Azərbaycan Prezidentinin Bakı Dövlət Universitetinin 100 illik yubileyində gənc nəsillə bağlı səsləndirdiyi fikirlər, onların üzərinə düşən vəzifələr haqqında verdiyi dəyərli tövsiyələr, onlar qarşısında qoyduğu tələblər gənclərə yeni üfüqlər açır.
Ölkə başçısının çıxışında gənc tələbələrə xitabən söylədiyi “...Tələbələrə də sözüm odur ki, bilikli olsunlar. Bugünkü dünyada tanışlıqla, tapşırıqla oxumaq mümkün deyil. Sovet vaxtında belə bir söz var idi: “tapş”, o, instituta “tapşla” daxil oldu. Əvvəllər Sovet dövründə əsas məqsəd diplom almaq idi. Evlənmək üçün, yəni elçiliyə getmək üçün diplomu var, yoxsa yox? Hə varsa, onda markası artır. Diplom heç nədir, bilin. Əgər bilik olmasa, savad olmasa, müasir dünyada bu, əhəmiyyətsiz bir şeydir. Bilik olmalıdır” fikirlər gənclərin biliyə, elmə bağlı olmasını şərtləndirir.
“Cənab Prezident gənclərə bunu tövsiyə edir ki, zamanınızı səmərəli xərcləyin, elmli, bilikli olun”
Gənc Alim, Aspirant və Magistrlər Cəmiyyətinin sədri, Təhsil Nazirliyi yanında İctimai Şuranın məsul katibi, fizika-riyaziyyat üzrə fəlsəfə doktoru İlqar Orucov “Bakı-Xəbər”ə bildirdi ki, ölkə başçısının BDU-nun 100 illiyi münasibətilə etdiyi çıxış bütün parametrlərinə görə çox tarixi bir çıxış idi. “Eyni zamanda, Prezidentin çıxışında həm gəncliyə, həm ziyalılara, həm ali məktəb müəllimlərinə, bütövlükdə isə ölkə ictimaiyyətinə yönəlik çağırışlar vardı və bütün cəmiyyət bu çağırışdan özünə aid çox şey əxz edə bildi. Bu çağırışlardan biri də Azərbaycan gənclərinin savadlı, bilikli olması, yaxşı oxuması, diplom xatirinə oxumaması, gələcəkdə yaxşı mütəxəssis olması ilə bağlı oldu. Bu çağırışda çox ciddi mesajlar var. Bu çağırış bizim bu günümüzlə və gələcəyimizlə birbaşa bağlı olan, səsləşən, gənclərin gələcəyə düzgün istiqamətlənməsində çox vacib rola malik olan bir mesajdır. Bizim yaşadığımız dövr dəyişikliklərlə zəngindir, çox dəyişiklik sürətlə baş verir. Müasir dövrün tələblərinə uyğun olaraq, yeni çağırışlara cavab verən mütəxəssis olmaq daha çox tələb olunur. Tutalım, insanlar Sovet dövründə diplom xatirinə oxuyub hansısa bir işdə çalışmalı olurdu. O zaman onun mənfi nəticəsi idi ki, ali məktəblərə qəbul prosesində neqativlər vardı. Amma indiki dövrdə isə diplom xatirinə oxumaq zamanı boşa xərcləmək deməkdir. Cənab Prezident gənclərə bunu tövsiyə edir ki, zamanınızı səmərəli xərcləyin, elmli, bilikli olun, sizin hansısa bir mövqe tutmağınız üçün əsas olan diplom yox, qazandığınız biliklərdir. Əlbəttə, diplom əldə edib savad əldə etməmək, birmənalı olaraq, indiki dövrlə sələşmir, müasir dövrümüz üçün spesifik deyil. O mənada ki, Azərbaycan gəncləri çiyinlərini dövlətin gələcəyinin altına vermək istəyirlərsə, onlar mütləq şəkildə savadlı, bilikli, çağırışlara, dəyişikliklərə hazır olmalıdırlar. Hesab edirəm ki, gənclər cənab Prezidentin bu fikirlərindən özləri üçün nəticə çıxaracaqlar” - deyə qeyd edən İ.Orucov bildirdi ki, bu çağırış Azərbaycan gənclərinin öz gələcəklərini savadla, elmlə bağlamasına yönəlik bir çağırışdır.
İ.Orucovun sözlərinə görə, Prezidentin gənclərə sözü odur ki, müasir əmək bazarı rəqabətədavamlı olan, çox bilikli kadrlar tələb edir, Azərbaycan gəncləri də öz bilikləri ilə bu bazarda özlərinə yer tutmalıdırlar: “Prezident bununla gənclərə tövsiyə edir ki, gələcəkdə əmək bazarının şərtləri, tələbləri daha sərt olacaq və gənclərimiz buna hazır olmalıdırlar. Hər bir gənc öz üzərində məqsədli şəkildə çalışmalıdır, uğur hər bir insanın nəyi necə öyrənməsindən asılıdır. Bu baxımdan, əlbəttə ki, mütləq şəkildə bizim gənclər müasir dövrün tələblərini anlamalı və dərk etməli, bunun məsuliyyətini öz üzərilərində hiss etməlidirlər. Ümumiyyətlə, təhsilə qoyulan xərc həmişə investisiya sayılıb, bu isə daha etibarlıdır, bilavasitə gələcəkdə bu sahəyə qoyulan vəsaitlə daha çox vəsait əldə etmək olar. Bu baxımdan, ağıllı gənclər prosesi dərk edirlər. Fikirləşirəm ki, gənclər cənab Prezidentin onlara yönəlik çağırışlarının məsuliyyətini dərk edirlər” - deyə İ.Orucov vurğuladı.
İradə SARIYEVA
