“Bakının mərkəzindəki bəzi ali təhsil müəssisələri şəhərin ətrafına köçürülə bilər”. Bu barədə Bakı şəhərinin Baş Planı üzrə yanaşmaların müzakirəsində Memarlıq və İnşaat Universitetinin rektoru Gülçöhrə Məmmədova bildirib.
O qeyd edib ki, Mərdəkanın altmərkəz kimi nəzərdə tutulması tamamilə zəruridir. Sadəcə, oranın gələcəkdə yaşayış tikintisi üçün zona kimi müəyyən edilməsi bir qədər təhlükə yaradır. “Hamımız bilirik ki, Mərdəkan istirahət zonasıdır. Mərdəkan məhz istirahət zonası kimi qalmalıdır. Mərdəkanın turizmin inkişafı, yaşıllıq, istirahət yeri kimi çox böyük potensialı var. Ona görə bu məsələyə bir daha baxılmasını xahiş edirik. Səsləndirdiyim fikirlər təkcə mənim yox, həm də universitetimizin bir sıra mütəxəssislərinin fikridir. Baş Planda ali təhsil müəssisələrinin Xocasən gölünün ətrafına köçürülməsi nəzərdə tutulur. Şəhərin mərkəzindəki ali təhsil müəssisələrinin transport problemlərinin həlli nəzərə alınaraq bir az kənara köçürülməsi və orada daha yaxşı, böyük şəraitin yaradılması məqsədəuyğundur. Amma bu zaman oradan metro xəttinin keçməsi də çox vacibdir".
Paytaxt ərazisinin mərkəzində mövcud olan ali təhsil müəssisələrinin Xocasən gölünün ətrafına köçürülməsi bəzi ekspertlər tərəfindən xoş qarşılansa da, bəziləri məsafənin uzaqlığı baxımından bu qərarın düzgün olmadığını bildirirlər.
“Universitetlərin şəhərin mərkəzində olması nəqliyyat sıxlığının yaranmasına səbəb olan amillərdən biridir”
Azərbaycan Gənc Alim, Aspirant və Magistrlər Cəmiyyətinin sədri, fəlsəfə doktoru İlqar Orucov “Bakı-Xəbər”ə açıqlamasında qeyd etdi ki, universitetlərin şəhərdən kənara, regionlara köçürülməsi uzun müddətdir müzakirə olunur: “Universitetlərin Xocasən gölünün ətrafına deyil, kiçik şəhərlərin birinə köçürülməsi daha uyğun olar. Ərazisi kiçik olan bir şəhərə ali təhsil müəssisələri köçürülərsə, ora tələbə şəhərciyi kimi inkişaf edər və o formada da tanınar. Qeyd edim ki, Avropanın bir çox ölkəsində universitetlər paytaxtdan kənarda olan kiçik şəhərlərdə salınır. Həmin ərazidə tələbə şəhəri kimi tanınır. Məlumat üçün bildirim ki, Xocasən gölünün ətrafında Moskva Dövlət Universitetinin kampusu tikilir. Xocasən gölü Bakıətrafı olsa belə, paytaxta çox yaxındır”.
Həmsöhbətimiz qeyd etdi ki, universitetləri paytaxtın mərkəzindən kənara ona görə köçürmək istəyirlər ki, şəhərdə qeydə alınan sıxlıq aradan qalxsın: “Xocasən gölü də Bakıya yaxın olduğu üçün paytaxtda müşahidə olunan sıxlığın aradan qaldırılmasına gətirib çıxarmayacaq. Bu səbəbdən təhsil ocaqları kənarda salınarsa, daha yaxşı olar”.
Təhsil eksperti onu da vurğuladı ki, Bakıda mövcud olan universitetlərin bəzisi müasir tələblərə cavab vermir: “Hər bir universitetin özünün geniş ərazisi olmalıdır. Ancaq ali təhsil müəssisələrinin, demək olar ki, əksəriyyətinin ərazisi yox dərəcəsindədir”.
Ekspert hesab edir ki, Bakının Baş Planının yenidən hazırlanması paytaxtda qeydə alınan pərakəndəliyin aradan qalxmasına səbəb olacaq. Planda təhsil müəssisələrinin paytaxt ərazisindən kənara köçürülməsi qeyd olunmalıdır. Nəzərə almaq lazımdır ki, universitetlərin şəhərin mərkəzində olması nəqliyyat sıxlığının yaranmasına səbəb olan amillərdən biridir.
Günel CƏLİLOVA
