Şəmsəddin Əliyev: “Yeganə “qaynar xətt”dir ki, 102-yə olunan zənglərə çevik qaydada reaksiya verilir”
Daxili İşlər naziri, general-polkovnik Vilayət Eyvazov “Törədilmiş və hazırlanan cinayətlər və hadisələr barədə məlumatların qəbulu, qeydiyyatı və baxılması qaydaları haqqında Təlimat”a dəyişiklik edilməsi ilə bağlı qərar imzalayıb. Qərarla təlimata 3.2-2-ci bənd əlavə olunub.
Yeni bənddə göstərilib ki, cinayət barədə 102 xidməti-zəng mərkəzi sisteminə məlumat verən şəxsin ilkin ərizəsinin alınması üçün ərazi polis qurumuna dəvət edilməsi qadağandır.
Lakin hadisə yerinə baxışın keçirilməsinə, müraciət edən və digər şəxslərdən dərhal izahatların alınmasına zərurət olmadığı hallar istisna təşkil edir.
Həmin məlumat üzrə əməliyyat-istintaq qrupu hadisə yerinə dərhal çıxır və müraciət edən şəxsin məlumatına əsasən yerində (hadisə yerində, yaşadığı və ya olduğu ünvanda) şifahi ərizə protokolu tərtib olunur.
Şəxs yazılı müraciət etmək istədikdə ərizəsi alınır. Şəxs məlumat verməkdən və ərizə yazmaqdan imtina etdikdə bu barədə protokol tərtib olunur. Həmin protokolda şəxsin məlumat verməkdən və ərizə yazmaqdan imtinasının səbəbləri haqqında qeyd aparılır. Protokol onu tərtib edən və məlumat verən şəxslər tərəfindən imzalanır. Bununla bağlı orqan rəhbərinin adına raport yazılır. Raport və protokol araşdırma materialına əlavə olunur.
Yalnız hadisə barədə verilmiş məlumatın (cinayət xarakterli olmayan) xarakterindən asılı olaraq, orqan rəisinin (olmadıqda məsul növbətçinin) göstərişi əsasında aidiyyəti ünvana polis sahə rəisi (inspektoru), post-patrul, yol-patrul xidməti naryadları, əməliyyat müvəkkili və ya digər struktur qurumların əməkdaşları göndərilir.
Qərarın icrasına nəzarət müvafiq sahəyə kuratorluğu həyata keçirən nazir müavinlərinə həvalə olunub. Qərar noyabrın 13-dən qüvvəyə minib.
Qeyd edək ki, son vaxtlar nazir Vilayət Eyvazov tərəfindən atılan addımlar, qəbul edilən qərarlar əhali tərəfindən böyük rəğbətlə qarşılanır. Məsələn, piyadaların yolu keçərkən polis tərəfindən yerindəcə cərimələnməsinin ləğvi, avtomobillərin arxa şüşələrinə vurulan pərdə və plyonkalara tətbiq edilən qadağanın dayandırılması və başqalarını bura aid edə bilərik. 102 xidmətinə edilən müraciətlərlə bağlı qəbul edilən yeniliyin vətəndaş məmnunluğu və polisin fəaliyyətinə nə kimi təsiri olacaq?
- “Bu çeviklik həm cinayətlərin “isti izlər”lə açılmasına xidmət edir, həm də vətəndaş məmnunluğunun yaranmasına təsir göstərir”
“Polisə Dəstək” İctimai Birliyinin sədri Şəmsəddin Əliyev “Bakı-Xəbər”ə bildirdi ki, bu yenilik DİN-in fəaliyyətində ciddi dönüş yaradacaq: “Sirr deyil ki, vətəndaşlar DİN-ə müraciət edəndə onların mütləq mənada ərazi üzrə polis bölmələrinə dəvət olunması tələb edilirdi. Bunun hansısa formada təmin olunması lazımdır. Çünki söhbət cinayətin araşdırılmasından gedirsə, orada mütləq şikayətçinin izahatının alınması, dindirilməsi olmalıdır. Yeni qərarla bu asanlaşır. Həmin şəxsin yanına polislərin özü gedəcək. Əvvəllər bir şikayətə görə vətəndaşlar bir neçə dəfə polisə dəvət edilirdisə, bu aradan qaldırılacaq. Burada həm də anonimliyin qorunması da təmin olunacaq. Yeni əmrdə buna da böyük önəm verilib. Şikayətçi, məlumatı verən şəxsin anonimliyinin təmininə qanunla icazə veriləcək. Biz fikir verirdik ki, qadınlar belə müraciətləri etməkdən çəkinirdilər. Daha çox kişilər 102-yə zəng vururdular. Qadınlar polisə çağırılmaları, adlarının hallanması səbəbindən belə müraciətləri etməkdən çəkinirdilər. Hesab edirəm ki, bu yenilikdən sonra deyilən narahatlıq da aradan qalxacaq. Bundan sonra bütün prossesual hərəkətlərin həyata keçirilməsində vətəndaş məmnunluğu maksimum nəzərə alınacaq. Bunlar özünü cinayətlərin üstünün açılması ilə bağlı statistikada müsbət mənada göstərəcək”.
Ş.Əliyev bildirdi ki, DİN-in “qaynar xətt”i digər qurumlarla müqayisə olunmayacaq dərəcədə ideal vəziyyətdə fəaliyyət göstərir: “Nazirlər Kabinetinin tərkibinə daxil olan bir çox qurumda “qaynar xətt” fəaliyyət göstərir. Ölkə Prezidentinin son tapşırıqlarından sonra əhalinin həmin “qaynar xətt”lərə müraciətlərində artım müşahidə olunur. Ancaq heç kimə sirr deyil ki, bir çox “qaynar xətt”ə zəng edərkən biz məyus oluruq. Bəzən uzun zaman melodiyalara qulaq asmağa məcbur qalırıq. Ancaq yeganə “qaynar xətt”dir ki, 102-yə olunan zənglərə çevik qaydada reaksiya verilir. Bu çeviklik həm cinayətlərin “isti izlər”lə açılmasına xidmət edir, həm də vətəndaş məmnunluğunun yaranmasına təsir göstərir. Cənab Prezident son müşavirələrdən birində dedi ki, Azərbaycan xalqının polisə etimadı və inamı var. Bunu qazanmaq üçün belə fəaliyyət lazımdır. Hesab edirəm ki, 102-yə müraciətlərlə bağlı olunan dəyişiklik həmin xidmətin işini daha da təkmilləşdirəcək və bunun da polisin fəaliyyətinə faydası olacaq”.
Məhəmmədəli QƏRİBLİ
