən nöqsanlar aşkarlanıb. Müşavirədə aşkar edilən nöqsanlar, onların aradan qaldırılması yolları geniş müzakirə edilib.
Qeyd edək ki, məktəbəqədər təhsil müəssisələrinin ümumi vəziyyəti ilə bağlı dəfələrlə Bakı Şəhər İcra Hakimiyyəti və digər qurumlar birgə monitorinq aparıblar. Monitorinq zamanı bağçalarda həm sanitar-epidemioloji vəziyyət, eyni zamanda, qidalanma ilə bağlı vəziyyətin normal səviyyədə olmadığı aşkar olunub. Lakin hələ də bu sahədə vəziyyət həll olunmamış qalır.
“…həmin məktəbəqədər təhsil müəssisəsi qanun çərçivəsində cəzalandırılmalıdır”
Təhsil eksperti Nadir İsrafilov qeyd etdi ki, dövlət tərəfindən hər bir uşağın qidalanması üçün qida rasionu müəyyən olunub. Lakin bəzi bağça müdirləri və ayrı-ayrı yerli icra hakimiyyəti orqanları tərəfindən həmin ərzağın böyük əksəriyyəti mənimsənilir: “Beləliklə, həmin qidalar uşaq bağçasına gedib çatmır. Bu problemlə bağlı şikayətlər yetərincədir. Valideynlərin özləri övladlarına evdən ərzaq qoymasa, o zaman uşaqlar keyfiyyətsiz qida ilə qidalanmalı olacaqlar. Təəssüf ki, bu problem əksər dövlət uşaq bağçalarında qeydə alınır. Bu səbəbdən valideynlər özəl bağçaya daha çox meyl göstərirlər”
Həmsöhbətimiz onu da vurğuladı ki, problemin olmaması üçün mütəmadi olaraq uşaq bağçalarında monitorinq keçirilməlidir: “Keçirilən monitorinqlər formal xarakter daşımamalıdır. Hansısa uşaq bağçasında qida rasionuna, eyni zamanda, sanitar-epidemioloji vəziyyətə düzgün riayət olunmursa, həmin məktəbəqədər təhsil müəssisəsi qanun çərçivəsində cəzalandırılmalıdır. Yaxşı olar ki, həmin bağçanın və rəhbərliyin adı ictimaiyyətə açıqlansın. Belə olan halda, digər bağçalar uşaqların qidalanmasına xüsusi fikir verəcəklər. Beləliklə, bu sahədə hər hansı bir problem yaşanmaz”.
Günel CƏLİLOVA
