Ölkədə yas mərasimlərində israfçılığın aradan qaldırılmasına yönəlmiş müzakirələr cəmiyyət tərəfindən birmənalı müsbət qarşılanır. Çünki dəfn mərasimində, ehsan süfrəsində və qəbir daşlarının hazırlanmasında müşahidə edilən israfçılıq uzun illər az qala "adət-ənənələrin dəyişməz rəmzləri" kimi qarşılanıb. Son dövrlərdə bölgələrdən paytaxta qədər hər yerdə dini maarifləndirmə vasitəsilə kütləvi təşviqat aparılır, bu məsələ ilə bağlı dini hökmlər və müqəddəs kitabın tələbləri əhaliyə çatdırılır.
Yas mərasimlərində israfçılığın qarşısının alınması istiqamətində bölgələrdə və paytaxt ərazisində müəyyən işlər görülməsinə baxmayaraq, bu sahədə problem hələ də həll olunmamış qalır.
Bu sahədə qeydə alınan problemin həll olunması üçün sərt tədbirlərin görülməsi nəzərdə tutulur. Milli Məclisin İctimai birliklər və dini qurumlar komitəsinin sədri Siyavuş Novruzov media nümayəndələrinə açıqlamasında qeyd edib ki, Azərbaycanda yas mərasimlərində israfçılığın qarşısının alınmasının iki forması müəyyənləşdirilib: “Bakının əksər yerlərində yas mərasimi ilə bağlı məsələlər öz həllini tapıb. Hazırda Azərbaycanda yas mərasimləri ilə bağlı müzakirələr davam etdirilir. Yas mərasimlərində israfçılığın qarşısının alınması üçün birinci forma qanunla sərt şəkildə, digəri isə təbliğat yolu ilədir. Hələlik bu məsələdə təbliğat yoluna üstünlük verilir. Təbliğatla bu məsələlərin getdikcə sadələşdirilməsi, bərabərləşdirilməsi nəzərdə tutulur. Zənginliyi və kasıblığına fərq qoyulmadan, tanınmış ictimai xadimlər və milli qəhrəmanları çıxmaq şərtilə, yas mərasimləri eyni səviyyədə olmalıdır”.
Maraqlıdır, yas mərasimlərində israfçılığın qarşısı sərt şəkildə necə alına bilər?
“Yas mərasimlərində israfçılığın qarşısının alınması üçün ictimai qınaq olarsa və maarifləndirmə sistemli şəkildə həyata keçirilərsə, problemin tezliklə həllinə nail olarıq”
Sosial sahə üzrə ekspert İlqar Hüseynli bizimlə söhbətində qeyd etdi ki, problemin həlli üçün ictimai qınaq tətbiq olunmalıdır: "Uzun illərdir bu məsələ müzakirə olunur. Artıq bir sıra bölgələrdə yas mərasimləri təntənəli formada deyil, sadə şəkildə keçirilir. Bunun bütün ölkə üzrə keçirilməsi vacibdir. Yas mərasimlərində hökm sürən israfçılığa qarşı mübarizədə birinci növbədə maarifləndirmə işini önə vermək lazımdır. Bu işi vaxtında sistemli şəkildə qura bilməmişiksə, heç olmasa, indidən belə maarifləndirmə işlərini kütləviləşdirməliyik. Danılmaz faktdır ki, bəzi xeyir-şər məclislərində biabırçı süfrələrlə üzləşirik. Bəzi yas mərasimləri var ki, orada təkcə spirtli içki çatmır. İsrafçılıq dinimizə, islamın gətirdiyi qaydalara nə qədər yasaqdırsa, digər tərəfdən, Azərbaycan mənəviyyatına, milli heysiyyatımıza da yad bir məqamdır. Ona görə də süfrələrimizi fironların süfrəsinə çevirməkdən əl çəkməliyik. İctimai qınaq olarsa və maarifləndirmə sistemli şəkildə həyata keçirilərsə, problemin tezliklə həllinə nail olarıq ".
Həmsöhbətimiz onu da əlavə etdi ki, yas mərasimlərində baş verən israfçılıq hallarının qarşısını almaq üçün birinci növbədə insan dini qayda-qanunları yaxşı bilməli və ona əməl etməlidir. Həmçinin, milli mentalitetini də bilməlidir. İnsanların özləri arasında bu istiqamətdə təbliğat, maarifləndirmə işləri getməlidir. Bu istiqamətdə insanlar arasında işləmək lazımdır. Hüzr yerinə gələn özünü yeyib-içmək məclisində deyil, yasda hiss etməlidir. Onun da əsasında məsələ öz həllini tapmalıdır. Bəzi regionlarda problem, bildiyiniz kimi, öz həllini tapıb. Yəqin ki, yaxın zamanlarda digər bölgələrdə də məsələ çözüləcək.
Günel CƏLİLOVA
