Yol insanı işığa, aydınlığa, tərəqqiyə aparır, amma çox təəssüflər olsun ki, yol təsərrüfatına rəhbərlik edən bir çox insan ya bunu dərk etmək istəmir, ya da öz vəzifələrinə səhlənkar yanaşır.
Azərbaycan Prezidenti tərəfindən nəinki paytaxt yollarının, eləcə də rayonların, ən ucqar kəndlərin yollarının qurulması, təmiri ilə bağlı külli məbləğdə vəsait ayrılır, lakin bəzi istisnaları nəzərə almasaq, yolların qurulması, inşası, təmiri elə də keyfiyyətli olmur. Bir çox hallarda yolların salınmasına xərclənməsi üçün dövlət tərəfindən ayrılan vəsaitin cüzi bir hissəsi yol təsərrüfatının qurulmasına xərclənir, qalan vəsait isə ciblərə gedir. Məlum olduğu kimi, tez-tez yollarda təmir işləri aparılır, dağılan asfalt örtüyü yenilənir, amma yenilənən örtüklərin də ömrü çox çəkmir, tezliklə məhv olurlar.
Yol təsərrüfatına rəhbərlik edənlər yollarda əsaslı təmir-bərpa işləri getdiyini, yeni keyfiyyətli yolların salındığını desələr də, yolların keyfiyyəti məsələsində ciddi problemlər olduğu aşkar şəkildə özünü göstərir. Tez-tez yollar çökür, dağılır. Asfalt örtüyü keyfiyyətli olsaydı, əlbəttə ki, yolların dağılmasından, çökməsindən danışmazdıq.
Bibiheybət yolunun çökməsi, dağılması, bunun nəticəsində də tikililərə, avtomobillərə zərər dəyməsi faktı hər kəsi ciddi narahat edir. Avtomobil Yolları Dövlət Agentliyindən verilən məlumata görə, Bibiheybət yolunun çökməsi ərazidə baş verən sürüşmə hadisəsi ilə bağlıdır. Bu öz yerində. İndiyə qədər yalnız Bibiheybət yolu çökməyib, saysız yolda bu kimi hallar baş verib.
Bu günədək dağılan, parçalanan, uçan yollarla bağlı heç bir cinayət işi açılmayıb və buna görə hansısa məmur, məsul şəxs cinayət məsuliyyətinə cəlb edilməyib.
“...bu, başqalarına da dərs olar”
Tanınmış hüquqşünas Adəm Məmmədov “Bakı-Xəbər”ə bildirdi ki, yeni salınan yolların uçub-dağılması, çökməsi son dövrlər adi hala çevrilib. A.Məmmədovun sözlərinə görə, yolların dağılmasında ciddi cinayət tərkibi var. Hüquqşünas hesab edir ki, bu gün yol təsərrüfatına ayrılan külli miqdarda vəsaitin mənimsənilməsi səbəbindən bu kimi hallar baş verir. “Əlbəttə, bu məsələlərdə cinayət tərkibi var. Hesab edirəm ki, yollar çökərkən, dağılarkən “bu hadisə təbii fəlakətin təsirilə baş verib” deyib onu ört-basdır etmək olmaz. Bununla bağlı cinayət işi açılmalıdır. Əvvəla ekspertiza keçirilməlidir, yola çəkilən xərc, yolun keyfiyyəti müəyyən edilməlidir ki, yola nə qədər asfalt vurulub, bu işə nə qədər vəsait xərclənib və s. Bundan sonra hadisə ilə bağlı cinayət işi açılmalı və bu işə məsul olan vəzifəli şəxslər məsuliyyətə cəlb olunmalıdırlar. Yolsalma işi ilə məşğul olanlar o qədər fantastik qiymətlərdən danışırlar ki, bunun öhdəsindən gəlmək çətin məsələdir. Yollar həddən artıq keyfiyyətsiz salınır və bunun nəticəsində də dağılır, çökür. Dövlət tərəfindən güclü maliyyə ayrılmasına, xərclənməsinə baxmayaraq, çox təəssüflər olsun ki, yol təsərrüfatımız bərbad gündədir və bu sahədə olduqca çoxlu problem mövcuddur. Pullar ayrılır, amma onun çox az hissəsi yola xərclənir, bu sahədə ciddi korrupsiya, maliyyə yeyintisi halları mövcuddur. Odur ki, bu sahəyə çox ciddi nəzarət edilməlidir”.
A.Məmmədov qeyd etdi ki, bu gün kanalizasiya idarəsi də, yol idarəsi ilə birləşib xoşagəlməz hallar törədirlər. “Mən başa düşə bilmirəm, kanalizasiya idarəsi ayrı idarədir, yoxsa yol idarəsi ilə bir yerdədir? Bilirsiniz, asfaltı çəkirlər, bir-iki saatdan sonra kanalizasiya, su idarəsinin işçiləri orada peyda olub yolu qazırlar. Yolların çökməsi, dağılması o yolların keyfiyyətsiz salınması ilə bağlıdır. Hesab edirəm ki, yolların keyfiyyətinə cavabdeh olan, məsuliyyət daşıyan bir çox vəzifəli şəxs həbs edilməli, onlarla bağlı cinayət işi başlamalıdır. Çünki bu sahəyə məsul olan, lakin öz vəzifəsinə səhlənkar yanaşan, korrupsiyaya bulaşan vəzifəli şəxslər barədə cinayət işi açılsa, bu, başqalarına da dərs olar. Bunun qarşısını başqa yolla almaq mümkün deyil” - deyə A.Məmmədov qeyd etdi.
İradə SARIYEVA
