Azərbaycan əhalisinin səbrsizliklə gözlədiyi icbari tibbi sığortanın ölkədə tətbiqi ilə bağlı əvvəlcədən açıqlanan qrafik və sığorta ilə bağlı bəzi qaydalar dəyişib. Bu barədə İcbari Tibbi Sığorta Agentliyinin idarə heyətinin sədri Zaur Əliyev bildirib.
Əsas yenilik odur ki, ölkədə icbari tibbi sığortanın tətbiqi birdən-birə bütün ölkə üzrə deyil, mərhələ-mərhələ başlanacaq. Bu məqsədlə ölkə ərazisi şərti olaraq 4 hissəyə bölünəcək. Yanvarın 1-dən tətbiq ediləcək icbari tibbi sığorta əvvəlcə ölkənin şimal bölgəsinin 20 rayonundan başlayacaq və hər 3 aydan bir digər rayonlar da qoşulacaq.
Z.Əliyev sözügedən məsələ ilə bağlı bunları deyib: “İcğari tibbi sığortanın yanvarın 1-dən etibarən Azərbaycanın şimal bölgəsində başlanmasını təklif edirik. Şimal bölgəsinə 20 rayon daxildir. Bundan 3 ay sonra, yəni aprelin 1-dən etibarən bu prosesə ölkənin qərb bölgəsindəki rayonlar qoşulacaq, söhbət daha 17 rayondan gedir. 3-cü rübdən etibarən bu prosesə cənub bölgəsindəki 14 rayon qoşulacaq. 4-cü rübdən isə bu prosesə Bakı və Sumqayıt rayonları da qoşulur”.
Nəticədə 2020-ci ilin sonunadək bütün ölkə əhalisi icbari tibbi sığortadan yararlana biləcək.
O da məlumdur ki, neçə vaxt idi icbari tibbi sığortanın gələn ildən etibarən bütün ölkə üzrə tətbiq ediləcəyi deyilirdi. Maraqlıdır, icbari tibbi sığortanın bütün ölkə miqyasında eyni vaxtda tətbiq edilməsi qərarı niyə dəyişdi? Bunun səbəbi nə ilə bağlıdır?
“Bunun sayəsində yanlışlıqlara yol verilməyəcək və bu sahədə mövcud olan problemlər bir neçə il ərzində həll olunacaq”
Məsələyə münasibət bildirən iqtisad elmləri doktoru Fikrət Yusifovun sözlərinə görə, fiziki baxımdan eyni vaxtda bunu bütün ölkə üzrə tətbiq etmək mümkün deyil: “Ona görə də icbari tibbi sığortanın 2020-ci ildən etibarən ölkə üzrə həyata keçirilməsi mərhələ-mərhələ baş tutacaq. Çünki gələn ildən etibarən birdən-birə icbari tibbi sığorta mexanizmini, Bakı daxil olmaqla, bütün ölkə üzrə işə salmaq fiziki baxımdan mümkün deyil. Ona görə də bu iş rüblər üzrə həyata keçiriləcək. Hər rüb bir neçə region üzrə icbari tibbi sığorta mexanizmi işə düşəcək. Hesab edirəm ki, icbari tibbi sığortanın bu formada tətbiqi daha keyfiyyətli olar. Bunun sayəsində yanlışlıqlara yol verilməyəcək və bu sahədə mövcud olan problemlər bir neçə il ərzində bütün ölkə üzrə həll olunacaq. İcbari tibbi sığorta tətbiq olunarkən onun özünün iş prinsipləri var. Hesab edirəm ki, həmin prinsiplərin hamısı yüksək səviyyədə gözlənilməlidir. Məndə olan məlumata görə, bu il 3 rayonda sınaq məqsədilə tətbiq olunan icbari tibbi sığortanın nəticələri müsbətdir. Hətta bir sıra gözləntilərdən də yaxşı nəticələr əldə olunub. Bu mərhələli keçiddə məqsəd ondan ibarətdir ki, icbari tibbi sığortanın tətbiqi səmərəli olsun. Ona görə də hesab edirəm ki, icbari tibbi sığortanın bütün prinsiplərinin gözlənilməsi, nəticə etibarilə, sonda yaxşı nəticələrin əldə olunmasına imkan verəcək”.
Vidadi ORDAHALLI
