09/12/2019 22:24
728 x 90

Uşaqları əxlaqsızlığa cəlb edənlərə qarşı ciddi hüquqi proses başlayıb

Kəmalə Ağazadə: “Ümumiyyətlə, baxımsız şəraitdə olan uşaqların hər biri potensial cinsi zorakılıq qurbanıdır”

img

Cəmiyyətin ən həssas üzvləri olan uşaqları bəzən müxtəlif zorakılıq hadisələrindən qorumaq mümkün olmur. Bəzən valideyn diqqətsizliyi, eləcə də müəyyən səbəblər uşaqların cinsi zorakılıq qurbanına çevrilməsinə səbəb olur. Doğrudur, dünya ölkələri ilə müqayisədə bu hal Azərbaycanda elə də geniş yayılmayıb, amma təəssüf ki, az da olsa mövcuddur.   

Bu il azyaşlıların əxlaqsızlığa cəlb edilməsi üzrə 57 cinayət işi başlanıb.  

Baş Prokurorluğun Daxili İşlər orqanlarının istintaq, təhqiqat və əməliyyat-axtarış fəaliyyətində qanunların icrasına nəzarət idarəsinin rəis müavini Mehman Xankişiyev “Uşaqlara qarşı zorakılığın qarşısının alınması və ləğv edilməsi” mövzusunda keçirilən konfransda bildirib ki, bu ilin I yarısında Azərbaycanda azyaşlıların cinsi toxunulmazlığı, cinsi azadlığı əleyhinə olan cinayətlər, habelə azyaşlıların fahişəliyə, əxlaqsız əməllərə cəlb edilməsi üzrə 57 cinayət işi başlanıb. Onun sözlərinə görə, həmin cinayət işlərinin 12-si Cinayət Məcəlləsinin 150-ci maddəsi, 40-ı 152-ci maddəsi, 5-i 153-cü maddəsi üzrə olub.

M.Xankişiyev əlavə edib ki, bu ilin birinci yarımilində, ümumilikdə, 38 cinayət işi üzrə istintaq tamamlanaraq məhkəmələrə göndərilib. Həmin işlər üzrə bəraət hökmü olmayıb. Cinayət işləri üzrə 19 şəxs barəsində həbs-qətimkan tədbiri seçilib.

  • “...üstü açılmayan cinayətlər də çoxdur”

Azərbaycan Uşaqlar Birliyinin sədri Kəmalə Ağazadə “Bakı-Xəbər”ə bildirdi ki, təqdim edilən faktlar üstü açılmış cinayətlərdir, hüquqi müstəviyə çıxarılmayan kifayət qədər belə cinayət var. “Bu, azyaşlıların əxlaqsızlığa cəlb edilməsi ilə bağlı üstü açılmış 57 cinayət faktıdır ki, onlarla bağlı artıq cinayət işi başlayıb. Yəni artıq bu cinayət hadisələri ilə bağlı rəsmi şəkildə aidiyyəti qurumlara müraciət olunub, fakt araşdırılıb və öz təsdiqini tapıb, istintaq başlayıb.

Belə uşaqlar da bu cür cinayətkar qrupların toruna düşür və cinsi zorakılığa məruz qalırlar, əxlaqsızlığa cəlb olunurlar. Bizim sığınacaqda yerləşdirilən uşaqların xeyli faizi cinsi zorakılıq qurbanlarıdır. Onlar ayrı-ayrı illərdə bu cinayətin qurbanı olublar. Ümumiyyətlə, baxımsız şəraitdə olan uşaqların hər biri potensial cinsi zorakılıq qurbanıdır. Çünki onlara zamanında diqqət ayrılmadığı üçün, müxtəlif qruplaşmaların, eləcə də ayrı-ayrı şəxslərin qurbanına çevrilirlər, o uşaqları əxlaqsızığa cəlb edir və cinsi zorakılığa məruz qoyurlar. Bu günə kimi bu istiqamətdə üstü açılmayan cinayətlər də çoxdur” - deyə bildirən K.Ağazadənin sözlərinə görə, uşaqların əxlaqsızlığa cəlb edilməsi ilə bağlı başlanan bu istintaq işi cinayət törətmiş şəxslərin cəzalandırılması ilə nəticələnəcək. Bundan əlavə, o hesab edir ki, üstü açılmayan cinayətləri törədənlər də aşkarlanıb məhkəmə qarşısına çıxarılmalıdırlar.

İradə SARIYEVA 

Son xəbərlər